Թուրքական «կարկանդակներ»՝ հաղթած Փաշինյանին

Թուրքիայի արտգործնախարարը հույս է հայտնել, թե Հայաստանում անցկացված ընտրությունների արդյունքում Հայաստանում ձևավորվելիք նոր իշխանությունը չի կրկնի նախորդի սխալները։ «Հույս ունենք՝ Հայաստանը կհասկանա, որ տարածաշրջանում կայունության ու խաղաղության ապահովման միակ միջոցը բարիդրացիական հարաբերություններն են իր հարևան երկրների հետ, Հայաստանը պետք է դադարի տարածքային պահանջներ ներկայացնել հարևաններին և սկսի նորմալ հարաբերություններ կառուցել նրանց հետ»,- հայտարարել է Մևլութ Չավուշօղլուն, հավելելով՝ պատերազմից հետո, որի արդյունքում Ադրբեջանն ազատեց իր հողերը, թե՛ Բաքուն, թե՛ Անկարան վճռականորեն պատրաստ են քայլեր ձեռնարկել տարածաշրջանում խաղաղության ու կայունության համար։

Թուրքիայի արտգործնախարարը նաև նշել է, թե երկկողմ հարաբերությունների հաստատումը հնարավորություն կընձեռի բազմաթիվ տարածաշրջանային ծրագրերի իրականացման համար։

Իր հերթին Ադրբեջանի արտգործնախարար Ջեյհուն Բայրամովն էլ Երևանին ուղերձ է հղել...

Ադրբեջանը Հայաստանի հետ հարաբերությունների կարգավորման կողմնակից է, Բաքուն այդ ուղղությամբ Երևանին առաջարկ է արել: «Մեր դիրքորոշումն այդ հարցում հայտնի է, այն անփոփոխ է: Այն բազմիցս արտահայտել է նաև մեր պետության ղեկավարը: Ադրբեջանը, հիմնվելով միջազգային իրավունքի նորմերի և սկզբունքների, տարածքային ամբողջականության, ինքնիշխանության նկատմամբ հարգանքի և միջազգայնորեն ճանաչված սահմանի անխախտելիության վրա, կողմ է հանդես գալիս հարաբերությունների կարգավորմանը, և այդ ուղղությամբ արվել է առաջարկ»,- ասել է Բայրամովն այսօր տեղի ունեցած ճեպազրույցում: Նա նշել է, որ Բաքվի կարծիքով՝ տարածաշրջանային գործակցությունն այլընտրանք չունի:

Անկարայի ու Բաքվի՝ Հայաստանին «կարկանդակներ» առաջարկելու կոչերն, իրականում, միջազգային հանրության աչքին խաղաղության հաստատման ճանապարհին զուտ հայտարարություններ են, որովհետև, Ադրբեջանն ու Թուրքիան նույնիսկ պատերազմից հետո շարունակում են Հայաստանից զիջումեր ակնկալել:

Թուրք-ադրբեջանական դաշինքը շարունակում է պատանդ պահել հայ ռազմագերիներին, իսկ դրա դիմաց բացեիբաց պահանջում են օրինակ ականապատված տարածքների քարտեզները:

Հաջորդը՝ Ադրբեջանը մտել է Հայաստանի հանրապետության ինքնիշխան տարածք՝ բայց ներկայացնում է, թե Հայաստանը պետք է քայլ անի, որպեսզի ապաշրջափվեն սահմանները: Այսինքն՝ դարձյալ ՀՀ-ից պահանջվում են տարածքային զիջումներ:

Ու այս ամենը, բնականաբար, կապվում է Հայաստանում կայացած ընտրությունների հետ: Այսինքն՝ Էրդողանն ու Ալիևը ԱԺ արտահերթ ընտրություններից հետո կոնկրետ Փաշինյանից քայլ են ակնկալում ու սպասում են:

Մետաքսյա Շալունց