Բաքվից առաջին ՆԱՏՕ-ական «ծիծեռնակները»՝ Պուտին-Բայդեն հանդիպումից հետո

Երեկ կայացավ համաշխարհային նշանակության ու կարևորության մի իրադարձություն. Վլադիմիր Պուտինն ու Ջո Բայդենը հանդիպեցին:

Հանդիպման արդյունքների մասին 2 կողմերն են չափավոր լավատեսությամբ հանդես եկան: Ամերիկացի և ռուս դեսպանները վերադառնում են Վաշինգտոն և Մոսկվա, հայտնեց Ռուսաստանի նախագահ Վլադիմիր Պուտինը Ժնևում: «Ես համարում եմ, որ հանդիպումը կոնստրուկտիվ էր, երկու կողմն էլ ցույց է տվել միմյանց հասկանալու ցանկություն», - նշել է Ռուսաստանի նախագահը:

ԱՄՆ և Ռուսաստանի նախագահների բանակցությունները Ժնևի Villa La Grange դղյակում ավարտվել են քիչ առաջ, տևել են մոտ 4 ժամ: Հանդիպումը նախ նեղ շրջանակով էր, հետո նաև՝ ընդլայնված: Առանձին հանդիպում Պուտինն ու Բայդենը չեն ունեցել: Նեղ շրջանակով հանդիպմանը ներկա են եղել ԱՄՆ պետքարտուղարն ու Ռուսաստանի արտգործնախարարը: ՏԱՍՍ գործակալության փոխանցմամբ՝ հանդիպումը սկսելիս Վլադիմիր Պուտինը շնորհակալություն է հայտնել Ջո Բայդենին երկկողմ գագաթնաժողով անցկացնելու նախաձեռնության համար, Բայդենն էլ ի պատասխան հայտարարել է, որ հույս ունի խոսել ինչպես պոտենցիալ համագործակցության ոլորտների, այնպես էլ տարաձայնությունների մասին:

Ռուս և ամերիկացի առաջնորդներն իրենց համար ավելի կարևոր այլ հարցերի շարքում, ամենայն հավանականությամբ, քննարկել են նաև ղարաբաղյան խնդիրը, ինչպես ավելի վաղ էր հաղորդվել:Նախօրեին Ռուսաստանի նախագահի օգնական Յուրի Ուշակովն ասել էր, որ Ղարաբաղն ընդգրկված է տարածաշրջանային թեմաների ցուցակում, որոնք նախատեսում են քննարկել Ջո Բայդենն ու Վլադիմիր Պուտինը:

Նկատենք, որ Վաշինգտոնը հայտարարել է, որ ողջունում է անցած տարի նոյեմբերի 10-ին կնքված եռակողմ համաձայնագիրը, սակայն բացառված չեն տարաձայնությունները՝ ԵԱՀԿ ՄԽ-ի, ինչպես նաև Լեռնային Ղարաբաղի կարգավիճակի, ինչպես նաև ռուս խաղաղապահների հարցով:

Ռուսաստանի և ԱՄՆ-ի միջև առկա հակասությունները հասկանալու համար պետք է նստել և խոսել, հայտարարել է Ռուսաստանի նախագահի մամուլի քարտուղար Դմիտրի Պեսկովը՝ բանակցություններից առաջ: Նրա խոսքով՝ Մոսկվային զսպելու Վաշինգտոնի կոչերը չեն թեթևացնում մթնոլորտը երկու երկրների նախագահների հանդիպումից առաջ: «Մենք բոլորս լսում ենք խոսքեր այն մասին, որ Մոսկվան ստիպված կլինի վճարել դրա համար, այս ամենն, իհարկե, չի թեթևացնում ընդհանուր մթնոլորտը, բայց նորից կրկնեմ՝ ամեն դեպքում խոսելու մտադրություն ունի երկու կողմը՝ և՛ նախագահ Պուտինը, և՛ նախագահ Բայդենը», -նշել է Պեսկովը:

Կրեմլի ներկայացուցչի կարծիքով՝ հասկանալու համար, թե որքանով են երկու երկրների նախագահները տարակարծիք և որքանով են կրիտիկական Ռուսաստանի և ԱՄՆ-ի միջև հակասությունները, պետք է նախ նստել և խոսել:

Սա Բայդենի և Պուտինի առաջին հանդիպումն է Ջո Բայդենի՝ ԱՄՆ նախագահի պաշտոնը ստանձնելուց ի վեր: Ե՛վ Վաշինգտոնը, և՛ Մոսկվան ռուս-ամերիկյան արդի հարաբերությունները որակում են որպես կրիտիկական:

Պուտին-Բայդեն հանդիպումն անցավ երկու երկրների միջև լարվածության կտրուկ սրման ֆոնին. ԱՄՆ-ն Ռուսաստանին մեղադրում է նախագահական ընտրություններին միջամտելու մեջ և կիբերհարձակումների համար: Ռուսաստանն այդ մեղադրանքները անհիմն է համարում և հայտարարում, որ ԱՄՆ գործողությունները միջազգային ասպարեզում մեծացնում են անկայունությունն աշխարհում:

Պուտին-Բայդեն հանդիպումը, ըստ էության, կայացավ թուրք-ադրբեջանական տանդեմի՝ մեր տարածաշրջանում ամրապնդման ֆոնին: Շուշիում կնքվեց թուրք-ադրբեջանական ռազմական դաշինք:

Սա նոր իրավիճակ է Ռուսաստանի համար: Հիմա Ադրբեջանն, անկասկած, դեպի արևմուտք ռևերանսներ կանի: Մոսկվային, անկասկած, դուր չեն գա թուրք-ադրբեջանական դաշինքնի նոր ռևերանսները ՆԱՏՕ-ին:

Ի դեպ, երեկ արդեն ադրբեջանցի բարձրաստիճան պաշտոնյաների մեկը՝ Հիքմեթ Հաջիևը հայտարարել է, թե Ադրբեջանը պատրաստ է ՆԱՏՕ-ի համագործակցության ուղղությամբ:
Ահա, առաջին «ծիծեռնակները»՝ թուրք-ադրբեջանական ռազմական դաշինքի կնքումից հետո:

Մետաքսյա Շալունց