Փաշինյանի երկակի խաղը. Արմեն Գրիգորյանը կհեռանա՞

Գաղտնիք չէ, որ պատերազմից հետո արևմուտքը Հայաստանի գործընթացներից դուրս է մղված: Հայաստանում գործընթացները ենթարկվում են Ռուսաստանին, իսկ Նիկոլ Փաշինյանն էլ դարձել է Պուտինի հլու կամակատարը: Եւ ինչքան շատ է ինքը ստրկանում Պուտինի առջեւ ու տառացի կատարում նրա բոլոր ցանկություն-պահանջներն, այնքան ներիշխանական տիրույթում կազմակերպում է շոուներ՝ փորձագիտական, պատգամավորական մակարդակով հակառուսական հայտարարություններ են անում, իբր ցույց տալիս, որ Փաշինյանը Թուրքիայի ստրուկը չէ: Եւ, ահա, Հայաստանը համաձայնություն է տվել Գեղարքունիքի հատվածում ռուս սահմանապահների տեղակայման հարցին, բայց պետության բարձրաստիճան պաշտոնյաներ ամոթանք են թալիս ՀԱՊԿ-ին, զսպվածության կոչ անում: Հիշեցնենք, որ ՌԴ-ն ՀԱՊԿ-ում առանցքային դերակատար է:
Անվտանգության խորհրդի քարտուղար Արմեն Գրիգորյանը հեռախոսազրույց է ունեցել ՀԱՊԿ գլխավոր քարտուղար Ստանիսլավ Զասի հետ` իր մտահոգությունը հայտնելով նրա` վերջին հայտարարության որոշ ձևակերպումների և գնահատականների կապակցությամբ: Հիշեցնենք, որ օրերս Զասը հայտարարել էր, թե ՀԱՊԿ-ը չի պատրաստվում միջամտել Սյունիքի միջադեպին, քանի որ այն սահմանային սովորական միջադեպ է եւ չկա ռազմական ագրեսիա:
Անվտանգության խորհրդի գրասենյակից հայտնում են, որ Արմեն Գրիգորյանը համոզմունք է հայտնել, որ ստեղծված իրավիճակը չի կարելի որակել որպես միջադեպ, քանզի արդեն տևական ժամանակ է, ինչ Ադրբեջանի զինծառայողները չեն լքում Հայաստանի սուվերեն տարածքը:
Արմեն Գրիգորյանը ևս մեկ անգամ շեշտել է, որ ՀԱՊԿ քարտուղարության մակարդակով կատարվող ձևակերպումների հարցում անհրաժեշտ է ցուցաբերել զսպվածություն՝ իրավիճակի հանգուցալուծմանն ուղղված կառուցողական ջանքերը հարվածի տակ չդնելու համար:

ՀԱՊԿ ղեկավարին զսպվածության կոչ անելուց առաջ, իհարկե, լավ կլիներ զսպվեր եւ լրջանար նախեւառաջ մեր իշխանությունը: Եթե Սյունիքի ներխուժումը սահմանային միջադեպ չէ եւ ԱԽ քարտուղարը խոստովանում է, որ մեր երկրի սուվերեն տարածքում են, ապա ինչն է խանգարում դուրս վռնդել, կամ գերեվարել մեր սուվերեն տարածքում: Կամ եթե սահմանային միջադեպ չէ, ապա ինչու է Հայաստանը այս կառույցին դիմել ոչ թե չորրորդ կետով, որը ռազմական աջակցություն է ենթադրում, այլ երկրորդ կետով, որն ընդամենը խորհրդակցական կարծիք է նշանակում:
Հիմա կառույցում քննարկել են եւ թերեւս ելնելով Նիկոլ Փաշինյանի հայտարարություններից, որ Սյունիքում չկան կրակոցեր, չեն եղել զոհեր, որ ինքը չի պատրաստվում Սեւ լճի 30 տոկոսի համար պատերազմ սկսել, ՀԱՊԿ-ն էլ որոշել է , որ եթե այս իրավիճակը մեղմ ասած մեզ ձեռք է տալիս, մենք էլ ռազմական աջակցության համար չենք դիմել, ընդամենն իր կարծիքն է հայտնել: Նկատենք, որ ԱԽ քարտուղարը բավականին կոշտ է իր ձեւակերպումներում եւ զսպվածության կոչ է անում կառույցի ղեկավարին: Միգուցե Նիկոլ Փաշինյանը որոշել է ազատվել Արմեն Գրիգորյանից եւ դրան գնում է այս ՝ ռազմավարական դաշնակցի հետ բաց առճակատման ճանապարհով:
ԱԳ նախարարի պաշտոնի հավակնորդ Ռուբեն Ռուբինյանը, ով ըստ մամուլի մերժվել է ռուսական կողմից, եւս միացել է հակառուսական տրամադրությունների գեներացմանը՝ փոխարենը խոսի պետության պարտավորությունների մասին: Նա ասել է, որ ՀԱՊԿ-ը ունի պարտականություններ. «ՀԱՊԿ-ն ունի գործիքակազմ կամ ՀԱՊԿ-ն ունի պարտավորություն արձագանքել ոչ միայն ուղիղ ագրեսիային կամ այսպես ասած ռազմական գործողություններին, այլ նաև ՀԱՊԿ անդամի տարածքային ամբողջականությանը, ինքնիշխանությանը և անվտանգությանը առկա սպառնալիքի դեպքում: Կարծում եմ՝ ոչ ոք չի կարող վիճել, որ այն իրավիճակը, որը տիրում է մեր սահմաններին, 100 տոկոսով համապատասխանում է 2-րդ հոդվածին»: Կրկնենք՝ այս մարդիկ թերեւս չեն լսել Փաշինյանին այն հայտարարությունը, որ ամեն ինչ նորմալ է եւ ինքը չի պատրաստվում Սեւ լճի 30 տոկոսի համար պատերազմ սկսել:

Անի Սահակյան