Մեզ ընտելացնում են Հայաստանի տարածքում պատերազմին

Ադրբեջանը հայ-ադրբեջանական սահմանի Գեղարքունիքի հատվածում, Երասխի ուղղությամբ լարվածություն է պահպանում: Ադրբեջանի զինուժը թիրախավորում է Գեղարքունիքի հայկական դիրքերը, կրակում են տարբեր տիպի հրաձգային զինատեսակներից։ Նաև Սոթքի հանքավայրի հատվածում է լարված իրավիճակ եղել, երեկ հայտնի դարձավ, որ շուրջ 150 աշխատակիցներ տարհանվել են:

«Ստեղծված լարված իրավիճակի պատճառով ընկերությունը ստիպված էր ժամանակավորապես դադարեցնել հանքավայրի աշխատանքը, և որոշում կայացրեց տարհանել աշխատակիցներին, որպեսզի ապահովվի նրանց անվտանգությունը։ Այդ պահին հերթապահության աշխատում էր հարյուր հիսուն մարդ են, և բոլորը տարհանվել են»։ Հիշեցնենք, որ Սոթքի հանքավայրը 670 աշխատակից ունի։ Պատերազմից հետո, երբ եռակողմ հայտարարությամբ Քարվաճառի շրջանն անցավ Ադրբեջանին, սահմանը գծվեց հենց հանքավայրի միջով:

Ուրբաթ օրն էլ Սոթք-Կութի հատվածում էր փոխհրաձգություն եղել, վիրավորվել էին երեք հայ զինծառայողներից։ Նրանցից ժամկետային զինծառայող Արման Աթասյանի վիճակը գնահատվում էր ծայրահեղ ծանր, նա ձախ երիկամի վիրավորում էր ստացել։

Այսօր առավոտյան ու կեսօրից հետո՝ 15:30-ից սկսած ադրբեջանական զինուժը տարբեր տրամաչափի հրաձգային զինատեսակներից կրակ էր բացել նաև Երասխի ուղղությամբ։
Հուլիսի 23-ին, ժամը 23:00-ի սահմաններում, ՀՀ ԶՈւ ՀՕՊ ստորաբաժանումները, համապատասխան գործողություններով, կասեցրեցին հայ-ադրբեջանական սահմանի հարավ-արևմտյան ուղղությամբ ԱԹՍ-ով ՀՀ օդային տարածք մուտք գործելու փորձը, հայտնեց Հայաստանի պաշտպանության նախարարությունը:

ԵԱՀԿ Մինսկի խմբի համանախագահող պետություններից, մասնավորապես ԼՂ-ում խաղաղապահ առաքելություն իրականացնող Ռուսաստանից, և առհասարակ Հայաստանի գործընկեր, բարեկամական երկրներից Ադրբեջանի այս լկտի պահվածքը դատապարտող հայտարարություններ չեղան:

Առհասարակ, հարց կարող է ծագել՝ բայց ինչ կարելի է ակնկալել արտաքին քաղաքական գերատեսչության աշխատանքից, եթե այդ կառույցը ղեկավար չունի:

Մենք լսեցինք մի քանի ստանդարտ հայտարարություններ Ռուսաստանից, որ անհանգստացած են Հայաստան-Ադրբեջան սահմանային իրավիճակով, և ոչ ավելին:
Հայաստանի հարևաններից թերևս միայն Իրանն է, զգում է ահագնացող վտանգը...
Իրանն օրերս մտահոգություն հայտնեց հայ-ադրբեջանական սահմանի նոր լարվածության կապակցությամբ և կոչ արեց քայլեր ձեռնարկել` տարածաշրջանում տևական խաղաղություն հաստատելու համար: Այդ մասին, ըստ ԻՌՆԱ գործակալության, նշեց Արտգործնախարարության խոսնակ Սայիդ Խաթիբզադեն:

Ցավ հայտնելով, որ վերջին միջադեպերի հետևանքով ադրբեջանական կողմում մեկ զինվոր է զոհվել, հայկական կողմում` երեքը վիրավորվել, Խաթիբզադեն երկու հարևաններին` Հայաստանին ու Ադրբեջանին կոչ է արել զսպվածություն ցուցաբերել և խաղաղ ճանապարհով հարթել սահմանային վեճերը: Թեհրանը նորից կրկնեց իր պատրաստակամությունը. Իրանը պատրաստ է տրամադրել ցանկացած աջակցություն` Հարավային Կովկասում հարատև խաղաղություն հաստատելու համար, ասել էր Արտգործնախարարության խոսնակը:

Իրականում Ադրբեջանը կամաց-կամաց մեզ ընտելացնում է հայ-ադրբեջանական նոր կոնֆլիկտին, սահուն՝ «Ղարաբաղի հարցը լուծված» է արձանագրումից ուղիղ անցում կատարելով դեպի Հայաստանի տարածքի հանդեպ տարածքային պահանջների ներկայացում: Ու քաղաքակիրթ աշխարհը շարունակում է նույն լռությունը, որը դրսևորում էր 44-օրյա պատերազմի ժամանակ հետևյալ հիմնավորմամբ՝ «Դե, Ղարաբաղն Ադրբեջանի տարածք է...»:

Այսպես՝ Հայաստանի մեկ այս հատվածում, մեկ այն հատվածում Ադրբեջանից արձակած կրակոցներով մենք կընտելանանք, կապրենք մեր առօրյայով՝ մինչև հաջորդ ռազմական գործողություններն ու լայնածավալ պատերազմը:

Մետաքսյա Շալունց