Ադրբեջանական գազ՝ Եվրոպային. Ալիևը ցույց է տվել «կոնֆետը»

Վրաստանի ծովափնյա Բաթումի քաղաքում միջազգային համաժողով է անցկացվելու, որին մասնակցելու են Եվրոպական խորհրդի նախագահ Շառլ Միշելը, Ուկրաինայի նախագահ Վլադիմիր Զելենսկին, Մոլդովայի նախագահ Մայա Սանդուն և հյուրընկալ երկրի՝ Վրաստանի նախագահ Սալոմե Զուրաբիշվիլին։ Ակնկալվում է, որ Բրյուսելի հետ ասոցացման համաձայնագիրը ստորագրած Եվրամիության Արևելյան գործընկերությունում ընդգրկված երկրներից այդ եռյակը՝ Ուկրաինան, Մոլդովան և Վրաստանը, առաջ կմղեն ԵՄ-ի հետ համագործակցության մակարդակը բարձրացնելու հարցերը։

Եվրոպական խորհրդի նախագահը Վրաստան ժամանեց Ադրբեջանից։ Շառլ Միշելը տարածաշրջանային այց է կատարում հարավկովկասյան երկրներ՝ նախ այցելելով Հայաստան, հետո՝ Ադրբեջան, հիմա Վրաստանում է։

Բաքվում այցի ավարտին նա մամուլի համատեղ ասուլիս տվեց Ադրբեջանի նախագահ Իլհամ Ալիևի հետ։ Այդ ասուլիսում, ինչպես և Երևանում, անդրադարձ է կատարվել Լեռնային Ղարաբաղի խնդրին:

Եվրամիությունը պատրաստ է դրական դերակատարություն ունենալ Ադրբեջանի և Հայաստանի միջև խաղաղություն հաստատելու համար, Բաքվում հայտարարել է Շառլ Միշելը։ «Մենք պետք է մտածենք, թե ինչ է պետք անել խաղաղության և առաջընթացի հասնելու համար, ինչ տարրեր է անհրաժեշտ հաշվի առնել տարածաշրջանում կայունություն և անվտանգություն ապահովելու համար։ Ես հնարավորություն ունեցա այդ հարցը քննարկելու Ադրբեջանի նախագահի հետ։ Ես դիմել եմ և՛ Հայաստանի վարչապետին, և՛ Ադրբեջանի նախագահին և նշել, որ Եվրամիությունը պատրաստ է դրական դերակատարություն ունենալ այդ հարցում», - ասել է Եվրոպական խորհրդի նախագահը։

Ընդգծելով, որ Եվրամիությունն աջակցում է ԵԱՀԿ-ի միջնորդական առաքելությանը, Շառլ Միշելը միաժամանակ ասել է. - «Բայց դա Եվրամիությանը չի խանգարում կիսվել իր փորձով, աջակցություն ցուցաբերել անվտանգության և կայունության ձեռքբերմանը, և որ ավելի կարևոր է՝ տարածաշրջանի խաղաղությանը, առաջարկել որոշ գաղափարներ խաղաղության գործընթացի փոխադարձ առաջընթացի համար»։ Ի դեպ, համատեղ ասուլիսում Իլհամ Ալիևն ասել է, որ ադրբեջանական գազի մատակարարումները Եվրոպա կավելանան։

Շառլ Միշելի այցը, իրականում, ոչ միայն ստուգողական է, այլև՝ կոնկրետ Բրյուսելի սպասելիքների առումով: ԵՄ-ն չի ցանկանում անմասն մնալ, եթե տարածաշրջանային հաղորդակցության ուղիները բացվեն: Հաջողության «դափնիները» ԵՄ-ն էլ կցանկանար կիսեր, չէ որ Ֆրանսիան, որպես ԵՄ պետություն, ներգրաված է ԵԱՀԿ Մինսկի խմբում, հետևաբար Բրյուսելն էլ իր կոնկրետ շահերն ու սպասելիքներն ունի հակամարտության լուծումից:

Ամեն դեպքում, հատկանշական էր, որ Շառլ Միշելի այցի օրերին՝ սրվեց իրավիճակը հայ-ադրբեջանական սահմանին: Սա հստակ ազդակ էր Ադրբեջանի կատարմամբ, որ ԵՄ-ի մուտքը այս տարածաշրջան այդքան էլ ցանկալի չէ:

Ընդ որում, դա ոչ միայն Անկարայի, այլև Մոսկվայի համոզումն է: Այնպես որ, որ Շառլ Միշելի այցի արդյունքների մասին դեռ վաղ է խոսել:

Մետաքսյա Շալունց