Ադրբեջանցիներին լավ նայելու համար մարզպետը պարգեւատրվում է

Քննչական կոմիտեի նախագահ Հայկ Գրիգորյանը, ով պատերազմից հետո լռեյլյան ծվարել է իր կաբինետում եւ անվերապահ կատարում է Արցախը հանձնած դավաճանի կամքը եւ այդպիոսով իրավապահ հռչակված պետության համար սրա գոյությունն այլեւս ութ ամսից ավել վերածվել է քառակուսի գույքի նշանակության, հուլիսի մեկին պարգեւատրել է Գեղարքունիքի մարզպետ Գնել Սանոսյանին:

<<Քննչական կոմիտեի նախագահը, շնորհավորելով մարզպետին, հույս է հայտնել, որ սերտ փոխգործակցությունը և հետագա աշխատանքներն այսուհետ ևս կլինեն արդյունավետ և շարունակական:
Գեղարքունիքի մարզպետ Գնել Սանոսյանը, շնորհակալություն հայտնելով ջերմ ընդունելության և Կոմիտեի բարձր պարգևին արժանանալու համար, վստահեցրել է, որ այսուհետ ևս մարզի և Քննչական կոմիտեի համատեղ աշխատանքը ցանկալի արդյունք կտա>>,- նշվում է ՔԿ տարածած հաղորդագրության մեջ:

Պարգևատրման արարողությանը ներկա են եղել նաև ՀՀ քննչական կոմիտեի նախագահի տեղակալ Արգիշտի Քյարամյանը և Քննչական կոմիտեի Գեղարքունիքի մարզային քննչական վարչության պետ Կարապետ Համբարձումյանը:
Թե որ հարցերում են մարզպետն ու ՔԿ անշարժ գույքի նշանակություն ունեցող ղեկավարը փոխգործակցել, գաղտնի է պահվում, բայց դժվար չէ կռահել:
Գաղտնիք չէ, որ արդեն մի քանի ամիս է այս իշխանության եւ հատկապես Նիկոլ Փաշինյանի սիրելի ադրբեջանցիները Գեղարքունիքի մարզում են, նրանք մխրճվել են Հայաստանի տարածք եւ կարծես թե հեռանալու ցանկություն չունեն, հենց այս տարածքից վերցրեցին վերջին վեց գերիներին, որոնցից չորսը ընտրություններից օրեր առաջ վերադարձան հայրենիք:

Ամենայն հավանականությամբ Գեղարքունիքի մարզպետը պարգեւատրվում է, որ իր ղեկավարած մարզում այս ամիսներին ապահովել է Նիկոլ Փաշինյանի եւ նրա իշխանության բարեկամների ապահով ներկայությունը եւ իրավապահների տեսադաշտում են հայտնվել բոլոր նրանք, ովքեր փորձել են սադրանքների գնալ, հայրենի հողից վռնդել թուրք ասկյարներին: Դժվար թե այլ հարցով պարգեւատրեին մարզպետին, քանի որ հենց սա է այն գլխավոր, առաջնային խնդիրը, որ ամիսներ շարունակ ծառացած է Գեղարքունիքի մարզի եւ մարզպետի առջեւ: Ոչ միայն ապահովել է, այլ խնամքով թաքցնում է մարզի սահմանագծին ադրբեջանցիների թիվը: Նույն օրը լրագրողների հետ զրույցում նա հրաժարվել է պատասխանել հարցին, թե արդյոք Գեղարքունիքում ավելի քան 1 հազար թուրք է տեղակայվել: <<Բայց ինչի պիտի ձեզ թիվ ասեմ>, հարցով է պատասխանել Սանոսյանը եւ նշել, որ պատկան կառույցները կհայտնեն այդ մասին:

Կա նաեւ երկրորդ տարբերակ՝ չի բացառվում նախընտրական ժամանակներում մարզպետն ակտիվ գործ է տվել իրավապահներին եւ դրա վարձնք է այսօր ստանում,պատահական չէ, որ ընտրակաշառքի գործով առաջին կալանավորումը Գեղարքունիքում եղավ, ձերբակալվեց ԲՀԿ-ի թեկնածուն, որը կասկածվում էր առաջին անհրաժեշտության մթերքների ծանրոցներ բաժանելու մեջ:

Իսկ իրականում Հայկ Գրիգորյանը դավաճան իշխանության ներկայացուցիչներին պարգեւատրելու փոխարեն վաղուց պետք է մի քանիսին, Նիկոլ Փաշինյանի գլխավորությամբ, պատասխանատվության կանչեր եւ Արցախը հանձնած ու հինգ հազար մարդկանց մահվան պատճառ դարձած իշխանություններին ուղարկեր իր արժանի տեղը:

Անի Սահակյան