Պուտինը՝ Էրդողանին ու Ալիևին՝ չմոռանաք, թե ում եք պարտական

Ռուսաստանի նախագահը հերթական անգամ հիշեցրել է, որ ղարաբաղյան երկրորդ պատերազմը կանգնեցրել է Մոսկվան: «Ռուսաստանի վճռորոշ ավանդի շնորհիվ դադարեցվել է Լեռնային Ղարաբաղի հակամարտությունը», - այսօր միջազգային անվտանգության հարցերով մոսկովյան 9-րդ համաժողովի մասնակիցներին և հյուրերին ուղղված տեսաուղերձում ասել է Վլադիմիր Պուտինը: «Ռուս խաղաղապահները հուսալիորեն երաշխավորում են խաղաղությունն ու անվտանգությունը տարածաշրջանում, շատ բան են անում հումանիտար իրավիճակի բարելավման, տարածքի ականազերծման և սոցիալական ենթակառուցվածքների վերականգնման համար», - նշել Է ՌԴ նախագահը:

Վլադիմիր Պուտինն ընդգծել է, որ Ռուսաստանը երբեք չի մոռանում այն պատասխանատվության մասին, որ կրում է հարևան երկրների անվտանգության համար, և մտադիր է հետագայում ևս նպաստել տարածաշրջանային հակամարտությունների կարգավորմանը: Պուտինի խոսքով՝ տարածաշրջանային հակամարտությունների կարգավորումը, որին ակտիվորեն աջակցում է Ռուսաստանը, գլոբալ անվտանգության ապահովման կարևոր ասպեկտ է:

Ռուսաստանի նախագահը հիշեցրել է, որ ռուսական ռազմական օգնության շնորհիվ հաջողվել է ազատագրել Սիրիայի տարածքների մեծ մասը միջազգային ահաբեկիչներից և թույլ չտալ սիրիական պետության փլուզումը, իսկ Աստանայի ձևաչափի շրջանակներում քաղաքական-դիվանագիտական աշխատանքը Թուրքիայի և Իրանի հետ միասին թույլ է տվել սկսել սիրիական կարգավորման գործընթացը ՄԱԿ-ի հովանու ներքո:

Ղարաբաղի մասին այսօր խոսել է նաև Ռուսաստանի արտգործնախարարը իր ադրբեջանցի գործընկերոջ հետ։ Ռուսաստանի արտգործնախարարության տարածած հաղորդագրության համաձայն՝ այսօր տեղի է ունեցել Ռուսաստանի արտաքին գործերի նախարար Սերգեյ Լավրովի և Ադրբեջանի արտգործնախարար Ջեյհուն Բայրամովի հեռախոսազրույցը:

Նախարարները քննարկել են երկկողմ հարաբերությունների, տարածաշրջանային և միջազգային օրակարգի հրատապ հարցեր։ Անդրադարձ է կատարվել մի շարք թեմաների, մասնավորապես, Լեռնային Ղարաբաղում հումանիտար խնդիրների լուծմանը վերաբերող Ռուսաստանի, Ադրբեջանի և Հայաստանի ղեկավարների 2020թ.նոյեմբերի 9-ի և 2021 թվականի հունվարի 11-ի պայմանավորվածությունների իրագործման համատեքստում:
Հեռախոսազրույցի ժամանակ ընդգծվել է Ռուսաստանի, Ադրբեջանի և Հայաստանի փոխվարչապետների համատեղ նախագահությամբ եռակողմ աշխատանքային խմբի կարևոր ներդրումը տարածաշրջանի հետկոնֆլիկտային զարգացման գործում, ասված է Ռուսաստանի արտգործնախարարության տարածած հաղորդագրությունում։
Հիշեցնենք՝ նախօրեին Ադրբեջանի նախագահը հայտարարել էր, որ իր երկիրը պատրաստ է կնքել Հայաստանի հետ խաղաղության պայմանագիր և որ նման առաջարկ պաշտոնական Բաքուն պաշտոնական Երևանին արդեն արել է։

Ըստ ամենայնի, Պուտինը Էրդողանի՝ վերջին օրերի ակտիվ տարածաշրջանային հավակնություններին ի պատասխան, որոշեց հիշեցրեց, թե ով է խաղաղություն ապահովողը այս տարածաշրջանում:

Իրականում, Պուտինը, կարծես, ուղիղ չի պատասխանում Էրդողանին, չնկատելու է տալիս թուրք-ադրբեջանական տանդեմի ռազմաքաղաքական դաշինքի վերածված միությունը: Պուտինը չի անդրադառնում թեմային, որը վերջերս հրապարակ նետեց Էրդողանը՝ այն է, Ադրբեջանում թուրքական ռազմաբազա հիմնելու մասին:

Չնայած այս ամենին՝ Պուտինը հիշեցրել է, որ խաղաղություն ապահովողը՝ Ռուսաստանն է, հետևաբար թուրքական «բազարն» իր հետ պետք է անել, ոչ թե իր լուր Արևմուտքի ՝ ռևերանսներ:

Նկատենք, որ վերջին օրերին Թուրքիայի և Ադրբեջանի բարձրագույն իշխանությունները սկսել են ավելի հաճախ հաճոյանալ ՆԱՏՕ-ին՝ նշելով, թե որքան են կարևորում ՆԱՏՕ-ի հետ հարաբերությունների խորացումը, թե որքան կարևոր կառույց է ՆԱՏՕ-ն նրանց համար:

Ահա, Պուտինը որոշեց հիշեցնել Էրդողանին ու Ալիևին, թե ում են նրանք պարտական պատերազմի դադարեցման համար ու այսօրվա ձևավորված ուժերի հարաբերակցության համար:

Մետաքսյա Շալունց