Թուրքերը մեր բարեկամներն են. ինչու է Արմեն Գրիգորյանը գործուղվել ԱԳՆ

Մայիսի կեսերից թափուր մնացած ԱԳ նախարարի պաշտոնում առաջիկայում կնշանակվի Անվտանգության խորհրդի նախկին քարտուղար Արմեն Գրիգորյանը: Նախօրեին հայտնի դարձավ, որ Նիկոլ Փաշինյանի որոշմամբ՝ Արմեն Գրիգորյանն ազատվել է Անվտանգության խորհրդի քարտուղարի պաշտոնից և մեկ այլ որոշմամբ նշանակվել Արտաքին գործերի նախարարի առաջին տեղակալ։ Մինչ ՍԴ որոշումը և ՀՀ Կառավարության ձևավորումը Արմեն Գրիգորյանը կպաշտոնավարի որպես ՀՀ ԱԳ փոխնախարար, որից հետո կնշանակվի նախարար:

Մամուլում մի շարք թեկնածուների անուններ էին շրջանառվում նախարարի պաշտոնի համար, բայց ինչպես տեսնում ենք քչերն են համաձայնում պատասխանատվություն ստանձնել այն խայտառակ ու վտանգավոր իրադարձություններին, որոնք սպասվում են մեզ մոտ աագայում՝ սկսած Արցախի կարգավիճակից, Ադրբեջանի տարածքային ամբողջականությունը ճանաչելուց, վերջացրած անկլավների հանձնում: Եւ Նիկոլ Փաշինյանին այլ ելք չի մնացել, քան սեփական ուսապարկերից մեկին կարգել այս կարեւոր պաշտոնում:
Սակայն Գրիգորյանի թեկնածությունը թերեւս ամենաանհաջողն է եւ վտանգավորը պետության շահի տեսանկյունից՝ հաշվի առնելով իր ակնհայտ արևմտամետ և հակառուսական հայացքները, որոնք դրսեւորվել են մինչեւ հեղափոխությունը: ԱԽ քարտուղար աշխատելու առաջին փուլում որոշ տեղեկություններով ռուսները նույնիսկ կոնտակտի մեջ չեն մտել նրա հետ: Իհարկե, վերջին շրջանում որոշակի հրապարակային ռեւերանսներ արեց Ռուսաստանի նկատմամբ, սակայն դրան զուգահեռ անշեղորեն տարավ նաեւ Թուրքիայի հետ հարաբերություններ հաստատելու, բարիդրացիություն անելու արեմտյան իր տերերի գիծը:

Հարկ է հիշեցնել Արմեն Գրիգորյանի՝ պատերազմից հետո տված աղմկահարույց հայտարարությունը, թե պետք է վերանայել Թուրքիայի նկատմամբ Երևանի մոտեցումներում։ Նիկոլ Փաշինյանը ԱԳ նախարարի պաշտոնում Արմեն Գրիգորյանին թերեւս նշանակելու է հենց այս առաքելությամբ, որպեսզի վերանայվեն հայ-թուրքական հարաբերություններն ու ընկալումները եւ ինչպես Նիկոլ Փաշինյանն էր լրացրել Գրիգորյանի միտքը հայերս մեր դարավոր հարեւաններին չընդունենք իբրեւ թշնամիներ:
Իսկ այս ամենը միանշանակ ավելու է Ռուսաստանի՝ տարածաշրջանում դերի նվազեցման հաշվին, ինչը կարող է նոր աղետի առջեւ կանգնեցնել Հայաստանը:

Անի Սահակյան