Փաշինյանը թքածը լիզում է Մարուքյանի բերանով

Երեկ հայտնի դարձավ, որ Լուսավոր Հայաստանի ղեկավար Էդմոն Մարուքյանը դիմել է վարչապետի ժամանակավոր պաշտոնակատար Նիկոլ Փաշինյանին՝ գյուղատնտեսության և մշակույթի նախարարությունները վերականգնելու առաջարկությամբ։
Հիշեցնենք՝ ի շարս այլ գերատեսչությունների նշված երկու ոլորտները 2019-ին Նիկոլ Փաշինյանը կարելի է ասել՝ լուծարեց՝ միավորելով այլ ոլորտների մեջ: «Կառավարության կառուցվածքի և գործունեության մասին» ՀՀ օրենքում 2019թ. կատարվող փոփոխություններով Փաշինյանը օպտիմալացման անվան տակ կրճատեց նախարարությունների թիվը՝ արդյունքում ավերելով գործող ու կայացած ոլորտները: Եւ, ինչ խոսք, առավել քան հիմնավոր են դրանք վերականգնելու առաջարկները, սակայն անհասկանալի է, թե ինչու է հիմա ԼՀԿ ղեկավարը նման առաջարկով հանդես գալիս, երբ Փաշինյանը ձեւավորում է նոր կառավարությունը: Անցած երկու տարում ԼՀԿ-ն կարող էր պարբերաբար նման փոփոխությունների նախագիծ ներկայացնել, բայց չի արել :

Երկու տարուց ավելի է, ինչ այլևս չեն գործում գյուղատնտեսության նախարարությունը, ինչպես նաև մշակույթի նախարարությունը՝ առանձին տեսքով։ Ժամանակը ցույց տվեց, որ այդ ոլորտներում առանձին կայացած գերատեսչության բացակայությունը հանգեցնում է բազմաթիվ խնդիրների լճացման։
«Գյուղատնտեսության նախարարության կլանումը էկոնոմիկայի նախարարության կողմից նշանակում էր գյուղատնտեսության նախարարության փաստացի կրճատում, ինչով նաև ստորադասվեց գյուղատնտեսության դերը մեր երկրում, որտեղ այն մշտապես ունեցել է և ունի չափազանց մեծ նշանակություն և բավականին զգալի կշիռ ՀՆԱ-ի մեջ։ Ընդ որում՝ սննդամթերքի անվտանգության տեսչական մարմնի լիազորություններն այժմ էլ հնարավոր է վերապահել գյուղատնտեսության նախարարությանը։
Մշակույթի նախարարությունը չպետք է որևէ վարչության կամ այլ կարգավիճակով, փաստացի կրճատվելով, ներառվեր որևէ այլ նախարարության կազմում, քանի որ մեզ անհրաժեշտ է ունենալ ուժեղ մշակույթի նախարարություն, որն ունակ է համակարգել մշակությային պատերազմների մեջ գտնվող մեր պետության խնդիրները։ Տեղին է նաև հիշատակել, որ հայ ինքնության համար մշակութային կյանքի առանձնահատկությունները բոլոր ժամանակներում եղել են ազգի պահպանման հիմնասյուներից մեկը։ Միաժամանակ, մշակութային աղավաղումների դեմ անհրաժեշտ է ունենալ մշակութային հայեցակարգը կրող ամուր կառույց»,- նշված է Մարուքյանի դիմումում։

Արդյոք Նիկոլ Փաշինյանը որոշել է խմբագրել երկու տարի առաջվա քայլը, ավելացնել նախարարների թիվը, մի քանիսին հավանաբար պաշտոն է խոստացել, եւ ինքնուրույն չէր կարող թքածը լիզել, ուստի պասերով խաղ է սկսել Մարուքյանի հետ, ձեռքի հետ էլ մի վարչության պետի պաշտոն է խոսք տվել Մարուքյանին հիշյալ նախարարություններում, այո՝ վարչության պետի, որովհետեւ Նիկոլ Փաշինյանն այնքան է օգտագործել ԼՀԿ առաջնորդին, որ նա այդ պաշտոնով լիուլի կբավարարվի եւ չի կարող նախարարական, նույնիսկ փոխնախարարական ամբիցիաներ ունենալ: Ժամանակը ցույց կտա, թե ինչ է խոստացել Փաշինյանը :

Բայց մինչ այդ ՀՀԿ փոխնախագահ Արմեն Աշոտյանը հիշեցնում է, որ Գյուղատնտեսության, մշակույթի և սփյուռքի նախարարությունների վերականգնման մասին ամբողջ քարոզարշավի ընթացքում բարձրաձայնում էր "Պատիվ ունեմ" դաշինքը: Խնդրին ուշադրույթուն էր դարձնում նաև "Հայաստանը":
Ավելին, նշված նախարարություները կառավարության կառուցվածք վերադարձնելու թեզը դաշինքի նախընտրական ծրագրի կարևոր դրույթներից էր: «Նայեցի ԼՀԿ նախընտրական ծրագիրը և ՈՉ մի խոսք չգտա նման քայլի կարևորության կամ նման առաջարկի մասին: Այնուհանդերձ ԼՀԿ ղեկավարը այսօր առաջարկել է կապիտուլյանտին դիմել նման քայլի, թեպետ նախընտրական խոստումների մեջ այսպիսի դրույթ չի բարձրաձայնել:Այստեղից կանխատեսելի հետևություն. Կապիտուլյանտին ԼՀԿ-ի կողմից տրվել է հերթական "պասը", որպեսզի նա ներկայացնի կառավարության կառուցվածքի մեջ փոփոխությունները, իսկ խնդրի բարձրաձայնման առաջնահերթությունից փորձեն զրկել "Պատիվ ունեմ" դաշինքին:Ինչ պրիմիտիվ են ձեր փոխանցումները , պարոնայք»,- ֆեյսբուքյան իր էջում գրել է Արմեն Աշոտյանը:
Սա նշանակում է, որ Փաշինյանը առաջիկա գործընթացներում ամեն ինչ անելու է խորհրդարանական ընդդիմության անկյուն մղելու եւ իր հաճախորդների հետ իբր քաղաքական օրակարգ ձեւավորելու համար:

Անի Սահակյան