Նիկոլ Փաշինյանը գերիների հաշվին առեւտուր է արել Ալիեւի հետ

Անցած շաբաթ օրը հայ ռազմագերիների15 հոգանոց խումբ վերադարձավ կրկին ականապատ դաշտերի քարտեզների դիմաց. այս անգամ հայկական կողմը Բաքվին է փոխանցել Ֆիզուլիի ու Զանգելանի շրջանների ականապատ դաշտերի քարտեզները: Ինչ խոսք, բոլորիս համար ուրախալի լուր է մեր հայրենակիցների վերադարձը, և իշխանությունը պետք է ամեն ինչ անի, որ Բաքվի բանտերում պահվող մեր մյուս գերիներն էլ օր առաջ վերադառնան հայրենիք: Սակայն գերիների այս խմբի վերադարձի փաստը բուռն քննարկումների դաշտ է բացել: Մի քանի օր է քննարկում են գերիների արտաքին տեսքը, տրամադրությունը եւ շատերի մոտ կասկած է հարուցել այն, որ վերադարձած գերիներն անհոգ տեսք ունեին և խոսում էին ծամոն ծամելով, ձեռքի հետ էլ փաշինյանական լեկսիկոնով կոչ էին անում մեզ «դուխով» լինել: Կարծիքներ հնչեցին, թե գործ ունենք նախապես ծրագրված առեւտրի հետ եւ որ այդ տղաները պատերազմի ավարտից հետո պատահական չեն հայտնվել Խծաբերդում, պատահաբար գերի չեն ընկել, նրանց Հայաստանից են ուղարկել, որ հետո Ադրբեջանին հանձնեն արժեքավոր քարտեզները: Մասնագետները փաստեցին, որ սա երկկողմանի հանցագործություն է, որը փորձ է արվում քողարկել մարդասիրական ֆոնի տակ: Խնդիրն այն է, որ ականապատ դաշտերի քարտեզները համարվում են պետական գաղտնիք եւ դրանք հրապարակայնացնելը, առավել եւս թշնամուն հանձնելը պետական դավաճանություն է՝ քրեական օրենսգրքով հստակ նկարագրված: Թշնամական երկրին պաշտոնապես փոխանցվել է պետական հույժ կարեւոր գաղտնիք հանդիսացող ռազմական բնույթի տեղեկություններ: Եւ սրա համար մարդիկ պետք է պատասխանատվության ենթարկեն:
Եվ մի կողմ դնենք կեղծ մարդասիրական մղումները, թե, իբր, մեկ մարդու կյանքն ամեն ինչից թանկ է։ Մեկ մարդու կյանքն արժե ընդամենը մեկ մարդու կյանք, իսկ քարտեզների տրամադրումը թշնամուն վտանգում է տասնյակ հազարավոր մարդկանց կյանք։ Քանզի Ադրբեջանը Ակնայում, Զանգելանում մոտ ապագայում կարող է հսկա ռազմաբազաներ դնել ՝ Ստեփանակերտից, Սյունիքից մի քանի կմ հեռավորության վրա, իսկ եթե որեւէ մեկը սրա հետեւանքները չի ուզում պատկերացնել, դա իր գործն է:

Մյուս կողմից՝ հանցագործության երկրորդ կողմը իրականացրել են Ադրբեջանի նախագահը եւ այդ երկրի իշխանությունները, որոնք զբաղվել են մարդավաճառությամբ՝ թրաֆիկինգով: Ինչպես հայտնի է պաշտոնական Բաքուն հայտարարել է, որ Ադրբեջանում ռազմագերիներ չկան, ռազմագերիների հարցը լուծված է, որ Ադրբեջանը բոլոր ռազմագերիներին եւ մնացածին հանձնել է: Եթե նրանք սա ներկայացնում են որպես գերիների վերադարձ, ապա ուր մնաց նրանց նախորդ հայտարարությունը:
Եթե ռազմագերիների հարցը լուծված է, բայց հիմա մարդ են փոխանցում, ուրեմն պետք է հասկանալ՝ ինչի՞ համար: Այսինքն, ըստ ադրբեջանական տեսակետի, խոսքը վերաբերում է ոչ թե ռազմագերուն, այլ կոնկրետ մարդուն: Իսկ կոնկրետ մարդուն կոնկրետ պայմանով, պատճառով հանձնել ինչ-որ մի կողմի, դրա համար ունենալ շահադիտական, շահագրգիռ մոտիվներ, սովորական թրաֆիկինգ է: Նշանակում է մարդավաճառությամբ են զբաղվել եւ պետք է միջազգային կառույցների գնահատանքին արժանանան:

Անի Սահակյան