Նիկոլ Փաշինյանի ֆոկուսով հրաժարականը
ՍԴ դատավոր Վահե Գրիգորյանը արդարադատության նախկին նախարար Դավիթ Հարությունյանին հարց է ուղղել, թե ինչու է «Պատիվ ունեմ» դաշինքը կարծում, որ Նիկոլ Փաշինյանը հրաժարականից հետո պետք է լքեր իր պաշտոնը և իրավունք չուներ պաշտոնակատար մնալ։
«Երբ խնդրին նայում են ՍԴ դատավորի տեսանկյունից, երբ խոսքը վերաբերում է բարձրագույն գործադիր պաշտոնյայի պաշտոնավարման շարունակականության հարցին՝ մենք գործ չունենք սովորական մի պաշտոնյայի հետ, մենք գործ ունենք մի պաշտոնյայի հետ, որի այդ պաշտոնում հայտնվելը ժողովրդավարական գործընթացի արդյունք է։ Մեծ հաշվով՝ Ազգային ժողովի ընտրությունները վերջնարդյունքում հանգեցնում են ԱԺ ձևավորման և գործադիր իշխանության ձևավորման։ Ընդ որում, այդ գործընթացում ԱԺ-ն վարչապետի նշանակման կամ ընտրության հարցում որևէ դերակատարություն չունի։ Փաստացի ստացվում է, որ ընդամենը տեխնիկական միջնորդությամբ ժողովուրդն է ընտրում վարչապետին»,-իր հարցը այս կերպ է հիմնավորել Վահե Գրիգորյանը։
Ի պատասխան՝ արդարադատության նախկին նախարար Դավիթ Հարությունյանը նշաել է, որ Վարչապետի նշանակումը իշխող կուսակցության կողմից, նախատեսված է Սահմանադրությամբ և դա բնորոշ է խորհրդարանական կառավարման մոդելին: Վարչապետի հրաժարականի դեպքում խաղի մեջ է մտնում Ազգային ժողովը, որին վերապահված է նոր վարչապետի ընտրության գործառույթ: Կառավարությաննհրաժարականից հետո նախարարները մնում են պաշտոնակատարներ են, բայց՝ ոչ վարչապետը, քանի որ Սահմանադրությունը հստակ սահմանել է պաշտոնանկության ինստիտուտի էությունը:
«Հրաժարական տալ ու հրաժարական տված համարվելը երկու տարբեր բաներ են: Ոչ մի Սահմանադրություն չէր ենթադրում, որ իրավունքը կարելի է խեղաթյուրել իր շահերից ելնելով: Չի սահմանվում, որ մարդը կարող է մանիպուլացիա անել՝ հրաժարական տալ, «չընտրվել», հանդիպել կուսակցությունների հետ և այլն: Վարչապետը հրաժարական է տալիս, եթե երկիրը վիթխարի կորուստներ է կրում: Կամ երկրում իրադարձություններ են տեղի ունենում, որոնք վկայում են այն մասին, որ այդ անձն այլեւս չի կարող ղեկավարել գործադիր իշխանությունը: Հրաժարական նշանակում է հրաժարում պաշտոնից: Բայց «հրաժարվել եմ, բայց ամբողջությամբ չեմ հրաժարվել և մնում եմ պաշտոնակատար» սկզբունքը հակասահմանադրական է»,- հայտարարել է Դավիթ Հարությունյանը՝ շեշտելով, որ դաշինքը պաշտպանում է օրենքի տրամաբանությունը։ Իսկ այն ինչ արեց Նիկոլ Փաշինյանը «ֆոկուսներով` հրաժարական էր »։
«Հակառակ դեպքում, նույն հաջողությամբ կարել է ասել, որ եթե վարչապետը ստանում է այլ երկրի քաղաքացիություն, ինչու՞ չշարունակել մնալ իր պաշտոնում: Ի վերջո, նա ժողովրդի ընտրյալն է»,- նշել է Դավիթ Հարությունյանը::
Նա համոզմունք է հայտնել, որ վարչապետի հրաժարականն էապես տարբերվում է կաբինետի հրաժարականից: Այլ երկրների օրինակը ևս այս մասին է հուշում: Երբ վարչապետը հրաժարական է տալիս, նա լքում է իր պաշտոնը: Գոյություն ունի փոխվարչապետերի սահմանադրական ինստիտուտը, որը մասամբ նաև նրա համար է ստեղծվել, որ Վարչապետի հրաժարականի դեպքում մինչև նոր ընտրություն, նրան փոխարինի փոխվարչապետը։
Նրա խոսքով՝ այն ամենը, ինչ տեղի ունեցավ մեր երկրում, տեղի ունեցավ այն պատճառով, որ վարչապետը փորձեց հրաժարականի գործիքն օգտագործել այլ նպատակների համար: Ազգային ժողովում պետք է տեղի ունենային վարչապետի ընտրություններ: Միայն փակուղային իրավիճակում, եթե ընտրության տարբերակ չկա, սկսվում է երկրորդ գործընթացը՝ համընդհանուր ընտրությունները: Այդ առումով, մենք ըստ էության գործ ունեինք արհեստական երեւույթի հետ:
Նշենք, որ հունիսի 20-ի ԱԺ ընտրությունների արդյունքները վիճարկում են «Հայաստան», «Պատիվ ունեմ», «Զարթոնք» և «Հայոց Հայրենիք» կուսակցությունները: Նրանց դիմումները ՍԴ-ում քննարկվում են մեկ միավորված գործի շրջանակներում: ՍԴ-ն հունիսի 14-ին կհրապարակի եզրակացությունը։
Հայկ Դավթյան
Հետևեք մեզ Viber-ում
