Բռնվեք. իշխանությունը նոր աղետին ընդառաջ

Պատերազմից, խայտառակ պարտությունից եւ երկիրը աղետի առաջ կանգնեցնելուց հետո Նիկոլ Փաշինյանն ու իշխանությունը նոյեմբերի 9-ից սկսած հայտնվեցին հոգեվարքի մեջ: Մեզ ամեն պահի թվում էր, որ շուտով կնքեն մահկանացուն, բայց արիուտես, որ իշխանությունը ոչ միայն վեր է հառնել մոխիրներից, այլեւ վերադարձել է լկտիության, սանձարձակության ու անամոթության նախկին մակարդակին: Խորհրդարանում պաշտպանության մշտական հանձնաժողովի նախագահի պաշտոնում Անդրանիկ Քոչարյանի ընտրության հարցի քննարկումը վերածեցին նախկինների դեմ զազրախոսության ստոր ու ցինիկ ցերեկույթի:
Հերթական անգամ չքմեղացան կարծես, թե Արցախի անկումը, ոչ թե իրենց, այլ նախկինների մեղքն է, որ Հայաստանը կապիտուլյացիայի չի ենթարկվել, որ նախկինում զինվորները սոված են եղել և այլ տխմարաբանություններ։ Այն որ այդ մարդիկ որևէ սկզբունք, արժեհամակարգ, հայրենիքի զգացողություն չունեն պարզ է։
Հինգ հազար զոհ, հազարավոր վիրավորներ, տնազուրկ մարդիկ, թվում էր, թե այս բոլորը պետք է կտրեր անամոթների լեզուն, բայց, ոչ:
Այսքանից հետո, օրինակ Անդրանիկ Քոչարյանն պետության օրենսդիր թիվ մեկ ամբիոնից իրեն իրավունք է վերապահում հայտարարել, թե իշխանությունն ի դեմս Նիկոլ Փաշինյանի փայլուն է կատարել պաշտպանական, անվտանգային հարցերը։ «Փայլո՞ւն էր ձեր կատարած աշխատանքը կամ փայլո՞ւն էր երկարատեւ բանակցային ժառանգության մսխումը, որ Ադրբեջանը չդրվեց կանխարգելիչ գործողությունների մեջ եւ պատերազմ սկսեց»,-դիմելով ՔՊ-ին՝ իրավացիորեն նկատեց «Հայաստան» դաշինքի ղեկավար, պաշտպանության նախկին նախարար Սեյրան Օհանյանը։ Նա հարցադրում արեց․ «Փայլուն կերպով ռազմավարական դիրքերը, կետերը փայլեցրիք ու տվեցիք ադրբեջանցիներին»։
Կամ՝ ՔՊ-ականները անմրցելի ցինիզմով նախկիններին մեղադրեցին բանակը սոված պահելու համար այն պարագայում, իրենց շարքերում են ընդգրկել բանակի գեներալներից Գագիկ Մելքոնյանին, ով 2000-2008 թվականը փոխնախարար էր, թիկունքի գծով պատասխանատու:

Իրենց աչքի գերանը թողած ՔՊ-ականները փորձեցին թմբկահարել Մարտի 1-ը, Անդրանիկ Քոչարյանը մեղադրանքներ հնչեցրեց բանակը փողոց հանելու եւ այլնի մասին: Այն դեպքում, երբ Նիկոլ Փաշինյանը հայտարարել է Մարտի 1-ի գործը բացահայտված լինելու մասին, իսկ ինչպես տեսնում ենք, որեւէ մեկը այդ մեղադրանքով նստած չէ, դատապարտված չէ: Ընդհանրապես Ռոբերտ Քոչարյանի գործով ՍԴ որոշումից հետո այս իշխանությունը պետք է մոռանար Մարտի 1-ի թեման, չվայրահաչեր պատեհ-անպատեհ: Բայց ինչպես տեսնում ենք՝ իշխանությունը լիիրավ իրավունք է վաստակել, լինելու ավելի ինքնավստահ և ցինիկ։ Խայտառակ պարտությունից, ողջ Հայաստանն ու հայ ժողովրդին նվաստացնելուց հետո, նրանք կարողացան իրենց օրակարգը թելադրել բոլորին՝ ընդդիմությանը, հասարակությանը, ժողովրդին և «հաղթեցին» ընտրություններ կոչված ֆարսով։
Խայտառակ պարտությունից հետո Հայաստանում չձևավորվեց Արցախի կորստով մտահոգ վճռական գործիչների համախմբում, ովքեր իրենց առջեւ պետք է մեկ խնդիր դնեին՝ հեռացնել ազգակործան իշխանությանը։ Օրինակ ընդդիմության ինչին է պետք մասնակցել այս կլոունադային, ստանձնել հանձնաժողովի նախագահություն, եթե մեծամասնությունը այդ հանձնաժողովներում ՔՊ-ն է եւ որոշումներն ընդունվելու են նրանց կամոք: Իսկ հանձնաժողովի նախագահը ստանալու է նիստը վարելու իրավունք, ծառայողական մեքենա եւ մի 200 հազար դրամ ավել աշխատավարձ: Այնպես որ, պարոնայք ընդդիմադիրներ հասնում է, դուք շարունակեք ձեր քաղցր-մեղր պաշտոնակռիվը, իսկ այս ապիկարները Արցախը հանձնելուց հետո վաղը մեզ բոլորիս են թուրքին հանձնելու:

Անի Սահակյան