Ադրբեջանից Փաշինյանին՝ «դե եկեք, բանակցենք, մեռանք սպասելով ձեր ընտրություններին...»

Մեկ օր անցավ, երբ Ալիևը վերցրեց հեռախոսը և զանգահարեց Պուտինին... Հաջորդ հեռախոսազանգն արդեն Էրդողանից էր...

Ռուսաստանի և Թուրքիայի նախագահներն երեկ հեռախոսազրույցում մի շարք հարցերի հետ միասին մտքեր են փոխանակել նաև Լեռնային Ղարաբաղի շուրջ իրավիճակի վերաբերյալ:

Ռուսական կողմի հաղորդմամբ` դրական գնահատական է տրվել հրադադարի և ռազմական գործողությունների վերահսկման ռուս-թուրքական համատեղ կենտրոնի աշխատանքներին: Ռեջեփ Էրդողանն, ըստ Կրեմլի մամուլի ծառայության, իր աջակցություն է հայտնել Ռուսաստանի ջանքերին` ապահովելու Ռուսաստանի, Հայաստանի և Ադրբեջանի ղեկավարների նոյեմբերի 9-ի և հունվարի 11-ի հայտարարություններում ամրագրված պայմանավորվածությունների ամբողջական կատարումը:

«Վերահաստատվել է համակարգումը շարունակելու փոխադարձ պատրաստակամությունը, ներառյալ տարածաշրջանի տրանսպորտային ենթակառուցվածքների տնտեսական զարգացման և վերականգնման շահերից ելնելով», - ասված է հաղորդագրության մեջ:

Ռուսաստանի նախագահը, հիշեցնենք, երեկ հեռախոսազրույց էր ունեցել Հայաստանի վարչապետի հետ, շնորհավորել էր նրան ընտրությունների հաղթանակի կապակցությամբ, անդրադարձ էր եղել նաև եռակողմ հայտարարությունների դրույթների իրականացման ընթացքին:

Իսկ հունիսի 23-ին, ադրբեջանական կողմի նախաձեռնությամբ Իլհամ Ալիևն ու Պուտինը հեռախոսազրույց էին ունեցել՝ հատուկ ուշադրություն դարձնելով Հարավային Կովկասում հաղորդակցության ուղիների ապաշրջափակման հարցերին։ Ըստ Կրեմլի մամուլի ծառայության հաղորդագրության` «քննարկվել են Ռուսաստանի, Ադրբեջանի և Հայաստանի ղեկավարների Լեռնային Ղարաբաղի հարցով 2020թ. նոյեմբերի 9-ի և 2021-ի հունվարի 11-ի համաձայնությունների իրականացման գործնական հարցերը։ Հատուկ ուշադրություն է դարձվել եռակողմ ձևաչափով աշխատանքների ակտիվացմանը՝ վերականգնելու համար տնտեսական կապերն ու տրանսպորտային հաղորդակցությունը Հարավային Կովկասում»։ Հեռախոսազրույցը կայացել է ադրբեջանական կողմի նախաձեռնությամբ։

Հայաստանում կայացած ԱԺ ընտրություններից ընդամենը 3 օր անց պաշտոնական Բաքուն հստակ հայտարարեց, որ ակնկալում է, որ փոխվարչապետերի մակարդակով ռուս-հայ-ադրբեջանական եռակողմ աշխատանքային խումբը կվերսկսի գործունեությունը Հայաստանում նոր կառավարություն կազմելուց հետո: Այս մասին ասել էր խմբում Ադրբեջանի ներկայացուցիչ, փոխվարչապետ Շահին Մուստաֆաևը: Նա «բավական արդյունավետ» էր որակել եռակողմ խմբի աշխատանքը:

«Հայաստանում ընտրական գործընթաց է, ձևավորվում է նոր կառավարություն: Կարծում եմ, երբ այնտեղ դա կավարտվի՝ եռակողմ խումբը կվերսկսի աշխատանքը»,- ասել է Մուստաֆաևը:

Եռակողմ խումբը զբաղվում է անցած տասնամյակներում Լեռնային Ղարաբաղի հակամարտության կապակցությամբ տարածաշրջանում արգելափակված կոմունիկացիաները վերաբացելու առաքելությամբ: Նկատենք, որ երեք երկրների փոխվարչապետերի մակարդակով աշխատանքային խումբ կազմելու որոշումն ընդունվել է Մոսկվայում 2021թ. հունվարի 11-ին Ռուսաստանի և Ադրբեջանի նախագահներ Վլադիմիր Պուտինի, Իլհամ Ալիևի և Հայաստանի վարչապետ Նիկոլ Փաշինյանի բանակցությունների արդյունքում: Խմբի առաջին հանդիպումը տեղի է ունեցել հունվարի 30-ին Մոսկվայում:

Այսինքն, եռակողմ բանակցությունները դադարել էին՝ հայաստանյան ներքաղաքական կյանքում ընտրությունների պատճառով: Հիմա՝ ընտրություններն ավարտվել են ու Ադրբեջանն արդեն պահանջում է եռակողմ բանակցությունների շարունակություն:
Ի դեպ, հայկական կողմը դադարեցրել էր բանակցություններին մասնակցությունը՝ Ադրբեջանի կողմից ՀՀ տարածք ներխուժելու, լարվածություն մտցնելու պատճառով, մինչդեռ ադրբեջանական կողմը՝ չի հեռացել ՀՀ ինքնիշխան տարածքից, բայց հիմա պահանջում է եռակողմ բանակցությունների վերսկսում:

Այսինքն, մեզ ասում են՝ ինչքան սպասեցինք՝ բավական է, եկեք, նստեք բանակցությունների սեղանին:

Մետաքսյա Շալունց