Այս տղան չի հասկանում, որ գյուղատնտեսությամբ կարող է զբաղվել նաև քաղաքաբնակը

Երկրորդ նախագահ Ռոբերտ Քոչարյանը մի քանի անգամ հայտարարել է, որ իր իշխանության գալու պարագայում անպայման վերականգնվելու են մի քանի նախարարություններ, մասնավորապես գյուղատնտեսության նախարարությունը, որը Նիկոլ Փաշինյանի հետհեղափոխական <<ռեֆորմների>> շրջանակում կրճատվեց՝ ներառվելով էկոնոմիկայի նախարարության կազմում։
Եվ ահա Նիկոլ Փաշինյանի կառավարության թիվ երկու էքսցենտրիկը, առաջինը Նիկոլն է, հակադարձել է այս պնդմանը, նշելով, թե գյուղնախարարության բացակայությունը բացասաբար չի անդրադարձել ոլորտի վրա։

«Նախքան խոսելը այն մասին, որ գյուղատնտեսության նախարարության բացակայությունը բացասաբար է ազդում ոլորտի վրա, պետք է թվերին նայել: Գյուղատնտեսությունն այն ոլորտներից մեկն էր, որտեղ 2020 թվականին «լավ ցուցանիշներ» էին գրանցվել։ Այս տարի ակնկալում ենք, որ այդ ոլորտում տպավորիչ աճ կլինի, քանի որ գյուղատնտեսական ծրագրերը, որոնք սկսվել են դեռևս 2019 թվականից՝ հիմա են ռեալ արդյունք տալիս: Այդ ամենը կերևա արտահանման, ինչպես նաև գյուղատնտեսական համախառն ծավալներում»,- լրագրողների հետ հարցազրույցում հայտարարել է էկոնոմիկայի նախարարի պաշտոնակատար Վահան Քերոբյանը:
Նրա խոսքով՝ անցյալ տարի լուրջ աջակցություն է ցուցաբերվել սննդի արդյունաբերությանը, ինչի արդյունքում ոլորտի ներկայացուցիչները կկարողանան հնարավորինս մեծ քանակությամբ գյուղմթերք ձեռք բերել: Ծրագրեր են իրականացվել նաև ինտենսիվ պտղատու այգիների հիմնման ոլորտում: <<Գյուղատնտեսության ծավալները ինձ չեն բավարարում, քանի որ այս ոլորտն արտադրողականության առումով ամենացածրերից մեկն է: Մենք պետք է ամեն բան անենք, որպեսզի գյուղատնտեսության ոլորտում աշխատող մարդիկ աղքատությունից դուրս գան եւ սկսեն արժանապատիվ ապրել», - նշել է նա:
Փաստն ինքնին, որ էկոնեմիկայի նախարարը ոլորտի առաջըթացի մասին է խոսում՝ չներկայացնելով որևէ կոնկրետ փաստ կամ վիճակագրական տվյալ, չափազանց խոսուն է։
Երբ նախարարը խոսում է գյուղատնտեսության ոլորտում աշխատող մարդկանց աղքատությունից դուրս գալու մասին, ապա պետք է առնվազն վերլուծություն ունենա, թե այսօրվա դրությամբ այդ ոլորտում աշխատողները ինչպիսի եկամուտներ ունեն և ինչն է պատճառը, որ գյուղատնտեսությամբ զբաղվելով հանդերձ աղքատ են։ Ըստ էության աղքատության մասին խոսելիս Քերոբյանը նկատի է ունեցել գյուղաբնակներին, որոնք ենթադրաբար ապրելով գյուղում զբաղվում են նաև գյուղատնտեսությամբ։ Գործունեության ընթացքում բացառիկ տկարամտությամբ աչքի ընկած այս տղան թերևս չի հասկանում, որ գյուղատնտեսությամբ կարող են զբաղվել նաև քաղաքաբնակները։ Եվ երբ խոսվում է գյուղատնտեսության, որպես տնտեսության ճյուղի զարգացման մասին, ապա պետք է նաև կարևորել դրա եկամտաբերությունը և պետության վարած քաղաքականությունը՝ գյուղոլորտին աջակցելու մասով։
Վերադառնալով Քերոբյանի ասած տպավորիչ աճին, նշենք, որ ըստ վիճակագրական կոմիտեի տվյալների՝ 2020թ. գյուղատնտեսության ոլորտում համախառն ներքին արդյունքի 1.4 տոկոս աճ է գրանցվել: Ի համեմատ գյուղոլրտի զարգացման իրական հնարավորությունների՝ սա մեծ թիվ չէ։ Բայց եթե նախարարը տպավորվել է, ինչ կարող ենք անել։ Տպավորվող են, հո զոռով չի։

Հայկ Դավթյան