Ադրբեջանական զորքը հետ է քաշվում, ռուսական զորքը՝ առաջ գալիս
Գեղարքունիքի հայ-ադրբեջանական սահմանի հատվածում ռուս սահմանապահների տեղակայմանն ու սահմանագծից Հայաստանի և Ադրբեջանի զինված ուժերի հետքաշմանն այսօր անդրադարձել է Հայաստանի զինված ուժերի գլխավոր շտաբի պետը։ Լրագրողների հետ ճեպազրույցի ընթացքում Արտակ Դավթյանը հայտնել է, որ այդ հարցի վերաբերյալ դեռ վերջնական որոշում չկա, սակայն, միևնույն ժամանակ համոզմունք հայտնել, թե այդպես է լինելու։
«Վերջնական, երբ որ կլինի և՛ ժամկետի առումով, և՛ կատարման՝ բուն տեխնիկական հարցերով, լրացուցիչ կասվի», - ասաց Դավթյանը։
Ճշտող հարցին, թե ադրբեջանական կողմից համաձայնություն կա՞, քանի որ Դուք վստահ ասում եք, որ լինելու է այդպես, Հայաստանի զինված ուժերի գլխավոր շտաբի պետը պատասխանեց․ - «Մենք մեր տարածքում Ադրբեջանին հարցնելու ոչինչ չունենք, որպեսզի հարցնենք, բայց բանակցություններն ընթանում են ռուսական կողմի հետ, որովհետև կան հարցեր, մեր նպատակը, որ կա, առանց բախումների մեր տարածքում հայտնված ադրբեջանական ստորաբաժանումների հետքաշումն է սահմանում, և ամբողջությամբ մեր տարածքում պետք է իրականացնենք միջոցառումներ։ Անհրաժեշտության դեպքում մենք համագործակցում ենք նաև ռուսական կողմի հետ»։
Մինչդեռ Գեղարքունի մարզպետ Գնել Սանոսյանը երեկ հայտնել էր, թե՝ մոտ ժամանակներս հայ-ադրբեջանական սահմանի Գեղարքունիքի հատվածում ռուս սահմանապահներ են տեղակայվելու, որից հետո Հայաստանի և Ադրբեջանի զինված ուժերը հետ կքաշվեն սահմանագծից։
«Ազատության» հարցին՝ այսինքն՝ պայմանավորվածություն կա՞ ռուսական կողմի հետ, Սանոսյանը պատասխանել էր. «Եռակողմ բանակցություններ են, որին զուգընթաց նաև գործընթաց է գնում։ Իսկ հարցին՝ քանի՞ օրից պետք է տեղակայվեն ռուս սահմանապահները, Սանոսյանն ասել էր. «Մոտ ժամանակներս էդ գործընթացը կավարտեն՝ տեղորոշման և այլն, որից հետո կտեղակայվեն։ Կողմերը պետք է հետ քաշվե՞ն դիրքերից, Սանոսյանը պատասխանել էր՝ «Այո»։
Տեղեկությունն «Ազատության»-ը նաև Անվտանգության խորհրդի քարտուղար Արմեն Գրիգորյանն էր հաստատել, սակայն այլ հարցերի պաշտոնյան հրաժարվել էր պատասխանել։ «Այս պահին հավելյալ որևէ պարզաբանում չեմ կարող տալ, միայն այն է, ինչ մարզպետն ասել է», - ասել է Անվտանգության խորհրդի քարտուղարը։
Հայաստանի տարածք Սյունիքի ու Գեղարքունիքի ուղղություններով ադրբեջանական զորքերի ներթափանցումից հետո Հայաստանի վարչապետն էր առաջարկել զորքերը հայելային եղանակով հետ քաշել Գեղարքունիքի մարզի Սոթքից մինչև Սյունիքի մարզի Խոզնավար և այնտեղ միջազգային դիտորդներ տեղակայել։ Այսօր Զինված ուժերի գլխավոր շտաբի պետն ասաց, որ այս պահին խոսքը միայն ռուս սահմանապահների տեղակայման մասին է։
Արդյո՞ք բանակցություններն ընթանում են նաև Սյունիքի մարզի սահմանային հատվածներում ռուս սահմանապահներ տեղակայելու համար, Սյունիքի մարզպետ Մելիքսեթ Պողոսյանը պատասխանեց՝ ինքը նման տեղեկություններ չունի, բայց կարծում է՝ ադրբեջանցի զինծառայողները հետ են քաշվելու։ «Հանձնաժողով պիտի ստեղծվի, իրենք խախտել են մեր պետական սահմանը, ես կարծում եմ, որ կհեռանան, մոտ ապագայում կհեռանան», - ասաց Պողոսյանը։
Փաստորեն, ընտրությունների ավարտից հետո, Փաշինյանը հնարավորություն կստանա սահմաններում հարաբերական անդորր ապահովելու՝ ռուսական զորքի առկայությամբ:
Այսինքն, ամեն ինչ մնաց ռուսական զորքի վրա, ու սա այն դեպքում, երբ Փաշինյանի իշխանությունը հստակ, պայքարում է ընդդեմ ռուսական ազդեցության:
Բայց Հայաստանի անվտանգության տեսանկյունից՝ Փաշինյանի իշխանությունը ոչ միայն ոչինչ ի վիճակի չէ ձեռնարկել, այլև օրինակ ՀՀ տարածքում մեկ ամսից ավելի ադրբեջանական զորքի առկայության մասին չի էլ խոսում:
Փաշինյանը նախընտրական փուլում 2 շաբաթ «ապագա» էր խոստանում, առանց պարզաբանելու՝ թե ինչու են ՀՀ տարածքում մեկ ամսից ավելի ադրբեջանցիները նստած...
Մետաքսյա Շալունց
Հետևեք մեզ Viber-ում
