Նիկոլ Փաշինյանի դեմ գործ կհարուցվի՞

Ազգային անվտանգության ծառայությունը քրեական գործ է հարուցել Զինված ուժերի գլխավոր շտաբի, ապա պաշտպանության նախարարության ռազմական վերահսկողության ծառայության նախկին պետ Մովսես Հակոբյանի նկատմամբ պետական գաղտնիք հրապարակելու հոդվածի առաջին մասով, որը վերաբերում է պետական գաղտնիքի հրապարակմանը առանց դավաճանության հատկանիշների։
ԱԱԾ-ն հաղորդում է, որ կատարված քննության արդյունքում հիմնավորված է համարում, որ Պաշտպանության նախարարության ռազմական վերահսկողության ծառայության նախկին պետը 2020 թվականի նոյեմբերի 19-ին հարցազրույցներից մեկի ընթացքում հրապարակել է «պետական գաղտնիքի շարքը դասվող տեղեկություններ», մասնավորապես սպառազինության և ռազմական տեխնիկայի երկարաժամկետ կանխատեսումների ուղղությունների, զարգացման ծրագրերի, զինված ուժերի կիրառման ծրագրերի և այլ հարցերի շուրջ։
Մովսես Հակոբյանը մեղադրանքը ընդհանրական է համարում եւ կարծում է, որ այն կոնկրետ իր հետ քիչ կապ ունի: Ազգային անվտանգության ծառայությունը նաև հայտնեց, որ գործն արդեն ուղարկել են դատախազություն հաստատման, ապա դատարան ուղարկելու համար, Հակոբյանը լրատվամիջոցների հետ զրույցում համոզմունք է հատյնել, որ դատախազությունն այն կհաստատի։
Հիշեցնենք, որ Մովսես Հակոբյանը նոյեմբերի 19-ին պատերազմի դադարից օրեր անց <<Հայելի ակումբում>> ասուլիս տվեց, որի ընթացքում աղմկահարույց հայտարարություններով հանդես եկավ, խոսեց զենքի գնումներում թույլ տրված սխալների, զորահամալրման գործընթացի թերացումների, առաջնագծից հազարավոր մարդկանց փախուստի և պատերազմի ձախողման այլ պատճառների մասին։ Այս ամենով հանդերձ նա պնդում ՝ ինքը գիտի, թե որն է պետական գաղտնիք եւ հաստատ նման տեղեկություն չի հայտնել:

Մինչ իրավապահ կառույցներն ու դատարանը կորոշեն՝ հայտնել է, թե ոչ, նկատենք, որ պատերազմի ողջ ընթացքում եւ դրանից հետո Նիկոլ Փաշինյանն ավելի սենսացիոն գաղտնիքներ է հայտնել պատերազմի եւ առհասարակ պետական փակ ինֆորմացիաների վերաբերյալ:
Օրինակ Նիկոլ Փաշինյանը ուղիղ եթերով հայտնում էր մոբռեսուրսի թիվը, կոնկրետ նշում նաեւ մեկ տարի առաջ զորացրվածների թիվը, տեղեկացնում էր որ կենտրոնական հավաքակայան ներկայացողները պետք է իրենց հետ վերցնեն զրահաբաճկոններ` դրանով իսկ մատնելով, որ զինված ուժերում ողբալի վիճակ է եւ հայկական կողմը մերկ է պատերազմի դաշտում, պատրաստ հանձնվելուն:
Պատերազմի ամենաթեժ օրերին ուղիղ եթերում զանգահարում էր զորամասեր, պետական գաղտնիք պարունակող հարցեր տալիս զանգին պատասխանած զինծառայողներին եւ բարեբախտաբար միայն վերջիններիս շնորհիվ է, որ զրույցը սահմանափակվում էր թույլատրելիի սահմաններում: Կամ՝ Նիկոլ Փաշինյանը պատերազմից հետո Օնիկ Գասպարյանի հետ առճակատումների շրջանում բառացի մեջբերում էր ԱԽ նիստի արձանագրությունը, որը պետական գաղտնիք է եւ Փաշինյանը կամ որեւէ մեկը դրանք հրապարակելու իրավունք չունեն, սակայն գնացին այդ քայլին միայն նրա համար, որ Օնիկ Գասպարյանի դեմ քաղաքական դիվիդենտներ շահեն: Սկզբում հայտարարվում էր, որ «Իսկանդերի» կիրառման հանգամանքը պետական գաղտնիք է, սակայն պատերազմից հետո Փաշինյանը բացահայտեց նաև այդ գաղտնիքը: Ավերոդ է խոսել, որ պատերազմի օրերին իշխանական թիմը զորքի տեղաշարժի, տեղանքի տեղորոշման ինֆորմացիաների տարածման, լուսանկարներ հրապարակելու առաջամարտիկներն էին: Արդյոք հայրենի իրավապահները, մասնավորապես, ԱԱԾ-ն պոստ ֆակտում կզբաղվեն նաեւ նրանցով, որպեսզի Մովսես Հհակոբյանի նկատմամբ իրականացվող գործընթացը քաղաքական հետապնդում չընկալվի, թե պողպատյա մանդատ ստացած իշխանությանն այդ մանր հարցերն այլեւ չեն հուզում:

Անի Սահակյան