Դավադիր նոր պլան. Բաքուն քարտեր է բացում, Մոսկվան լուռ՝ համաձայն է

Լեռնային Ղարաբաղի հարցում Բաքվի և Մոսկվայի դիրքորոշումները համընկնում են, Ադրբեջանն ու Մոսկվան Ղարաբաղյան հակամարտությունն ավարտված են համարում, սա Ադրբեջանի նախագահ Իլհամ Ալիևի խոսքերն են, որոնք նա ասել է AzTV պետական հեռուստաալիքին տված հարցազրույցում՝ խոսելով Ռուսաստանի նախագահ Վլադիմիր Պուտինի հետ հուլիսի 20-ին ունեցած հանդիպման մասին:

«Մենք քննարկեցինք տարածաշրջանում հետպատերազմական իրավիճակը, այդ թվում` Զանգեզուրի միջանցքը և հետպատերազմական շրջանը: Մենք մոտեցումների հարցում տարաձայնություններ չունենք»,- ասել է Ալիևը: Նրա խոսքով՝ Ռուսաստանն ու Ադրբեջանը միասնական կարծիք ունեն, որ «պատերազմը վերջացել է, հակամարտությունն ավարտվել է»: Հետևաբար, նա նշել է, որ անթույլատրելի» է Հայաստանի «ռևանշիզմը»: «Ինչ վերաբերում է Զանգեզուրի միջանցքին, ապա ես տեղեկացրել եմ պարոն Պուտինին, որ Հայաստանն այդ հարցում կրկին անկեղծ չէ: Ես պարոն Շառլ Միշելի հետ մամուլի ասուլիսում ասացի, որ տարածաշրջանում բոլոր հաղորդակցությունները պետք է բացեն միաժամանակ, և չպետք է կիրառվի ընտրողական մոտեցում: Բայց մենք տեսնում ենք, որ Հայաստանն այստեղ հերթական անգամ ցանկանում է ինչ-որ խաղ տանել»,- ասել է Ալիևը: Նրա խոսքով՝ Զանգեզուրի միջանցքը պետք է բացվի, ինչպես որ նախատեսված է նոյեմբերի 9-ի համաձայնագրով: Այնուամենայնիվ, ըստ Ալիևի, Հայաստանը հունիսից փաստացի դադարեցրել է եռակողմ աշխատանքային խմբի աշխատանքները:

Նախ, արձանագրենք, որ երեկվանից Ալիևի նշյալ խոսքերը Մոսկվան չի հերքել, հետևաբար՝ լռությունը համաձայնության նշան է: Այսինքն, Կրեմլից, ՌԴ ԱԳՆ-ից Ալիևի խոսքերը չհերքեցին, ուրեմն, այն ինչ ասում է Ալիևը, դա ճշմարտություն է:

Նախ՝ Լեռնային Ղարաբաղի հարցում Բաքվի և Մոսկվայի դիրքորոշումները համընկնում են, Ադրբեջանն ու Մոսկվան Ղարաբաղյան հակամարտությունն ավարտված են համարում: Հաջորդ ամենակարևորը՝ Զանգեզուրի միջանցքի հարցում՝ Մոսկվան ու Բաքուն մոտեցումների հարցում այստեղ էլ տարաձայնություններ չունեն:

Իսկ ի՞նչ էր ասում մոտավորապես 10 օր առաջ ՀՀ փոխվարչապետ Մհեր Գրիգորյանը «Հրապարակ» օրաթերթին տված հարցազրույցում նա վստահեցրեց, թե՝ «Միջանցքային տրամաբանության հարց ես երբևէ չեմ քննարկել, չեմ քննարկում և չեմ էլ քննարկելու, դա ուղղակի բացառված է, և էդ կոնտեքստում որևէ բան մեկնաբանելու կարիք և անհրաժեշտություն չեմ տեսնում, որովհետև չի լինելու նման բան։ Դա հնարավոր չէ ուղղակի, դա բացառված է։ Եվ, անկախ նրանից, թե ով է ուրախանում, ով է տխրում, միևնույն է՝ չի լինելու»։

Հիմա Մոսկվան ու Բաքուն նույն պատկերացումն ունեն, իսկ ո՞րն է Բաքվի դիրքորոշումը, սա է՝ «Զանգեզուրի միջանցքը պետք է բացվի, ինչպես որ նախատեսված է նոյեմբերի 9-ի համաձայնագրով»:

Նիկոլ Փաշինյան, Մհեր Գրիգորյան, նոյեմբերի 9-ի համաձայնագրով նախատեսված էլ ինչ համաձայնություններ կան, որոնց հայ ժողովուրդը ծանոթ չէ, լուսավորեք, հրապարակեք: Եթե չկա «միջանցքային տրամաբանություն», ուրեմն, նոյեմբերի 9-ի ու հունվարի 11-ի փաստաթղթերի վերաբերյալ դուք և Ադրբեջանը տարբեր պատկերացումներ ունեք: Հիմա «միջանցք» տալո՞ւ, թե՞ ոչ...

Թե՞ հիմա էլ նոր դավադրություն է նախապատրաստվում՝ սահմանային լարվածության տարբեր օջախներում՝ Երասխ, Գեղարքունիք, Սյունիք, իսկ վերջում պատերազմի վտանգը չեզոքացնելու համար, այնուամենայնիվ, ստիպված ենք լինելու Ալիևին զիջել՝ «Զանգեզուրի միջանցքը»... Սա՞ է ձեր պլանը...

Մետաքսյա Շալունց