Կիսամերկ խրախճանքի թագավորությունում

44-օրյա պատերազմից և ստորացուցիչ կապիտուլյացիոն փաստաթղթի ստորագրումից դեռ մեկ տարին չի անցել, դեռ չեն սպիացել պատերազմի թողած խորը վերքերը՝ կան բազմաթիվ անհետ կորածներ, հազարավոր անտուն արցախցիներ, սգացող մայրեր, հաշմված երիտասարդներ, որոնք պետության ուշադրության ու հոգացության կարիքն ունեն, հայ գերիներին խոշտանգում ու դատում են Ադրբեջանի բանտերում, Ալիևը շարունակաբար հոխորտում է, որ Սևանն ու Երևանը՝ ադրբեջանական են, Սյունիքում, Երասխում, Գեղարքունիքում մարդիկ ապրում են տագնապով, վիրավորվում են թշնամու գնդակից: Հայաստանի սահմանները վտանգված են ամբողջովին, պատերազմի սուրն այլեւս Հայաստանի գլխին է ճոճվում...

Իսկ ի՞նչ են անում այսօրվա իշխանավորները, այո, բառի բուն իմաստով խրախճանքների մեջ են: Կիրակի Նիկոլ Փաշինյանը հայրենի Տավուշում Վարդավառն էր տոնում մարզի ռեստորաններից մեկում՝ անվտանգության հարյուրավոր աշխատակիցների ուղեկցությամբ, Նախորդ օրը իշխանական ողջ կազմը Շիշ բռնող մականունով հայտնի Հայկ Սարգսյանի հարսանիքին էր, իսկ Փաշինյանի Էրատոն՝ Աննա Հակոբյանն ու ավագ դուստրը համացանքը պայթեցրեցին իրենց կիսամերկ լուսանկարներով եւ հոլիվուդյան ժպիտներով, ասես ոչինչ չի եղել եւ սույն տիկինը չի հրահանգավորել 44-օրյա պատերազմի մարտը վարողներին:
Համացանցում հայտնված հարսանեկան կադրերից ու լուրերից ակնհայտ է դառնում, որ Ծառուկյանի որդու հարսանիքը քննադատողները ավելի ճոխ ու այլասերված միջոցառման են մասնակցել, ընդամենը երեք տարվա իշխանության պատգամավորի: Այն տեղի է ունեցել Երեւանի ամենաթանկարժեք ու վերջին շրջանում թրենդային ռեստորանային համալիրներից մեկում` Prime hall-ում։ Մոտ 500 հյուր է մասնակցել՝ կրիմինալ աշխարհից մինչեւ քաղաքական, այդ թվում Նիկոլ Փաշինյանը՝ իր ընտանիքով, ում անվտանգության համարը հարսանեկան սրահ մուտքն անձնագրերով են կազմակերպել: Հենց այդ արարողությունից էր Աննա Հակոբյանը նկարներ դրել եւ գրել, որ երկարատեւ ընդմիջումից հետո ուրախալի առիթի են մասնակցում։ Սարգսյանի ընտրյալը հայտնի Հայրապետյան եղբայրներից մեկի թոռնուհին է` Օլյա Հայրապետյանը։ Խելահեղ ծախսերի մասին են խոսում, որ օրինակ հարսանեկան տորթը 10 հազար դոլար է արժեցել, 20-25 հազար դոլար էլ տվել են խնջույքի երգիչներին: Մի խոսքով՝ տիպիկ օլիգարխիկ հարսանիք: Չենք հարցնում, թե որտեղից Հայկ Սարգսյանին նման կարողություն՝ լինելով շարքային պատգամավոր, քանզի Հայաստանը փոքր երկիր է եւ բոլորին է հայտնի, թե ինչ միջոցներով է նա այս ամենին հասել: Սակայն մի հարց անձամբ Փաշինյանին եւ իր Էռատոյին չենք կարող չտալ՝Հայաստանում ամեն բան ադքան լավ է, որ կարողանում եք քեֆ ուրախություն անե՞լ։ Իսկ գուցե օրինակ եք ծառայում ժողովրդին, թե ինչպես պետք է թքած ունենալ սգացող ծնողի, անդամալույծ հերոսի խեղված ճակատագրի, անտուն մարդկանց վրա՝ սեփական ազդրերի հետ ի ցույց դնելով հանրությանը՝ ձեր ուրախությունը:

Անի Սահակյան