Պողպատե լկտիություն

Պողպատե մանդատ ստացած իշխանության դեմ խաղ չկա, բեսպրեդելը հասել է իր պիկին, ինչ ուզում անում են: Թվում էր, թե պատերազմից հետո վիրավոր, բզկտված Հայաստանում բոլոր միջոցները կմեկտեղվեին պետության կոտրված ողնաշարն ուղղելու համար, հազարավոր վիրավորներ, հաշմանդամներ, անտուններ, զոհվածների սոցիալապես անապահով ընտանիքներ, բայց իշխանության տարբեր օղակները հրմշտոց են սկսել՝ ով առաջինը կբարձրացնի սեփական աշխատավարձը: Մի քանի շաբաթ առաջ պատգամավորների եկամուտը 250 հազարով ավելացնելու փաստը չմարսած, այսօր քաղաքապետարանը հաստատեց քաղաքապետարանի ավելի քան 2 հազար աշխատակիցների աշխատավարձերը բարձրացնելու նախագիծը, որի շուրջ մի քանի օր է մամուլում մեծ աղմուկ է բարձրացել:
Պատերազմի հանգամանքից բացի մարդիկ խոսում են սոցիալական անարդարության մասին, 25 հազար դրամ կենթասոթակ եւ 80 հազար աշխատավարձ ստացող գիտաշխատող ունեցող երկրում նման քայլն անբարոյականություն է:

Համաձայն նախագծի՝ Երեւանի քաղաքապետ Հայկ Մարությանը կստանա ավելի շատ աշխատավարձ, քան վարչապետն է ստանում․ նրա աշխատավարձը 575 հազարից կդառնա 1 մլն 320 հազար դրամ։ Հիշեցնենք, որ վարչապետի աշխատավարձը 1 միլիոն 200 հազար դրամ է։

Քաղաքապետի առաջին տեղակալի աշխատավարձը 478 հազարից կդառնա 1 միլիոն 20 հազար, մյուս 3 տեղակալներինը՝ 443-ից 952 հազար, նույնքան կստանա նաեւ Երեւանի գլխավոր ճարտարապետը։ Մարությանի խորհրդականները, որոնք 7-ն են, ներկայումս ամսական 358 հազար դրամ են ստանում, բարձրացումից հետո 578 կստանան, քաղաքապետի օգնականներինը 298 հազարից կդառնա 544, գործավարինը՝ 261-ից 357։ Քաղաքապետն իր, մամուլի քարտուղարի եւ աշխատակազմի ղեկավարի աշխատավարձը նույն տոկոսային հարաբերակցությամբ է ավելացնում․ աշխատակազմի ղեկավարը 952 հազար դրամ կստանա՝ նախկին 382 հազարի փոխարեն։ 100 տոկոսով կբարձրանան նաեւ վարչության պետերի աշխատավարձերը, վարչական շրջանների ղեկավարներինը՝ մի փոքր ավելի․ 400 հազար դրամից կդառնա 850 հազար, տեղակալներինը՝ 346-ից 510։

Իհարկե, Մարությանը սովորության համաձայն մի քիչ դերասանություն արեց՝ ֆեյսբուքյան իր էջում հայտարարելով՝ թեև օրենքի պահանջն է, որ մյուս աշխատակիցների աշխատավարձի բարձրացման համար ավելացվի նաև քաղաքապետի աշխատավարձը, այդուհանդերձ ինքը կշարունակի ստանալ իր 415 հազար դրամը՝ հրաժարվելով ավելացված գումարից։
Մարությանի կարծքով՝ սա հնարավորություն կտա որակյալ կադրեր ներգրավելու, բայց հեղափոխության արդյունքում հանրային պաշտոն ստանձնած մարդը, ըստ նրա, չպետք է ձգտի սեփական աշխատավարձի բարձրացմանը:
Այստեղ անգամ հավի ծիծաղը կգա, սրանք ոչ միայն որակյալ չեն, այլեւ ընդհանրապես չպետք է տեղ ունենային պետական կառավարման համակարգում եւ ՏԻՄ-երում: Բայց քանի որ սրանք պողպատյա մանդատ են ստացել եւ համայն հայությանը խոստացել, որ կա ապագա, եւ ուրեմն իրակործում են իրենց լոզունգը, այո, Հայաստանում կա ապագա, եւ այդ ապագան իշխանականներինն է:

Անի Սահակյան