Նիկոլի քավորը ընդդիմության համար էլ է սրբություն

Մեկ շաբաթյա դրամատիկ ու սկանդալային քննարկումներից, եռացող կրքերից հետո խորհրդարանը վերջապես ընտրեց ԱԺ մշտական հանձնաժողովի նախագահներին: Մինչ այդ իշխանությունն ու ընդդիմությունը հասցրեցին հատել բոլոր կարմիր գծերը, քննարկումները վերածել փոխադարձ վիրավորանքների, անգամ զորք մտավ նիստերի դահլիճ, որ հանդարտեցնի պարված կրքերը: Բայց ուշագրավ է, որ այս հախուռն քննարկումների տակ քողարկված է ընդդիմություն-իշխանություն անանց սեր, որը բացահայտվեց գաղտնի քվեարկության արդյունքներով:
Նիկոլ Փաշինյանի քավորը՝ Վահե Ղալումյանը, որն առաջադրվել էր Տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովի նախագահի թեկնածու ընտրվել է 74 կողմ, 26 դեմ ձայների հարաբերակցությամբ: Ինչպես հայտնի է` խորհրդարանում իշխող Քաղպայմանագիրն ունի 71 մանդատ, իսկ սա նշանակում է, որ ևս երեք պատգամավոր ընդդիմությունից ձայն է տվել Փաշինյանի քավորին, ըստ ամենայնի Փաշինյանի քավորը սրբություն է ոչ միայն սանիկական ընտանիքի համար, այլեւ հայրենի ընդդիմության: Այն ընդդիմության, որը մինչեւ խորհրդարան անցնելը յոթհարկանի հայհոյանքներով էր խոսում Նիկոլ Փաշինյանի ու իր թիմի մասին, այն ընդդիմության, որը խոստանում էր իշխանության կյանքը դժոխքի վերածել, մինչդեռ որին այսօր անգամ արգելում ն խորհրդարանի նիստերի դահլիճում հնչեցնել Նիկոլ բառը, իսկ եթե որեւէ մեկի մտքով կանցնի իրերն իրենց անուններով կոչել եւ Նիկոլ-ի կողքին կպցնել նաեւ կապիտուլանտ բառը, իշխանությունը պատրաստ է խորրդարանում տեղակայված զորքի միջոցով պատերազմել ընդդիմության հետ:
Այս փոքրիկ դիպվածը նաեւ այն մասին է, որ այսօրվա խորհրդարանական ընդդիմությունն այսուհետ բարոյական իրավունք չպետք իրեն վերապահի քննարկել նախկին ընդդիմության ոչ ռադիկալ, հարմարվողական քաղաքականությունը: Ընդամենը տաս օր է անցել նոր խորհրդարանի ձեւավորումից եւ մենք տեսնում ենք, որ արտաքուստ արմատական ընդդիմադիրները գաղտնի խաղեր են տալիս իշխանությունների հետ եւ քավորի օգտին քվեարկում: Ինչպես ԱԺ նախկին խոսնակը կասեր՝ «էս չեք, արա՜»:
Նշենք, որ ընդդիմությունը միասին վերցրած 35 պատգամավոր ունի, բայց Հայաստան դաշինքից երկուսն անազատության մեջ են, բացակայում էին եւս երկուսը:
Իշխանությունների աջակցությամբ նաեւ ընդդիմադիրները ստանձեցին հանձնաժողովիի նախագահություն: Այսպիսով՝ Աշխատանքի և սոցիալական հարցերի մշտական հանձնաժողովի նախագահ է ընտրվել «Քաղաքացիական պայմանագիր» խմբակցության պատգամավոր Հերիքնազ Տիգրանյանը՝ 71 կողմ, 31 դեմ ձայների հարաբերակցությամբ։
Առողջապահության հարցերի մշտական հանձնաժողովի նախագահ է ընտրվել «Քաղաքացիական պայմանագիր» խմբակցության պատգամավոր Նարեկ Զեյնալյանը՝ 72 կողմ, 30 դեմ ձայների հարաբերակցությամբ։
Արտաքին հարաբերությունների մշտական հանձնաժողովի նախագահ է ընտրվել «Քաղաքացիական պայմանագիր» խմբակցության պատգամավոր Էդուարդ Աղաջանյանը՝ 72 կողմ, 30 դեմ ձայների հարաբերակցությամբ։
Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ է ընտրվել «Քաղաքացիական պայմանագիր» խմբակցության պատգամավոր Սիսակ Գաբրիելյանը՝ 71 կողմ 29 դեմ ձայների հարաբերակցությամբ։
Եվրոպական ինտեգրման հարցերի մշտական հանձնաժողովի նախագահ է ընտրվել «Քաղաքացիական պայմանագիր» խմբակցության պատգամավոր Արման Եղոյանը՝ 71 կողմ, 31 ձայների հարաբերակցությամբ։
Մարդու իրավունքների պաշտպանության և հանրային հարցերի մշտական հանձնաժողովի նախագահ է ընտրվել «Պատիվ ունեմ» խմբակցության պատգամավոր Թագուհի Թովմասյանը՝ 60 կողմ, 42 դեմ ձայների հարաբերակցությամբ։
Պաշտպանության և անվտանգության հարցերի մշտական հանձնաժողովի նախագահ է ընտրվել «Քաղաքացիական պայմանագիր» խմբակցության պատգամավոր Անդրանիկ Քոչարյանը՝ 70 կողմ, 31 դեմ ձայների հարաբերակցությամբ։
Պետական, իրավական հարցերի մշտական հանձնաժողովի նախագահ է ընտրվել «Քաղաքացիական պայմանագիր» խմբակցության պատգամավոր Վլադիմիր Վարդանյանը ՝ 71 կողմ, 30 դեմ ձայների հարաբերակցությամբ։
Տարածարջանային և եվրասիական ինտեգրման հարցերի մշտական հանձնաժողովի նախագահ է ընտրվել «Հայաստան» խմբակցության պատգամավոր Արմեն Գևորգյանը՝ 62 կողմ, 40 դեմ ձայների հարաբերակցությամբ։

Տնտեսական հարցերի մշտական հանձնաժողովի նախագահ է ընտրվել «Հայաստան» խմբակցության պատգամավոր Վահե Հակոբյանը՝ 59 կողմ, 43 դեմ ձայների հարաբերակցությամբ։
Ֆինանսավարկային և բյուջետային հարցերի մշտական հանձնաժողովի նախագահ է ընտրվել «Քաղաքացիական պայմանագիր» խմբակցության պատգամավոր Գևորգ Պապոյանը՝ 70 կողմ, 30 դեմ ձայների հարաբերակցությամբ։
Նկատենք, որ ԱԺ մշտական հանձնաժողովների ղեկավարների ընդդիմադիր թեկնածուների օգտին քվեարկել են նաև իշխանական պատգամավորներ:
Նշենք, որ խորհդարանում գործելու է 12 մշտական հանձնաժողով, որոնցից 9-ը ղեկավարելու է իշխող «Քաղաքացիական պայմանագիր» խմբակցությունը, երկուսը՝ «Հայաստան» խմբակցությունը, իսկ մեկը՝ «Պատիվ ունեմ» խմբակցությունը:

Անի Սահակյան