Քաղաքական առեւտուրը սկսված է
Ընտրություններում կրած խայտառակ պարտությունն անգամ Լեւոն Տեր-Պետրոսյանին սեփական չարությունը վերանայելու, նախկին նախագահ գործընկերներին հարվածելու տենչը զսպելու առիթ չդարձավ: Ինչպես նախընտրական շրջանում էր առաջին նախագահը ծածուկ քարոզ անում Նիկոլ Փաշինյանի օգտին, այնպես էլ ընտրություններից հետո նրա վրայից մաքրում է կեղծիքը եւ ընտրությունների ողջ պատասխանատվությունը հավասարապես դնում գործող իշխանության, Ռոբերտ Քոչարյանի եւ Սերժ Սարգսյանի վրա: Ընտրություններից մոտ մեկ շաբաթ անց ՀԱԿ-ը հայտարարություն է տարածել, որով այդպես էլ չի հասկացվում՝ ընդունում են ընտրությունների արդյունքները, եւ պատրաստվում են դրանք բողոքարկել, թե հայտարարության նպատակը հերթական անգամ նախկին նախագահներին մեղադրելն է ու Փաշինյանին արդարացնելը, ձեռքի հետ, տեղ-տեղ վերջինիս քննադատությամբ քաղաքական առեւտրի առաջարկը:
Այսպիսով՝ ՀԱԿ-ը հայտարարության առաջին կետով նախ քննադատում է իշխանություններին նշելով՝ <<իշխանություններն ամբողջ ծավալով օգտագործել են վարչական ռեսուրսը, այդ նպատակով օգտագործելով նախարարությունների, մարզպետարանների և համայնքային իշխանությունների լծակները։ Այդ որոշումը փաստացի կայացվել է այն պահից, երբ Նիկոլ Փաշինյանը, Սահմանադրության կոպիտ խախտմամբ, իրեն հռչակեց ՀՀ վարչապետի պաշտոնակատար, իսկ իշխող ուժի պատգամավորական խմբակցությունը, տարբեր պատճառաբանություններով, հրաժարվեց կատարել վարչական ռեսուրսի օգտագործման արգելք սահմանող Ընտրական և Քրեական օրենսգրքերի համապատասխան փոփոխությունները։ Հրապարակված փաստերը վկայում են, որ իշխանությունը չխորշեց անգամ բանակի քվեարկության ուղղորդման տխուր ավանդույթից>>։
Թվում է, թե այս արձանագրումից հետո ՀԱԿ-ում կեզրակացնեին, որ ընտրություններն ըստ էության կեղծվել են, կամ գոնե վարչական լծակի կիրառումը վճռորոշ ազդեցություն է ունեցել ընտրության ելիք վրա եւ, ահա, ՀԱԿ-ը դա վիճարկելու է բարձր դատարանում: Բայց սրա փոխարեն, հայտարարության հաջորդիվ կետերում կարդում ենք, որ Նիկոլ Փաշինյանի հետ հավասար հարթակում են գտնվում Սերժ Սարգսյանն ու Ռոբերտ Քոչարյանը, <<Ամբողջ քարոզարշավի ընթացքում և հատկապես քվեարկության օրը, «Քաղաքացիական պայմանագիր» կուսակցության, ինչպես նաև «Հայաստան» և «Պատիվ ունեմ» դաշինքների կողմից ողջ ծավալով կիրառության մեջ դրվեց դեռևս նախորդ ռեժիմի օրոք ձևավորված տխրահռչակ «տասովշչիկների ինստիտուտը», մինչդեռ հենց իշխանության առաջնահերթ պարտականությունն էր ընտրությունները զերծ պահել նման ազդեցություններից>>: Կամ նշվում է, որ երեք ուժերն էլ սեփական մեդիառեսուրսներով լուսաբանվել են, իսկ իրենք գտնվել են անհավասար պայմաններոըմ: Որոշ դրվագներով էլ Գագիկ Ծառուկյանին դարձնում հանցակից<<«Քաղաքացիական պայմանագիր» կուսակցությունը, «Հայաստան» և «Պատիվ ունեմ» դաշինքներն ու «Բարգավաճ Հայաստան» կուսակցությունն անվերահսկելիորեն օգտագործեցին օրենքով թույլատրված չափից հսկայական ծավալով ավելի՝ միլիոնավոր դոլարների ֆինանսական միջոցներ, այդ թվում՝ ընտրակաշառքի տեսքով։ Իշխանության, իրավապահ մարմինների և ընտրական հանձնաժողովների գործողություններն այդ ապօրինությունը կանխելու ուղղությամբ ընդամենը կոսմետիկ բնույթ էին կրում>>:
Բայց այսքանով հանդերձ ՀԱԿ-ում մեղմորեն եզրակացնում են, թե <<ԱԺ արտահերթ ընտրությունները հեռու էին ազատ և արդար լինելուց և որակապես լուրջ նահանջ էին 2018 թ․ ընտրությունների համեմատ։ Չնայած տրված բազմաթիվ խոստումներին և երաշխիքներին, իշխանությունները տապալեցին նաև այս քննությունը՝ արգելակելով Հայաստանի ժողովրդավարական զարգացման ճանապարհը>>
Նիկոլ Փաշինյանին թիվ մեկ պատասխանատու, բայց ոչ մեղավոր հռչակելով իր հոգեւոր հայրը ըստ էության քաղաքական գործարքի հերթական առաջարկն է անում, ըստ ամենայնի նրանց չի գոհացնում 2018-ից հետո ՀՀՇ-ական կադրերին պետական ապարատում տեղավորելու գործընթացի տեմպերը եւ ավելի մեծ թվով պաշտոններ են ուզում:
Անի Սահակյան
Հետևեք մեզ Viber-ում
