Իշխանությունը պահելու համար Փաշինյանը պատրաստ է նոր զոհերի

Նախընտրական քարոզարշավը մոտենում է վերջնահանգրվանին եւ Հանրապետության հրապարակում Նիկոլ Փաշինյանի հրավիրած <<մեծ>> հանրահավաքից հետո այլեւս աներկբա է, որ այս մարդը մեզանում իշխանություն չունի: Տարիներ շարունակ Սերժ Սարգսյանին եւ իր իշխանությանը վարչական ռեսուրսն օգտագործելու համար անխնա քննադատած ընդդիմադիր Փաշինյանն այսօր ժողովրդի վարչապետի կարգավիճակում նույնն է անում ՝ հատելով նույնիսկ անթույլատրելի սահմանը: Ողջ օրը մենք լսում ու այլեւս չէինք զարմանում, թե ինչպես էր պետական հաստատություններում <<տրիվոգ>> հայտարարած: Նիկոլ Փաշինյանը մարզպետների, նախարարների միջոցով հրահանգել էր դպրոցների, մանկապարտեզների, քաղաքապետարանների ու գյուղապետարանների, պետական բոլոր հաստատությունների աշխատակազմերին ներկա գտնվել, հակառակ դեպքում սպառնացել էին, որ կզրկվեն աշխատանքից:

Սակայն հանրահավաքից հետո պարզ դարձավ, որ այս մարդը հանուն իր աթոռը պահելու ոչ մի բանի առջեւ կանգնողը չէ եւ Հրապարակ էր բերել մինչեւ անգամ Սեւանի հոգեբուժարանի հիվանդներին: Համացանցում հայտնված կադրերից երեւում է, որ հոգեբուժարանից 4-5 գազել մարդ են բերել: Նիկոլ Փաշինյանն իր աթոռի համար պատրաստ է վտանգել անգամ իր աջակիցներին եւ նրանց մեջ հանել հոգեկան խնդիրներ ունեցող մարդկանց: Թերեւս պատահական չէր հանրահավաքի ընթացքում բռնցքամարտի տեսարաններն ու փողոցային լեքսիկոնը, որը դրսեւորում էին Փաշինյանի աջակիցները:
Չնայած իշխանության տիտանական ջանքերի՝ այս մարդկանց ակկնկալիքներն ակնհայտորեն չարդարացան եւ Հարապարակում ըստ իրենց իրավապաշտպան Դանիել Իոաննիսյանի հաշվարկի ընդամենը 21 հազար մարդ էր հավաքվել: Սա ավելին է , քան խայտառակությունը: Ընդամենը երեք տարում մսխել ժողովրդի վստահությունը եւ լեփ-լեցուն Հրապարակը փոխարինել մի քանի հազար մարդով, այն էլ՝ պարտադրաբար բերված, այն էլ ինչպիսի գտածոներ: Օրինակ մեկը Փաշինյանին համեմատում էր Հիսուսի հետ եւ ասում, որ նա էլ զոհաբերվեց հանուն մեր փրկության: Մեկ ուրիշն էլ համառորեն վստահեցնում, որ Արցախի շրջաններն Ադրբեջանին հանձնելու մասին հայտարարությունը ոչ թե Նիկոլ Փաշինյանն է ստորագրել 2020-ի նոյեմբերի 9-ին, այլ փաստաթուղթը ստորագրվել է 1991-92թթ:
Ինչ վերաբերում է Նիկոլ Փաշինյանին ու իր թիմին, ապա մեկ անգամ եւս հուսահատ փորձեր արվեցին փրկել իշխանությունը: Փաշինյանը խոստացավ, որ բոլոր գերիները վերադառնալու են, թե ինչն էր խանգարում նրանց վերադարձնել մինչ օրս, այդ մասին չասաց:

Ասաց, թե քարոզարշավի ընթացքում ժողովուրդն իրենց ընդունեց այնպես, ինչպես ընդունում են գերությունից վերադարձած հարազատին: Հարկ չհամարեց հիշել սյունյաց ողջունների մասին, չխոստովանեց, որ աղուհացով դիմավորողներն էլ իր պաշտոնյաների հարազատներն ու բարեկամներն են եղել, իսկ ոտքերի տակ մատաղ անողներն էլ իր հարազատները: Եւ, ի վերջո, այդ հյուրընկալությունների վերջնարդյունքը պետք է երեւար Հանրապետության հրապարակում, որտեղ ինչպես նշեցինք մեծ ջանքերի արդյունքում փոքր հանրահավաք ստացան: Չնայած դրան Փաշինյանն ու իր թիմը ցնծությամբ տարածում էին հանրահավաքից մի լուսանկար, որն արվել էր մեկ մարդու կողմից եւ այնպիսի ռակուրսից, որ հնարավորինս մարդաշատ է երեւում: Իշխանականները պարծենում էին հավաքված ժողովրդի քանակով՝ չգիտակցելով, որ այդ հրապարակում հավաքվածների մոտ կեսի չափ իրենց իշխանությունը զոհաբերել է:

Իսկ քարոզարշավի վերջին օրերը ցույց են տալիս, որ իշխանությունը հանուն աթոռը պահելու պատրաստ է նոր զոհերի: Եղեգնաձորում Հայաստան դաշինքի ներկայացուցչին սամասուդ անելը ասվածի վկայությունն է:

Անի Սահակյան