Hayeli.am-ը Յութուբի հայաստանյան տիրույթում 4-րդն է դիտումների քանակով

actual.am կայքը հրապարակել է Յութուբի հայաստանյան տիրույթում գործող լրատվական ալիքների վարկանիշները։ Ֆիքսված յութուբյան հարթակներում հրապարակված հոլովակների միջին դիտումների քանակով առաջատար լրատվամիջոցների տասնյակում hayeli.am կայքը գրավում է 4-րդ հորիզոնականը՝

Ազատություն ռադիոկայանից, 5-րդ ալիք հեռուստաընկերությունից և Հանրային հեռուստաընկերության լրատվական ծրագրից հետո։ hayeli.am-ի յութուբյան ալիքն արդեն ավելի քան 70 հազար հետևորդ ունի, ամսական դիտումները 7-7,5 մլնի են հասնում։ Մեր կայքի յութուբյան ալիքում հրապարակված տեսանյութերի միջին դիտելիությունը հասնում է 7594-ի։ Պետք է նկատել, որ hayeli.am-ի յութուբյան ալիքի դիտումների աճը թռիչքային է եղել հատկապես վերջին մեկ տարվա ընթացքում։

Համաձայն Google Trends-ի տվյալների՝ վերջին 12 ամիսների ընթացքում Youtube-ում Հայաստանից իրականացված թոփ-որոնումների առաջին 5 հորիզոնականները գրավում են հեռուստասերիալներն ու սիթքոմները։ Հայաստանում մեծ սպառում ունի նաև լրատվական կոնտենտը: actual.am-ի իրականացրած ուսումնասիրությունը ցույց է տալիս, որ առավել բարձր են քաղաքական հարցազրույցների ձևաչափով հաղորդումների դիտումները։ Դատելով Youtube-ի միջին դիտումների գրաֆիկից՝ կարելի է փաստել, որ դրանց թվերը մի քանի անգամ ավելի քիչ են, քան քաղաքական «հարցազրույց» ֆորմատի հաղորդումների միջին դիտումները: Սա նշանակում է, որ լրատվական ալիքների առաջխաղացման հարցում քաղաքական «հարցազրույց» ֆորմատի հաղորդումներն ունեն վճռորոշ դեր։ Եվ եթե այդ ժանրը լրատվական ալիքներում բացառվի, ապա լրատվական կոնտենտը կունենա զարգացման ճգնաժամ։ Ընդ որում, պետք է հաշվի առնել, որ քաղաքական հարցազրույցների բարձր դիտելիությունը մեծապես պայմանավորված է նաև հյուրի գործոնով։

Հետևաբար, առանց հյուրի էֆեկտի, բուն լրատվական կոնտենտի դիտելիության առումով առավել կարևոր է յութուբյան տիրույթում հրապարակված ամենօրյա տեսահոլովակների միջին դիտելիությունը, որտեղ մեր կայքը հայաստանյան շուկայի առաջատարներից է։
Նկատենք, որ յութուբյան տիրույթն այժմ մեծ զարգացում է ապրում և վաղուց արդեն լրատվամիջոցների իրական վարկանիշները չափման իրական միավորների համար որոշիչ են հենց այս տիրույթի թվային տվյալները։ Ակնհայտ է, որ ԶԼՄ-ների գոյատևման հիմնական աղբյուր համարվող գովազդային շուկայի համար ևս այս ցուցանիշները լինելու են կողմնորոշիչ։

Հայկ Դավթյան