Ում «հագով» են օրենքը կարում

Իմ Քայլը խմբակցության նախաձեռնությամբ այսօր հրավիրած Ազգային ժողովի արտահերթ նիստի օրակարգում ի թիվս այլ հարցերի ընդգրկված է նաեւ Կառավարության կառուցվածքի եւ գործունեության մասին օրենքում լրացումներ կատարելու վերաբերյալ նախագիծը:
Խորհրդարանական ընտրություններից հետո Նիկոլ Փաշինյանը որոշել է փոփոխության ենթարկել կառավարության կառուցվածքը եւ ինչ-ինչ պաշտոններ համապատասխանեցնել այն անձանց, որոնց ուզում է նշանակել այդ պաշտոններում: Կոնկրետ ներկայացված նախագիծը վերաբերում է մարզպետների ինստիտուտին.  կառավարությունն առաջարկում է, որ դրանք հաշվետու լինեն փոխվարչապետին, անշուշտ՝ վարչապետի հանձնարարությամբ:
<<Մասնավորապես, փոխվարչապետը մարզպետների գործունեության արդյունավետության բարձրացման նպատակով համակարգելու է մարզպետների ընթացիկ գործունեությունը, ինչպես նաեւ պետական կառավարման համակարգի այլ մարմինների հետ վերջիններիս աշխատանքները, քննարկելու եւ համադրելու է տարածքների համաչափ զարգացումն ապահովելու նպատակով Հայաստանի Հանրապետության պետական բյուջեով եւ այլ միջոցներով նախատեսվող ծրագրերը, իրավական հսկողություն է իրականացնելու մարզպետների ընդունած որոշումների նկատմամբ եւ անհրաժեշտության դեպքում դրանք ուժը կորցրած ճանաչելու վերաբերյալ առաջարկություններ է ներկայացնելու վարչապետին, իրականացնելու է մարզպետի աշխատակազմի գործունեության վերահսկողությունը, լսելու է մարզպետի աշխատակազմի գործունեության մասին հաշվետվությունները, քննելու է գործունեության ստուգման արդյունքները: Մարզպետներին հնարավորություն է ընձեռնվելու նաեւ անմիջապես ոլորտը համակարգով փոխվարչապետի միջոցով Կառավարության եւ վարչապետի քննարկմանը ներկայացնել իրենց իրավասությանը վերապահված հարցերը, անմիջապես ոլորտը համակարգով փոխվարչապետին ներկայացնել առաջարկություններ տարածքային համաչափ զարգացմանն ուղղված պետական քաղաքականության իրականացման ուղղությամբ, ընթացիկ հաշվետվություն ներկայացնեն ոլորտը համակարգով փոխվարչապետին, պարտավորվելու են նաեւ պարտադիր քննության առնել ոլորտը համակարգով փոխվարչապետի կողմից մարզպետի աշխատակազմի կառուցվածքային ստորաբաժանումների եւ դրանց ղեկավարների աշխատանքի վերաբերյալ առաջարկությունները եւ սահմանված ժամկետում տեղեկացնել ձեռնարկված միջոցների մասին>>,- նշված է լրացումների նախագծում: Գործող օրենքի համաձայն՝ մարզպետները գործում են Տարածքային կառավարման ենթակայության ներքո: Նման փոփոխության պաշտոնական հիմնավորումը հետեւյալն է. <<Նշված փոփոխությունների արդյունքում կբարձրացվի մարզպետների հաշվետվողականությունը եւ վերջիններիս աշխատակազմերի գործունեության արդյունավետությունը>>:

Սակայն պարզ է, որ այս ամենը լոկ բառակույտ է եւ իրականում Նիկոլ Փաշինյանը փոխվարչապետի լիազորություններն է ընդլայնում, հավանաբար, նա դրա համար պատճառ ունի եւ ցանկանում է իր վստահելիներից մեկին նշանակել այդ պաշտոնում: Հիշեցնենք, որ կան խոսակցություններ, թե Տարածքային կառավարման նախարար Սուրեն Պապիկյանը հնարավոր է նշանակվի ԱԺ նախագահ, ենթադրվում է, որ Պապիկյանից հետո Նիկոլ Փաշինյանը հարմար թեկնածու չունի այդ պաշտոնում նշանակի, եւ մարզպետների գործունեությունը համակարգելու կարեւոր գործառույթը տեղափոխում է փոխվարչապետի համար: Կամ էլ Սուրեն Պապիկյանին է տանում փոխվարչապետի պաշտոնին: Մի բան աներկբա է, որ Փաշինյանը ողջ կյանքը Սերժ Սարգսյանին քննադատել է պաշտոնները մարդկանց հագով կարելու հարցում, այսօր ինքն է նույնն անում: Հեղափոխությունից հետո եւս գնաց արմատական փոփոխությունների, միավորումների անվան տակ վերացրեց Մշակույթի, սպորտի, սփյոռքի, գյուղատնտեսության նախարարությունները, փոխարենը Արայիկ Հարությունյանի ու Սուրեն Պապիկյանի համար մեգանախարարություններ ձեւավորեց:

Անի Սահակյան