Ելք դաշինքը տրոհման եզրի՞ն

Խորհրդարանական ընտրությունների նախաշեմին ձեւավորված Ելք դաշինքի երեք ուժերի ներկայացուցիչները հայտարարում էին, որ սա հերթական նախընտրական դաշինքը չէ, այն ձեւավորվել է գաղափարների եւ սկզբունքների մասնության հիմքի վրա, հայտարարվում էր անգամ ապագայում մեկ կուսակցություն դառնալու ռեալ հեռանկարի մասին: Ընտրություններից երկու ամիս է անցել, բայց արդեն անհամաձայնությունները, եթե չասենք հակասությունները թաքցնելը անհնար է դառնում: Դաշինքի անդամ, Լուսավոր Հայաստան կուսակցության ղեկավար պատգամավոր Էդմոն Մարուքյանը շուրջ մեկ շաբաթ առաջ հայտարարել է, որ «Սասնա ծռեր» զինված խմբի անդամների գործողություններում քրեական հանցակազմ կա: Պատգամավորը նաև խուսափել է  «քաղբանտարկյալներ» կոչել անցած տարվա հուլիսին ոստիկանության ՊՊԾ գնդի տարածքը գրաված «Սասնա ծռերի» անդամներին: Մարուքյանի հայտարարությանը հետևեց նույն խմբակցության եւ կուսակցության պատգամավոր Գևորգ Գորգիսյանի հարցազրույցը,  նա կրկնեց, որ «Սասնա ծռերի» գործողությունները միանշանակ հանցակազմ են պարունակում։ Հայտարարությունները մեծ աղմուկ բարձրացրեցին սոցիալական ցանցերում եւ Սասնա ծռերի համակիրների շրջանում: Եւ ահա օրեր հետո Ֆեյսբուքի իր  էջում անսպասելի  հայտարարությամբ հանդես է եկել  «ԵԼՔ» խմբակցության ղեկավար, Քաղաքացիական պայմանագիր կուսակցության պատգամավոր Նիկոլ Փաշինյանը, նշելով որ ԵԼՔ խմբակցությունը ՀՀ գլխավոր դատախազին ուղղված գրություն է պատրաստել, որով միջնորդում է Անդրիաս Ղուկասյանին ազատ արձակել կալանքից: Վերջինս եւս ձերբակալված է Սասնա ծռերի ապստամբության գործի շրջանակներում: Ղուկասյանը մեղադրվում է նրանում, որ նա փորձել է մտնել ՊՊԾ գնդի տարածք, գրավել շենքեր-շինություններ, տրանսպորտային միջոցներ, ռազմամթերք կրել, պատանդներ պահել՝ ՀՀ քրեական օրենսգրքի 34-219 3-րդ մասի առաջին կետով, 34-218 3-րդ մասի առաջին կետով եւ 34-235 3-րդ մասով: Նիկոլ Փաշինյանը դեռ նախորդ տարի հայտարարել էր, որ սխալ է իրավիճակը գնահատել քրեական օրենսգրքով։ «Եթե մենք այս իրավիճակը պետք է գնահատենք քրեական օրենսգիրքը բացելով և ցիտելով, սա նշանակում է, որ մենք ճիշտ չենք հասկանում տեղի ունեցողի դրդապատճառները։ Ինձ համար անընդունելի են նաև այն ձևակերպումները, որ «Սասնա ծռեր» խմբի անդամներին փորձ է արվում ներկայացնել ուղղակի ահաբեկիչ», – մասնավորապես ասում էր Փաշինյանը։Եւ այս տեսանկյունից զարմանալու եւ տարակուսելու մեծ առիթ չկա պատգամավորի դիրքորոշման վերաբերյալ: Անհասկանալին այն է, թե ինչպես է նման հայտարարությունը հնչում այն օրերին, երբ Սասնա ծռերն արդեն հասցրել են հայտնի հայտարարությունների համար գրպանային ընդդիմություն հռչակել Ելք դաշինքը՝ եզրահանգելով, որ այն ղեկավարվում է իշխանական շրջանակներից: Չի բացառվում, որ Նիկոլ Փաշինյանը փորձում է սրբագրել թիմակիցների հայտարարությունները եւ քավել նրանց մեղքերը: Բայց սա արդեն ենթադրում է մեկ ուրիշ բան: Նախ հետաքրքիր է իմանալ, երբ Փաշինյանը խոսում է ամբողջ խմբակցության անունից, արդյոք ստորագրողների մեջ են նաեւ Լուսավոր Հայաստանի պատգամավորները: Ակնհայտ է մի բան, որ Ելք-ը կանգնած է փլուզման եզրին, որովհետեւ չկա գաղափարական եւ սկզբունքային միասնություն: Անի Սահակյան