Արգամիչի ստեղծածը Փաշինյանն ավերակ է դարձնում

Այս տարիներին եզակի դրական ծրագրերից մեկը վարկերի տոկոսները եկամտահարկով վերադարձնելու արտոնությամբ բնակարաններ ձեռքբերելն էր։ Օրեսդրական այս նախագիծը ասպարեզ բերվեց Հովիկ Աբրահամյանի վարչապետության օրոք եւ գործում էր ավելի քան հինգ տարի:
Նիկոլ Փաշինյանի ջարդարար իշխանությունը որոշել է այս օրենքն էլ կասեցնել:
Այն պարագայում, երբ ծրագրի շնորհիվ բազմաթիվ մարդիկ՝ երիտասարդ պաշտոնյաներ, ծրագրավորողներ, լրագրողներ, բժիշկներ, բնակարաններ ձեռք բերեցին։ Ծրագիրը նախեւառաջ ժողովրդագրական առումով իր դրական ազդեցությունը գործեց, բազմաթիվ երիտասարդ զույգեր, որոնց համար առաջնահերթ էր սեփական բնակարանը ունենալը եւ առանձին ապրելը, ամուսնացան, երեխաներ ունեցան, չարտագաղթեցին, իրենց ապագան կառուցեցին եւ կառուցում են Հայաստանում։
Երկրորդ՝ ծրագիրը տնտեսական մեծ աշխուժություն մտցրեց շինարարական շուկայում, բազմաթիվ շենքեր սկսեցին կառուցել, իսկ դա նշանակում է՝ աշխատատեղերի ստեղծում:

Բացի այդ բազում տնտեսվարողներ դուրս եկան ստվերից: Եթե նախկինում շատերը կհամաձայնեին չգրանցված աշխատող լինել, աշխատավարձը ստանալ «սեւով», ապա այս ծրագրից օգտվելու համար շատերը պահանջեցին գործատուից իրենց բերել հարկային դաշտ:
Պարզ ասած՝ սա իդեալական ծրագիր է քաղաքացու համար, ինչը, բնականաբար, Նիկոլ Փաշինյանի մոտ վրդովմունք է առաջացրել: Կառավարության պատասխանատուների հաշվարկով՝ ծրագիրը մեծ ֆինանսական բեռ է պետության համար:
Բայց այս փաստարկը որեւէ քննադատության չի դիմանում, եթե ֆինանսական բեռ է բյուջեի համար, բյուջեւում, կոպիտ ասած փող չկա, ապա ինչպես են երեք տարի այս իշխանություներն իրենց ճոխ-ճոխ, միլիարդավոր պարգեւավճար բաժանել, եթե բյուջեում փող չկա, ինչու էր Փաշինյանը իր առանձնատունը 2 միլիոն դոլարանոց վերանորոգում: Նիկոլ Փաշինյանը իր թիմի հետ եկավ իշխանության, բյուջե թալանելու հաշվին իրենք էլ բնակարաններ ձեռք բերեցին, օգտվում են այդ ծրագրից, հիմա որոշել են, որ բավ է, կարող է այն այլեւս չգործել եւ այդ գումարներն էլ ուղղել սեփական, այլ ոչ թե շարքային քաղաքացու գրպանը: Ավել փողը երբեք չի խանգարի, մանավանդ, որ իրենց կենսամակարդակն այնքան է բարձրացել, որ հիմա տներ են ձեռք բերում Շվեցարիայում եւ Կանադայում:

Այնուամենայնիվ, զարմանալի է՝ եթե կառավարությունը ֆինանսի խնդիր ունի, բյուջեում, իսկապես, փող չկա, ինչու Փաշինյանը չի դիմում իր թուրք բարեկամներին եւ ֆինանսական աջակցություն խնդրում, չէ՞ որ ցարի պես կանգնած են իր թիկունքին եւ վայնասուն էին բարձրացրել Նիկոլ Փաշինյանի հնարավոր հեռացման առիթով:

Ի դեպ, ծրագիրը աստիճանաբար է կասեցվելու, սկզբում Երեւանում, կառավարության բացատրությունն այն է, թե զարկ են տալիս համաչափ զարգացմանը, որպեսզի մարզերում էլ բնակարաններ կառուցվեն: Բայց եթե մարզերում ապրելը անվտանգ չէ, եթե բոլոր պետական եւ մասնավոր հիմնարկները, ուսումնական հաստատությունները տեղակայված են մայրաքաղաքում, եթե մարզերում մարդիկ ունեն աշխատանքի խնդիր, ինչպե՞ս եւ ինչո՞ւ պետք է մնան այնտեղ ապրելու։ Մարզերի համաչափ զարգացումը կյանքի կոչելու համար մինչ այս ծրագիրը վերացնելը բազմաթիվ քայլեր կան անելու:

Անի Սահակյան