Փաշինյանի խոստացած «Ապագան» շատ արագ վրա հասավ

Գիշերը և այսօր առավոտյան մարտական գործողություններ են ծավալվել հայ-ադրբեջանական սահմանի Սոթքից մինչև Վերին Շորժա հատվածում, հայկական կողմից զոհվել է երեք, վիրավորվել՝ երկու զինծառայող, ադրբեջանական կողմն առայժմ հաղորդել է իր երկու վիրավորի մասին: «Իրադրության սրման ամբողջ պատասխանատվությունն ընկնում է Ադրբեջանի ռազմաքաղաքական ղեկավարության վրա», - հայտարարեց Հայաստանի ռազմական գերատեսչությունը:

Ավելի ուշ նախարարությունը հետևյալ հաղորդագրությունը տարածեց. - «Հակառակորդը, Ռուսաստանի Դաշնության մայրաքաղաք Մոսկվայում նախատեսվող բանակցություններից առաջ, նախահարձակ մարտական գործողություններ է սկսել Հայաստանի Հանրապետության սահմանների վրա` Սոթքից մինչև Վերին Շորժա հատվածում։ Ծավալվել են մարտական գործողություններ, ընթանում է ինտենսիվ փոխհրաձգություն: Հակառակորդը փորձում է բարելավել իր հենակետերը` ստեղծելով բարենպաստ պայմաններ առաջխաղացման համար»։ Ավելի ուշ, Հայաստանի ռազմական գերատեսչությունը հաղորդեց, որ ժամը 9:20-ի դրությամբ, ադրբեջանցիները ետ են շպրտվել իրենց ելման դիրքեր՝ տալով կորուստներ, իսկ փոխհրաձգությունը շարունակվում է:

Հայտարարությամբ է հանդես եկել Հայաստանի արտգործնախարարությունը՝ շեշտելով, որ իր տարածքային ամբողջականության դեմ ուժի կիրառմանն ի պատասխան Հայաստանի Հանրապետությունը գործի կդնի միջազգային իրավունքով վերապահված ռազմաքաղաքական ողջ գործիքակազմը. «Խստորեն դատապարտում ենք տարածաշրջանային խաղաղության և անվտանգության դեմ ուղղված ադրբեջանական կողմի ռազմական գործողությունները։ Իրադրության հետագա սրման ամբողջ պատասխանատվությունն ընկնում է Ադրբեջանի ռազմաքաղաքական ղեկավարության վրա»:

Ժամեր անց Հայաստանի պաշտպանության նախարարությունը հայտնեց, որ Ռուսաստանի խաղաղապահ զորքերի հրամանատարության միջնորդությամբ ձեռք է բերվել պայմանավորվածություն հյուսիս-արևելյան ուղղությամբ հայ-ադրբեջանական զորքերի շփման գծում հրադադարի ռեժիմը վերականգնելու վերաբերյալ: «Ադրբեջանական սադրանքի արդյունքում սկսված մարտական գործողությունների ընթացքում երկուստեք կիրառվել են հրաձգային զինատեսակներ և ականանետեր։ Ընդ որում, ՀՀ ԶՈՒ ստորաբաժանումների կողմից ականանետային կրակ է բացվել ի պատասխան հակառակորդի կողմից ականանետերի կիրառման», - ասված է հաղորդագրությունում:

Ավելի ուշ Ադրբեջանի պաշտպանության նախարարությունն, իր հերթին, հաղորդեց, որ Բաքուն ընդունել է հրադադարի՝ ռուսական կողմի առաջարկը, մեղադրել հայկական կողմին հրադադարը չպահպանելու մեջ ու պնդել, որ հայկական կողմը տանկեր ու ականանետեր է կիրառում։

Ստեղծվածն ակնհայտ է, որ հետևանք է այն սպասումների, որոնք արդեն մի քանի ամիս ունեն Թուրքիան ու Ադրբեջանը: Հիմա միակ հարցը, որ մեզ հետաքրքրի, դա հետևյալն է՝ ինչ պայմաններում կարող է հաստատվել խաղաղություն, եթե այն առաջիկայում իսկապես հաստատվի ու լինի երկարատև:

Այսինքն, եթե Փաշինյանը բանավոր խոստացել է հայկական կողմից կոնկրետ զիջումներ՝ Բաքուն հետ չի կանգնելու: Պատահակա՞ն է, որ քանի ժամ է անցել հայ-ադրբեջանական հերթական լարումից, իսկ Փաշինյանը լռություն է պահպանում: Դե իսկ Արմեն Սարգսյանի մասին չեն խոսում. Նրա՝ երկրում լինել, կամ չլինելը որևէ ազդեցություն չի ունենում Հայաստանում իրադարձությունների հետ:

Ընդհանուր առմամբ, հիմա Փաշինյանի բոլոր համակիրներին պետք է հարցնել՝ սա՞ էր ձեր «ապագա կա, կա ապագա»-ն: Մենք համոզեցին, որ այո՛, «կա ապագա», և այն բավական արագ եկավ: Մնում է հասկանալ, թե ինչ պայմաններում կարող է հարաբերական անդորր կնքվելու ու ինչու էին Էրդողանն ու Ալիևն այդքան ցանկանում, որ Հայաստանում շարունակեր իշխանավարել հենց Փաշինյանը: Նրանք հավատում էին Փաշինյանի խոստացած «Ապագային»:

Մետաքսյա Շալունց