Հարցը փակվեց. Արցախ գոյություն չունի

Ազգային ժողովում իշխող մեծամասնությունը տապալեց Արցախի հարցերով մշտական հանձնաժողով ստեղծելու՝ ընդդիմադիր «Պատիվ ունեմ» խմբակցության նախաձեռնությունը, որի աջակցում էր նաեւ «Հայաստան» դաշինքը: Քվեարկության արդյունքում գրանցեց՝ 33 կողմ, 0 դեմ, 68 ձեռնպահ: Նախագծին կողմ քվեարկեցին «Հայաստան» և «Պատիվ ունեմ» խմբակցությունների պատգամավորները, իսկ իշխող «Քաղաքացիական պայմանագիր» կուսակցության պատգամավորները ձեռնպահ էին քվեարկությամբ, իսկ իրականում՝ դեմ, որը տեսանելի դարձավ քննարկման ամբողջ ընթացքում: Նրանք այդպես էլ որևէ հիմնավոր պատճառաբանություն չբերեցին, թե ինչու է անթույլատրելի Արցախի հարցերով մշտական հանձնաժողովի ստեղծումը:
Իսկ նրանց ելույթները պարզապես մանկապարտեզային մսուր խմբի հանդեսի ոտանավորներ էին հիշեցնում, թե մենք ամբողջ հոգով-սրտով զբաղվում ենք Արցախի խնդիրներով, թե իբր փաստացի ՀՀ բոլոր պետական գերատեսչությունների գլխավոր անելիքը Արցախի հարցերն են, Վլադիմիր Վարդանյանն էլ չտարավ-չբերեց ասաց՝ այնքան են կարեւորում Արցախի խնդիրները, որ չեն ուզում հանձնաժողովի մակարդակի իջեցնել: Այո, մենք տեսանք, թե որքան են կարեւորում, այնքան, որ Արցախի 75 տոկոսը տվեցին թուրքին, կոտորած, սպանդ արեցին, հազարավոր մարդկանց թողեցին անտուն, բայց պատերազմից հետո շուտով մեկ տարին կլրանա, իսկ Նիկոլ Փաշինյանն ու իշխանության առանցքային պաշտոնյաները դեռ ոտք չեն դրել Արցախ:

Ընդդիմադիրները փորձեցին բացատրել, որ նման հանձնաժոովի առկայությունը կնշանակի ամենօրյա, ամենժամյա ռեժիմով զբաղվել Արցախի խնդիրներով, որ հենց Արցախում է այսօր որոշվում Հայաստանի ապագան, ու պետք է մատը ցավի վրա պահել, սակայն իշխանականներն անդրդվելի մնացին, Ռուբեն Ռուբինյանը հայտարարեց, որ միայն մեսիջի համար չի կարելի հանձնաժողով ստեղծել:
Փոխարենը իշխող խմբակցությունը ջանք ու եռանդ չէր խնայում ապացուցելու, որ առողջապահության և սոցիալական հարցերի հանձնաժողովները պետք է առանձին գործեն:
Նշենք, որ սա արվում է սորոսական Հերիքնազ Տիգրանյանին հանձնաժողովի նախագահ դարձնելու համար:

 Փաստացի, Արցախի հարցն ամբողջությամբ ձախողած, երկիրը պարտության առաջնորդած, հազարավոր զոհերի պատճառ դարձած քաղաքական ուժը բացահայտ խոստովանեց, որ ձեռքերը լվանում է Արցախից ու Արցախի խնդիրներից:

Անի Սահակյան