Աբսուրդային որոշումներ՝ հանուն դավաճանության

 Վարչապետի պաշտոնակատար Նիկոլ Փաշինյանի այսօրվա որոշմամբ՝ դադարեցվել է Արտակարգ իրավիճակների նախարարության սեյսմիկ պաշտպանության վարչության գործունեությունը։

Որոշման տեքստը տեղադրված է կառավարության e-gov.am կայքում։ Որոշման կից որևէ պաշտոնական հիմնավորում ներկայացված չէ, այն դեպքում, երբ նման որոշման կայացումն առնվազն աբսուրդային է։ Նույն որոշմամբ՝ ուժը կորցրած է ճանաչվում Հայաստանի Հանրապետության վարչապետի 2018 թվականի հունիսի 11-ի՝ «Հայաստանի Հանրապետության արտակարգ իրավիճակների նախարարության կանոնադրությունը հաստատելու մասին» N 740-Լ որոշմամբ հաստատված՝ Հայաստանի Հանրապետության արտակարգ իրավիճակների նախարարության կանոնադրության 33-րդ կետի 4-րդ ենթակետը: Այսինքն՝ նախարարության կառուցվածքային ստորաբաժանումներից դուրս է գալիս սեյսմիկ պաշտպանության վարչությունը։

Արձագանքելով տարաբնույթ մեկնաբանություններին՝ ԱԻՆ-ը պարզաբանում է ներկայացրել։ «Հաշվի առնելով «Սեյսմիկ պաշտպանության տարածքային ծառայություն›› ՊՈԱԿ-ի գործառույթները՝ մասնավորապես հարաբերությունները տարբեր միջազգային կազմակերպությունների հետ, դիտացանցի աշխատանքների կարևորությունը, ինչպես նաև մասնագիտական այլ գործառույթներ, կառավարությունն առավել նպատակահարմար է համարել, որ Արտակարգ իրավիճակների նախարարության սեյսմիկ պաշտպանության վարչությունը կշարունակի գործել նախկին կարգավիճակով՝ որպես ՊՈԱԿ»,- ասված է պարզաբանմամ մեջ։

Մինչ այդ՝ դեռևս հունիսի 24-ին, կառավարությունը որոշել է դադարեցնել «Սեյսմիկ պաշտպանության տարածքային ծառայություն» պետական ոչ առևտրային կազմակերպության լուծարման գործընթացը: Անհասկանալի է, թե ինչու է նախարարության կառուցվածքում ընդգրկված այս կարևորագույն ստորաբաժանումը վերածվում ՊՈԱԿ-ի։ Կամ ինչու իրականացվող քայլերի տրամաբանությունը, եթե այդպիսիք կան, հստակ չեն ներկայացվում հանրությանը։ Ի վերջո, ինչո՞ւ է որոշվել ԱԻ նախարարության կարևորագույն վարչությունը փակել, դրա փոխարեն չլուծարել միանման գործառույթներ իրականացնող ՊՈԱԿ-ը։ Անգամ անհուսալի տգետը կարող է փաստել, որ Հայաստանի նման բարձր ռիսկի սեյսմիկ գոտում գտնվող երկրում, սեյսմիկ անվտանգության բարձրացումը պետական քաղաքականության ռազմավարական ուղղություններից պետք է լինի։ Կարելի է փաստել, որ Նիկոլ Փաշինյանը որոշել է լուծարել արտակարգ իրավիճակների նախարարության ամենաբովանդակային վարչությունը։

Երևի ավերիչ և մահաբեր պատերազմից հետո պողպատե մանդատ ստացած Փաշինյանի սիրտը հիմա էլ երկարաշարժ է ուզում։ Նույն թեթևությամբ ու տգիտությամբ Նիկոլ Փաշինյանը լուծարեց նաև «Գեոդեզիա և քարտեզագրություն» ՊՈԱԿ ինստիտուտը՝ պատերազմից ընդամենը մի քանի ամիս առաջ՝ 2020 թվականի ապրիլին։ Սա մասնագիտական և գիտական այն կառույցն էր, որի կանոնադրական գործառույթն էր՝ զբաղվել քարտեզագրման, տեղորոշման և ըստ անհրաժեշտության նաև սահմանազատման աշխատանքներով։ 2011 թվականի դեկտեմբերին ստեղծված այս կառույցը, զբաղվել է պետական նշանակության գործառույթների իրականացմամբ։ Թերևս, Նիկոլ Փաշինյանը վաղօրոք էր ամեն ինչ պլանավորել։ Հավանաբար նրա դավաճանական ծրագրի կարևոր կետերից են եղել նոյեմբերի 9-ի կապիտուլացիայի ակտի ստորագրումը և դրան հաջորդող սահմանազատումը՝ GPS-ով հայ-ադրբեջանական սահմանների որոշման գործընթացը, որի հետևանքով Հայաստանը թշնամուն է հանձնում ռազմավարական նշանակության բարձունքներ, գյուղեր, մարդիկ, իրենց տները վառելով, տարածքներ են հանձնում ադրբեջանցիներին։

Հայկ Դավթյան