Մոսկվան ազդարարեց նոր, ցավոտ զիջումների մեկնարկը․ ջերմ շնորհավորանքներ Փաշինյանին

Արտահերթ ընտրություններից հետո Նիկոլ Փաշինյանը առաջին պաշտոնական այցով մեկնել է Մոսկվա։ Ռուսաստանի Դաշնության նախագահ Վլադիմիր Պուտինը Կրեմլում, Նիկոլ Փաշինյանի հետ հանդիպման ժամանակ շնորհավորել է նրան արտահերթ խորհրդարանական ընտրություններում տարած հաղթանակի առթիվ:

«Ցանկանում եմ արդեն անձամբ շնորհավորել Ձեզ ընտրությունների արդյունքների կապակցությամբ: Կարծում եմ` դա կարևոր է բոլորի, առաջին հերթին՝ Հայաստանի, հայ ժողովրդի համար՝ նկատի ունենալով այն, որ նման դժվար, սուր հարցերը կարելի է լուծել միայն արդյունավետ աշխատանքի հնարավորության դեպքում, ինչի համար ամենակարևորը ժողովրդի վստահությունն ունենալն է: Այն Դուք ունեք, դա ցույց տվեցին ընտրությունների արդյունքները, ինչը շատ կարևոր է, իրականում դա ամենագլխավորն է: Երկրի համար նման դժվարին պահերին դա ամենակարևոր պայմանն է հետագա զարգացման: Դրա համար ես անկեղծորեն Ձեզ շնորհավորում եմ: Հուսով եմ՝ այսօր կկարողանանք պաշտոնական և ոչ պաշտոնական՝ աշխատանքային ճաշի շուրջ խոսել բոլոր հարցերի վերաբերյալ, որոնք վերջին շրջանում մանրամասն քննարկել ենք և որոնք մեր լուծման կարիքն ունեն»,- նշել է ՌԴ նախագահը։

Պուտինը նաև հույս է հայտնել, որ ֆորմալ և ոչ ֆորմալ ձևաչափով` աշխատանքային ճաշի շրջանակում, կխոսեն բոլոր հարցերի շուրջ, որոնք մանրամասն քննարկվել են վերջին ժամանակներում և որոնք որոշումների կարիք ունեն: Իր խոսքում Նիկոլ Փաշինյանը մի քանի անգամ շնորհակալություն է հայտնել Պուտինին՝ 44-օրյա պատերազմի ընթացքում հրադադարի հասնելու գործում նրա անձնական ու Ռուսաստանի Դաշնության ջանքերի համար։ «Ռուս խաղաղապահների տեղակայումից հետո, ընդհանուր առմամբ, Լեռնային Ղարաբաղում իրավիճակը կայուն է, սակայն ժամանակ առ ժամանակ ի հայտ են գալիս անկայունության, անհանգստության ինչ-որ օջախներ: Եվ այսօր ցանկանում եմ Ձեզ հետ կիսվել գնահատակններով, կարծիքներով, թե ինչու և ինչպես է դա տեղի ունենում: Նաև ոչ կայուն իրավիճակ է Հայաստանի ու Ադրբեջանի սահմանին: Դրա հետ կապված մենք ոչ մեկ անգամ ենք խոսել, և ցանկանում եմ նշել, որ այստեղ նույնպես մենք, ցավոք, վերջին երկու ամիսների ընթացքում ունենք մշտական անհանգստության օջախ: Հույս ունեմ, որ այս հարցով մեզ կհաջողվի «ճշգրտել ժամերը»:

Պետք է տեղեկացնեմ, որ մինչ այժմ ամբողջությամբ լուծված չէ ռազմագերիների հարցը, սակայն ի ուրախություն մեզ՝ այստեղ առանց ուրախ լուրերի իրավիճակ չէ, քանի որ մի քանի օր առաջ 15 ռազմագերիներ վերադարձվեցին հայրենիք: Ցանկանում եմ դրանում ընդգծել Ձեր անձնական դերակատարությունը և շնորհակալություն հայտնել: Մենք հունիսի 24-ի մեր հեռախոսազրույցի ընթացքում այդ թեման քննարկել ենք, և մեկ շաբաթ անց մեր 15 հայրենակիցները վերադարձան հայրենիք»,- նշել է Փաշինյանը:

Այսպիսով՝ Պուտինն արձանագրել է, որ Մոսկվան գոհ է հայաստանյան ընտրությունների արդյունքներից։ Նիկոլ Փաշինյանը հենց այն ֆիգուրն է, որն ամբողջությամբ համապատասխանում է Կրեմլի չափանիշներին։ ժողովրդի վստահությունը, որը հունիսի 20-ի արտահերթ ընտրությունների ժամանակ տրվեց Նիկոլ Փաշինյանին՝ պետք է «շատ զգայուն, բարդ և սուր հարցերը լուծելու համար»։ Ահավասիկ՝ գերիների վերադարձի հարցը․ Փաշինյանն ըստ էության բաց տեքստով հայտարարել է, որ գերիների վերադարձի դիմաց ականապատ տարածքների քարտեզները ադրբեջանական կողմին տալու գործարքի կնքահայրը Կրեմլն է։ Փաշինյանն անգամ չի հիշատակել, որ նոյեմբերի 9-ի եռակողմ թղթի 8-րդ կետով ռազմագերիները պետք է վերադարձվեին առանց նախապայմանի։ Եռակողմ պայմանագրի այդ կետը փաստացի կատարված չէ, ու նման պայմաններում Պուտինը Նիկոլ Փաշինյանին կանչել է Մոսկվա՝ քննարկելու լուծման կարիք ունեցող հարցերը։

Որո՞նք են այդ հարցերը և լուծման ի՞նչ տարբերակներ են քննարկվում՝ հայտնի չէ։ Ամենակարևոր արձանագրումը որ արվել է՝ ընտրությունների արդյունքով Նիկոլ Փաշինյանի ունեցած վստահությունն է, որը բավարար է հայկական տարածքների նոր կորուստների տակ ստորագրելու, ՀՀ զինված ուժերի պետական գաղտնիք հանդիսացող ականապատ տարածքների մնացած քարտեզները Ադրբեջանին զիջելու, Սյունիքի միջանցքի հարցը լուծելու համար։ Ըստ էության Մոսկվան ազդարարել է մեզ համար նոր, ցավոտ զիջումների մեկնարկը։ Այս համատեքստում Պուտինի՝ Նիկոլ Փաշինյանին ուղղված ջերմ շնորհավորանքները տեղին են, որովհետև դժվար է գտնել երկրորդ ավելի հարմար կադրի, որն այս բոլոր հակահայկական գործարքներին կգնար նույնքան պատրաստակամորեն։ Պատահական չէ, որ ընտրությունների արդյունքների համար Պուտինը շնորհավորել է Նիկոլ Փաշինյանին, ոչ թե հայ ժողովրդին։

Հայկ Դավթյան