Ծաղր պատերազմի ու զոհերի նկատմամբ

Ազգային ժողովի ապագա խոսնակ Ալեն Սիմոնյանը նախօրեին հայտարարեց, որ իշխող ուժն արդեն որոշել է «տարօրինակ պատերազմի» հարցով ստեղծել ԱԺ քննիչ հանձնաժողով, որը պետք է քննի 44-օրյա պատերազմին առնչվող հարցերը։ ՔՊ-ն մտադիր է այդ հանձնաժողովում ներգրավել արտախորհրդարանական ընդդիմությանը․«Փորձենք հասկանալ՝ օրենսդրական ի՞նչ լուծումներ ենք տալիս, որպեսզի արտախորհրդարանական ուժերը ներառված լինեն քննիչ հանձնաժողովում»,-ասաց Ալեն Սիմոնյանը։ Թե որոնք են այդ ուժերը, Սիմոնյանն ասաց, որ դրա հավակնորդներ կարելի է համարել այն ուժերին կամ այն ֆորմատը, որը Նիկոլ Փաշինյանը նախաձեռնել է եւ արդեն մեկ-երկու անգամ հանդիպել է այդ ուժերի հետ։ Ասել է, թե բոլոր նրանք, որոնք ընտրություններից հետո շտապեցին սեղմել Փաշինյանի արնաթաթախ ձեռքը եւ լեգիտիմացնել նրա ընտրությունն ու այսուհետ Հայաստանում կատարվող ցանկացած գործընթաց:

Իշխանությունը լավ գիտեր, որ խորհրդարանական ընդդիմության առաջին քայլը լինելու է նման հանձնաժողովի ձեւավորումը, դրա համար ունեն բավարար ձայներ, այդ պատճառով էլ մեկ քայլ առաջ են ընկել, իսկ թե ինչու են ներգրավվում արտախորհրդարանականներին, դա էլ կարելի է հասկանալ: Իշխանությունը հնարավորինս շատ հանցակիցներ է ներգրավվում, որպեսզի քաղաքական դհոլների աղմուկ-աղաղակով փորձի լռեցնել ճշմարտության ձայնը, սլաքներն ուղղելի դեպի այլ՝ օրինակ բանակի ու ԳՇ նախկին պետի ու ղեկավարների կողմը, որպեսզի Փաշինյանն ու իր հանցակիցները ջրից չոր դուրս գան: Հակառակ պարագայում, եթե իշխանությունը ցանկություն ունենար քննել 44-օրյա պատերազմի հանգամանքներն ու պատճառները, ապա դա կաներ անցած ութ ամիսների ընթացքում՝ իրավապահ կառույցների միջոցով կամ էլ կստեղծեր նման հանձնաժողով, մանավանդ որ ԳՇ նախկին պետ Օնիկ Գասպարյանը նման պահանջով ԱԺ նախագահին էր դիմել:

«Հայաստան» դաշինքի ցուցակով ընտրված պատգամավոր Գեղամ Նազարյանը, որն այս պատերազմում կորցրել է որդուն, ամենադիպուկն էր բնորոշել, որ չի կարող իշխանությունն անաչառ քննություն իրականացնել, դա նույնն է, որ
Թալեաթն ու Էնվերը քննիչ հանձնաժողով կազմեին՝ Հայոց Ցեղասպանությունը քննելու համար: Իսկ ընդհանրապես ՝ ինչպես է իշխանությունը նման հանձնաժողով ստեղծում այս պահին, երբ ըստ էության պատերազմը չի ավարտվել եւ այն Արցախից տեղափոխվել է Հայաստան, մենք չհայտարարված պատերազմի մեջ ենք:
Աթե նման հանձնաժողով ստեղծելու իմաստն այն է, որ Անդրանիկ Քոչարյանը հերթական անգամ իր մտքի գոհարները շաղ տալու, ընդդիմության հաշվին ինքնահաստատվելու հնարավորություն ստանա, ապա պետք է նրան հիասթափեցնել, որ ցավալիորեն ինչպես 44 –օրյա պատերազմը եկավ ու կտրեց նրա երկար լեզուն ու ջրեց ապրիլյան պատերազմի միֆը, այնպես էլ Հայաստանի գլխին կանգնած ներկայիս սպառնալիքներն են ջրելու 44-օրյա պատերազմը:

Անի Սահակյան