Քննչական կոմիտեն ընդդեմ ՊՆ-ի․ի՞նչ գործողություն է կատարում Ադրբեջանը Հայաստանի սահմանին

Ադրբեջանն ըստ էության անցնում է իր «պատմական» ծրագրի իրագործման երկրորդ փուլին, որը առայժմ արտահայտվում է սահմանային ամենօրյա լարվածությամբ, կրակոցներով ու զոհերով։

Երեկ՝ կեսգիշերին, տեղեկություններ տարածվեցին, թե հայկական հակաօդային ուժերը ՀՀ տարածքում ադրբեջանական անօդաչու են խոցել։ Առավոտյան ՀՀ ՊՆ-ն պաշտոնապես հաստատեց այդ տեղեկատվությունը։ «Հուլիսի 23-ին, ժամը 23:00-ի սահմաններում, ՀՀ ԶՈւ ՀՕՊ ստորաբաժանումները, համապատասխան գործողություններով, կասեցրել են հայ-ադրբեջանական սահմանի հարավարևմտյան ուղղությամբ ԱԹՍ-ով ՀՀ օդային տարածք մուտք գործելու փորձը: Այս մասին հայտնում են ՀՀ ՊՆ-ից։ Հուլիսի 24-ի գիշերը և առավոտյան 09:00-ի դրությամբ իրադրությունը հայ-ադրբեջանական սահմանին, բոլոր ուղղություններով, հարաբերականորեն կայուն է»,- նշված է ՀՀ ՊՆ պաշտոնական հաղորդագրության մեջ:

Խոցելու մասին խոսք չկա։ Ըստ էության համապատասխան գործողություններով կասեցումը հենց խոցումն է։ Մինչ այդ ՊՆ-ն տեղեկացրել էր, որ հուլիսի 23-ին՝ ժամը 17։00-ի սահմաններում, Ադրբեջանի զինված ուժերը կրակ են բացել հայ-ադրբեջանական սահմանի Գեղարքունիքի հատվածում տեղակայված հայկական դիրքերի ուղղությամբ։
Ինտենսիվ փոխհրաձգության հետևանքով հրազենային թեթև վիրավորում է ստացել ՀՀ ԶՈՒ 3 զինծառայող։ Նրանց կյանքին վտանգ չի սպառնում։ «Դրան նախորդել են կրակահերթեր հենց իրենց՝ ադրբեջանական մարտական հենակետերում, ինչը կարող է պայմանավորված լինել ադրբեջանցի զինվորականների միջև տեղի ունեցած՝ միջանձնային բնույթ կրող միջադեպով։ Դրա մասին է խոսում նաև փաստը, որ Ադրբեջանի պաշտպանության նախարարությունն իր հաղորդագրության մեջ նշում է, թե հայկական կողմի բացած կրակից հետո ադրբեջանցի զինվորական է զոհվել։ ՀՀ պաշտպանության նախարարությունը հայտարարում է, որ հակազդող գործողությունների չի դիմել մինչև այն պահը, երբ Ադրբեջանի զինված ուժերը կրակ են բացել հայ դիրքապահների ուղղությամբ։ Հայաստանի պաշտպանության նախարարությունը խստիվ դատապարտում է Ադրբեջանի զինված ուժերի հերթական սադրանքը։ Իրադրության սրման ողջ պատասխանատվությունն ընկնում է Ադրբեջանի ռազմաքաղաքական ղեկավարության վրա»,- նշվում է ՀՀ ՊՆ տարածած հաղորդագրությունում։
Արդեն հուլիսի 24-ին ՀՀ Քննչական կոմիտեն նոր մանրամասներ է հաղորդել փոխհրաձգության մասին։ Պարզվում է՝ վիրավորներից մեկի վիճակը ծայրահեղ ծանր է։

«2021 թ. հուլիսի 23-ին՝ ժամը 17:00-ի սահմաններում, Գեղարքունիքի մարզի Կութ համայնքի վարչական տարածքում տեղակայված ՀՀ ՊՆ N զորամասի պահպանության տակ գտնվող մարտական հենակետում հերթապահություն իրականացնելիս, հակառակորդի հետ փոխհրաձգության հետևանքով, հրազենային մարմնական վնասվածքներ են ստացել պարտադիր ժամկետային զինծառայող Արման Գուրգենի Աթասյանը, պայմանագրային զինծառայողներ՝ Լեռնիկ Հենրիկի Նավոյանը և Յուրիկ Աշոտի Օհանյանը: Վերջիններս տեղափոխվել են Գեղարքունիքի կայազորային հոսպիտալ, որտեղ Ա. Աթասյանի վիճակը գնահատվել է ծայրահեղ ծանր:
Դեպքի առթիվ ՀՀ քննչական կոմիտեի զինվորական քննչական գլխավոր վարչության հինգերորդ կայազորային քննչական բաժնում հարուցվել է քրեական գործ՝ ՀՀ քրեական օրենսգրքի 34-104-րդ հոդվածի 2-րդ մասի 1-ին, 2-րդ, 7-րդ և 13-րդ կետերով: Քրեական գործով նախաքննությունը շարոնակվում է»,- նշված քննչականի պաշտոնական հաղորդագրության մեջ։

ՊՆ-ի և Քննչական կոմիտեի պաշտոնական հաղորդագրություններում առկա հակասությունը խիստ վտանգավոր է։ Ըստ ՊՆ-ի՝ վիրավորների կյանքին վտանգ չի սպառնում, ինչը նշանակում է, որ նրանք պետք է ստացած լինեին թերթև վիրավորում։ Իսկ այդ դեպքում վիրավոր զինծառայողի վիճակը չէր կարող գնահատվել ծայրահեղ ծանր։ Այս դիպվածը նշանակում է, որ ՀՀ ՊՆ-ն շարունակում է առաջնորդվել իրականությունը կոծկելու և հասարակությանը մոլորության մեջ պահելու կեղծ, մանիպուլյատիվ հնարքներով։ Սա նաև ցույց է տալիս, որ Արցախը հանուն խաղաղության զիջելու թեզը կեղծ խաղաղասիրական կատեգորիա է։ Փոխարենը օր օրի ապացուցվում է Արցախից հետո Հայաստանը հանձնելու թեզի ճշմարտացիությունը։ Նիկոլ Փաշինյանին տրված պողպատյա մանդատը ծառայելու է բացառապես այդ պատմական նպատակի իրագործմանը։

Հայկ Դավթյան