Արտախորհրդարանական ուժերը կաջակցեն, որ Նիկոլ Փաշինյանը կատարի Ալիևին տված խոստումները

Վարչապետի պաշտոնակատար Նիկոլ Փաշինյանը մասնակցել է արտախորհրդարանական քաղաքական ուժերի հետ համագործակցության խորհրդակցական ժողովի առաջին նիստին:

Նիստին մասնակցել են «Հանրապետություն» կուսակցության նախագահ Արամ Սարգսյանը, «Ազատական կուսակցության» առաջնորդ Սամվել Բաբայանը, «Ալյանս» առաջադիմական ցենտրիստական կուսակցության առաջնորդ Տիգրան Ուրիխանյանը, «Արդար Հայաստան» կուսակցության ղեկավար Նորայր Նորիկյանը, «Ինքնիշխան Հայաստան» կուսակցության ղեկավար Դավիթ Սանասարյանը, Հայաստանի եվրոպական կուսակցության ղեկավար Տիգրան Խզմալյանը, Հայաստանի Քրիստոնեա-դեմոկրատական կուսակցության նախագահ Լևոն Շիրինյանը, «Միասնական հայրենիք» կուսակցության նախագահ Մհեր Տերտերյանը, Պահպանողական կուսակցության ղեկավար Միքայել Հայրապետյանը, Սոցիալ Դեմոկրատ Հնչակյան կուսակցության Հայաստանի վարչության ատենապետ Սեդրակ Աճեմյանը: Ինչպես երևում է կառավարության պաշոտոնական հաղորդագրությունից, Փաշինյանի հետ հանդիպմանը ներկա չեն եղել «Լուսավոր Հայաստան» կուսակցության նախագահ Էդմոն Մարուքյանն ու ԲՀԿ ղեկավար Գագիկ Ծառուկյանը։

Նիկոլ Փաշինյանը ողջունել է ժողովի մասնակիցներին ու մաղթել հաջող ու արդյունավետ քննարկումներ և առաջարկել է ընդունել արտախորհրդարանական նորաստեղծ կառույցի աշխատակարգը: Նշվում է, որ վարչապետի պաշտոնակատար Նիկոլ Փաշինյանի և արտախորհրդարանական քաղաքական ուժերի ղեկավարների մասնակցությամբ հաջորդ նիստը տեղի կունենա առաջիկայում: Ի՞նչ է ակնկալում արտախորհրդարանական ուժերից Նիկել Փաշինյանը, այդ ինչ խնդիրներ կան, որոնց շուրջ խորհրդարանական ուժերի հետ քննարկումները չեն բավարարում Փաշինյանին։

Պարզվում է՝ առաջին նիստին քննարկվել է Հայաստանի արտաքին քաղաքականության, Արցախի, Սահմանադրական բարեփոխումների անհրաժեշտության հարցը:
https://www.aravot.am/-ի ե հետ զրույցում Հայաստանի Քրիստոնյա-դեմոկրատական կուսակցության նախագահ Լևոն Շիրինյանը նշել է, որ տարբեր կարծիքներ և տեսակետներ են հնչել, որոնք կարող են օգտակար լինել պետությանը։ Թե որ հարցերում և ինչպես, թերևս կերևա ավելի ուշ, երբ այս նոր կառույցն սկսի աշխատել։ Սակայն ֆունկցիոնալ առումով, բացի հրապարակային հայտարարություններից ու խորհրդատվական մոտեցումներ ձևավորելուց, այս նոր մարմինը որևէ այլ գործառույթ չի կարող իրականացնել։

 Հենց այստեղ էլ թաքնված է շան գլուխը։ Հայաստանը կանգնած է տարածքային նոր զիջումների շեմին․ Նիկոլ Փաշինյանը հրապարակավ հաստատել է, որ պատրաստվում է նոր թուղթ ստորագրել՝ սահմանների ճանաչման և հստակեցման վերաբերյալ։ Այս հարցում խորհրդարանական ոչ իշխանական քաղաքական ուժերի հետ կոնսոլիդացիան ի սկզբանե բացառվում է։ Փաշինյանը հրաշալի հասկանում է, որ Հայաստանի սահմանների ճանաչման քաղաքական պատասխանատվությունը մնալու է բացառապես իր և ՔՊ-ականների վրա։ Արտախորհրդարանական ուժերի խորհուրդը կարող է մասնակիորեն իր վրա վերցնել քաղաքական այդ պատասխանատվությունը՝ հրապարակային տարատեսակ հայտարարություններով Փաշինյանի քայլերին հայտնելով աջակցություն։ Իրավական առումով, իհարկե, որևէ բան չի փոխվի․ սահմաններին առնչվող փաստաթղթերը պարտադիր կարգով պետք է վավերացվեն ՀՀ ԱԺ-ում և ՀՀ Սահմանադրական դատարանում։ Բայց հանրային տրամադրությունների վրա ազդելու տեսանկյունից արտախորհրդարանական ուժերը կարող են խոշոր ներդրում ունենալ Նիկոլ Փաշինյանի՝ Ալիևին տված խոստումները մինչև վերջ ի կատար ածելու գործընթացում։

Հայկ Դավթյան