Էրդողանը Պուտինից Զանգեզուրի հարցով որոշման է սպասում

Թուրքիայի նախագահ Ռեջեփ Թայիփ Էրդողանը երեկ հայտարարել է, որ Ռուսաստանը դրական վերաբերմունք ունի «Զանգեզուրի միջանցքի» գաղափարի նկատմամբ: Նա ասել է, թե չի տեսնում որևէ ազդակ, որը կվկայեր այդ ծրագրի հանդեպ Ռուսաստանի բացասական դիրքորոշման մասին:

«Մենք «Զանգեզուրի միջանցքի» նախագիծը շատ կարևոր ենք համարում, չեմ ենթադրում, որ Ռուսաստանի մոտ կլինեն այդ հարցի հետ կապված ինչ-որ տարաձայնություններ կամ ծրագիրը խոչընդոտելու մտադրություն: Ընդհակառակը, Ռուսաստանը շատ դրական է տրամադրված միջանցքի հարցում», - ասել է Էրդողանը թուրքական NTV հեռուստատեսության թղթակցի հետ զրույցում:

Նա հայտնել է, որ առաջիկայում Ադրբեջանի նախագահ Իլհամ Ալիևը բանակցելու է Ռուսաստանի նախագահ Վլադիմիր Պուտինի հետ: «Ես էլ եմ շուտով նրա [Վլադիմիր Պուտինի] հետ հանդիպելու:

Կա մի հանգամանք՝ հիմա մենք սահմանափակված ենք [Լեռնային Ղարաբաղում հրադադարի հաստատման] պայմանագրի հինգ տարվա ժամկետով: Եվ մենք կցանկանանք այդ նախագիծն իրականացնել հենց այդ հնգամյա ժամկետում»,- ասել է Էրդողանը:

Թուրքիայի ղեկավարը վերստին հիշեցրել է Ղարաբաղի հարցով համագործակցության վեց պետությունների պլատֆորմի գաղափարի մասին: «Այդ ծրագրի առաջատար երկրներն են Ռուսաստանը, Թուրքիան, Ադրբեջանը և Իրանը, բայց մենք կցանկանայիք, որ նախաձեռնությանը միանան նաև Հայաստանը և Վրաստանը»,- հայտարարել Էրդողանը, նշելով, որ Վրաստանը դրական վերաբերմունք ունի պլատֆորմի հարցում:
Ուրեմն, Էրդողանը, ոչ ավել, ոչ պակաս ֆիքսում է, որ Մոսկվան դեմ չի «Զանգեզուրի միջանցքին», սա այն դեպքում, երբ պաշտոնական Երևանը՝ Փաշինյանի մակարդակով շարունակում է պնդել, որ Հայաստանը ոչ մի «միջանցքային» առաջարկի չի համաձայնվի:
Հիմա, ինչ է ստացվում, որ Անկարան հասկացնել է տալիս, որ գիտի, որ Մոսկվան դեմ չի, մյուս կողմից ստիպում է ռուսական կողմին կոնկրետ արտահայտվել: Ռուսական կողմն էլ առայժմ, այսպես ասած՝ ոչ հերքել է, ոչ հաստատել, իսկ լռությունը ընդունված է համաձայնության նշան համարել:

Մյուս կողմից էլ, Էրդողանը չի բացառել Ադրբեջանում թուրքական ռազմակայանի ստեղծումը...

Թուրքական NTV հեռուստատեսության փոխանցմամբ, նախագահ Ռեջեփ Թայիփ Էրդողանը չի բացառում Շուշիում կնքված հռչակագրով Ադրբեջանի տարածքում թուրքական զինուժի ռազմակայան ստեղծելու հնարավորությունը: «Այդ տարբերակը տեղավորվում է Շուշիի դեկլարացիայի շրջանակներում: Խնդիրը հնարավոր է քննարկել: Կարծում եմ` դա տեղի կունենա նաև Ադրբեջանի և Ռուսաստանի նախագահներ Իլհամ Ալիևի և Վլադիմիր Պուտինի խորհրդակցությունների ընթացքում, և մեր բանակցությունների ընթացքում էլ կարող է քննարկվել»,- ասել է Էրդողանը: Նա ընդգծել է, որ հիմա առաջնահերթ խնդիրն է անվտանգություն ապահովել Ադրբեջանի սահմանների ողջ երկայնքով:

Այսինքն, հունիսի 15-16-ը Էրդողանը Շուշիում Ալիևի հետ կնքել է մի հռչակագիր, որի դրույթներից մեկը ենթադրում է ռազմական փոխգործակցություն այն դեպքում, եթե գոյանում է սպառնալիք կողմերից մեկի անվտանգությանը կամ ինքնիշխանությանը:

Եվ այս դեպքում էլ՝ Էրդողանը տպավորություն է ստեղծում, որ այս հարցն էլ Պուտինի հետ համաձայնեցրել է, կամ այն համաձայնեցման փուլում է գտնվում:

Մետաքսյա Շալունց