Շտապ. ազգի տականքը զինաթափում է հային թուրքի դիմաց

Նիկոլ Փաշինյանը ըստ ամենայնի որոշել է արագընթաց տեմպերով կյանքի կոչել Սյունիքը Հայաստանից կտրելու իր խոստումը, որը նա տվել է Ադրբեջանին: Այս շրջանակներում է, որ ընտրություններից հետո իշխանությունը գործի է դրել ուժային լծակները եւ բառի բուն իմաստով քաղաքական վենդետա է իրականացնում իշխանությունների դեմ դուրս եկած, ոչ վաղ անցյալում Փաշինյանի հրաժարականը պահանջող սյունեցի համայնքապետերի նկատմամբ: Ինչպես հայտնի է կալանավորվել է Քարահունջի վարչական շրջանի ղեկավարը, Գորիսի համայնքապետի վրա մի քանի գործ են կարել, նրան բերման ենթարկեցին, ապա ազատ արձակեցին, բայց չկա երաշխիք, որ վաղը նրան էլ չեն ձերբակալի: Խուզարկություն են իրականացրել Քաջարանի համայնապետի տունը, իսկ երեկ ձերբակալվել է Գորիս համայնքի Որոտան վարչական տարածքի ղեկավար Սուրեն Օհանջանյանը: Մինչ այդ իրավապահները խուզարկություն են իրականացրել Սուրեն Օհանջանյանի տանը: Նա Tert.am-ի հետ զրույցում նշել էր, որ իրավապահները իր տանը փնտրում էին ընտրություններին առնչվող փաստաթղթեր, իբրև թե կաշառքի հետ կապված:
«Ոչինչ չեն գտել, չեն էլ գտնելու, ինչ ուզում են թող անեն, ամբողջ համայնքը գիտի, որ ես նման բաների մեջ թաթախված չեմ: Իսկ ինչ վերաբերում է սոցիալական աջակցությանը, ապա ժողովուրդը միշտ դիմել է և համայնքապետի որոշումով տրամադրվել է, սա ոչ՛ մի տարվա, ո՛չ 3 տարվա բան չէ, միշտ էլ սոցիալական տարբեր հարցերով դիմել են, օրենքով սահմանված կարգով աջակցություն ստացել եմ»,-ասել էր նա։
Հիշեցնենք, որ նոյեմբերի 9-ին Փաշինյանի կողմից ստորագրված եռակողմ հայտարարության արդյունքում Որոտան համայնքի մի մասն անցավ ադրբեջանցիներին Անցած ութ ամիսներին այս համայնքի բնակիչների կյանքը գլխիվայր շուռ է եկել, նրանց համար գիշերն ու ցերեկը մեկ են եղել, վախները սրտում, աչքները բաց լուսացնում են՝ ամեն պահի սպասելով, որ մի քանի մետր հեռավորության վրա գտնվող թշնամին կներխուժի իրենց տներ: Այստեղ նաեւ միջադեպեր են գրանցվել, որոտանցիների եւ ադրբեջանցի զինվորների միջեւ գծած սահմանը անասունների կողմից հատելու հարցով, մարդիկ ինքնապաշտպանությամբ են զբաղված: Վերադառնալով համայնքապետի ձերբակալությանը: Եւ ուրեմն ինչու են նրան ձերբակալել, երբ Օհանջանյանը հայտնել է, որ իր տանից ոչինչ չե գտել:

Այդ հարցի պատասխանը կարելի է գտնել Նիկոլ Փաշինյանի գրպանի քննչական կոմիտեն տարածած հաղորդագրությունից: Որոտանի համայնքապետի տանը կատարած խուզարկության մասին հաղորդագրության հետ ՔԿ-ն նաեւ լուսանկարներ է հրապարակել, թե ինչ է հայտնաբերել համայնքապետի տանից:
Հայտարարում են, թե Որոտանի համայնքապետին ձերբակալել են ընտրակաշառք բաժանելու համար, որպիսիք ներկայացվում է բնակիչներին համայնքի բյուջեից տրված սոցիալական օգնությունը ու որպես ապացույց կցվում զրահաբաճկոնի լուսանկար։
Հաղորդագրության մեջ որեւէ խոսք չկա, որ դրանք անօրինական են, համենայն դեպս համայնքապետին ապօրինի զենք, ռազմամթերք պահելու կասկածանք չեք վերագրել:
Սա նշանակում է, որ Կոմիտեին հրահանգված է ցանկացած գնով ձերբակալել համայնքապետին, անգամ կառույցի հեղինակազրկման, խայտառակվելու գնով, զորօրինակ սույն դեպքն է:

Թշնամին Սյունիքում դիրքավորված է ու առնվազն տարօրինակ կլիներ, որ սահմանամերձ բնակավայրի բնակիչները ինքնապաշտպանության համար ոչինչ չունենային, դրանք անգամ պետությունը պետք է տրամադրեր։
Պետությունը ոչ միայն չի տրամադրում, այլեւ ինչպես հասկացվում է ՔԿ հաղորդագրությունից, մի բան էլ կալանավորում է մարդկանց, ովքեր Փաշինյանի պես թուրքին իրենց բարեկամ չեն համարում եւ ապրում են հարեւանությամբ, բայց զինված:

Իշխանությունը ըստ ամենայնի սրանով նաեւ ուղերձ է հղում բոլոր սահմանամերձ համայնքների սյունեցներին, որ զինաթափվեն թուրքի դիմաց եւ անզեն նստեն ու սպասեն իրեն կոտորածի ժամին:

Անի Սահակյան