Կրուտիտի չեմպիոնը. Փաշինյանին մարտահրավեր է նետված

Ազգային ժողովի նախագահների տեղակալներ Ռուբեն Ռուբինյանի եւ Հակոբ Արշակյանի թեկնածությունների քննարկման ընթացքը ջրի երես դուրս բերեց այս իշխանության ինպոտենտ դեմքը: Խորհրդարանի ամբիոններից եւ այլ տեղերից ընդդիմախոսների վրա հոխորտացող իշխանականները պետության անվտանգության, սահմանների մասին պատգամավորների հարցերից հետո երազում էին մկան ծակը հազար թումանով առնել, կամ էլ այնպիսի անհեթեթություններ էին բարբաջում, որ հարց տվողի կարեկցանքին էին անգամ արժանանում:

Ասենք, Ռուբեն Ռուբինյանը մի այնպիսի շիլաշփոթ սարքեց, որ երեւի թե ինքն էլ չհասկացավ՝ ինչ էր ուզածը, որն էր ասելիքը. «Ադրբեջանը չի կարող ցանկացած պահի մտնել Հայաստանի տարածք, և դա ապացուցվել է մեկ շաբաթ առաջ Գեղարքունիքի մարզում տեղի ունեցածով, երբ մեր Զինված ուժերը փայլուն կերպով դիմակայեցին հարձակմանը: Իսկ ինչ վերաբերում է Սև լճի, Գեղարքունիքի և մյուս հատվածներին, ապա ադրբեջանական զորամիավորումներն այդտեղ գտնվում են ապօրինի և պետք է այնտեղից դուրս գան»:
Համաձայնեք, որ իսկական իշխանականը պետք է այսպես տաղանդավոր լինի, որ կարողանա մի նախադասության մեջ սկզբում մի բան ասի, վերջում՝ ասածը հերքի կամ հակառակը:
Ասի՝ «Ադրբեջանը չի կարող ցանկացած պահի մտնել Հայաստանի տարածք, և դա ապացուցվել է», հետո ասի՝ «ադրբեջանական զորամիավորումները Սև լճի, Գեղարքունիքի և մյուս հատվածներում գտնվում են ապօրինի»:
Ռուբինյանը ըստ էության կրուտիտի ռեկորդ սահմանեց՝ գերազանցելով անգամ Նիկոլ Փաշինյանին, որն այս ոլորտի կքնահայրն է:
«Պատիվ ունեմ» դաշինքի պատգամավոր Տիգրան Աբրահամյանը ԱԺ նախագահի տեղակալի պաշտոնում ՔՊ-ից առաջադրված մեկ այլ թեկնածու Հակոբ Արշակյանին էլ հիշեցրեց Սոթքից Խոզնավար հատվածում ադրբեջանական առաջխաղացման մասին, շեշտեց, որ պատերազմից յոթ ամիս անց 100 կմ-ոց հատվածում անհրաժեշտ դիրքային ենթակառուցվածքներ չենք ունեցել․ «Ձեր թիմակիցներն ասացին, թե դա պայմանավորված էր աշխարհագրական դիրքով, ձմեռային պայմաններով։ Տրամաբանական չէ։ Ծանր հանցագործություն է եղել՝ ՀՀ սուվերեն տարածքի մեծ հատվածներ զավթել են ադրբեջանցիները, սակայն որեւէ մեկը քաղաքական-իրավական պատասխանատվության չի ենթարկվել։ Ձեր դիրքորոշումը»: Հակոբ Արշակյանը պատասխանեց․ «Տպավորություն է, որ ինչքան խնդիր կա՝ իշխող քաղաքական ուժինն է, իսկ հաջողությունների մասին չենք խոսում։ Ես սա չեմ ասում պատասխանատվությունից խուսափելու համար։ ՀՀ պետական սահմանը բոլորիս սահմանն է։ ՀՀ բանակը բոլորի բանակն է։ Եթե որեւէ տեղ որեւէ պատճառով ուշացմամբ է դիրք տեղադրվել, պարզաբանումները տրվել են։ Գնահատվել է նաեւ Ադրբեջանի քաղաքականությունը»։ Արշակյանը հորդորեց նուրբ հարցերի մասին խոսելիս թվեր ու գնահատականներ չհնչեցնել։
Տիգրան Աբրահամյանը հակադարձեց, որ պատասխանատվությունն իշխանությանն է, իսկ Ադրբեջանն առանց հետախուզության՝ առաջխաղացում չէր անի։ Հակոբ Արշակյանն ասաց՝ ավելացնելու բան չունի։ Մենք նույնպես ավելացնելու բան չունենք, քանզի իշխանականները լավագույնս ցուցադրեցին իրենց թշվառությունը, իսկ մնացյալ հոխորտանքները, մեծ-մեծ բրդելը լոկ ինքնապաշտպանական բնազդի հետեւանք են:

Անի Սահակյան