Արարատ Միրզոյանը հաստատեց իր ԱԱԾ գործակալ լինելը, շարունակությունը կլինի ավելի ուշ

Ազգային ժողովի նախագահ Արարատ Միրզոյանը հարցազրույց է տվել «Ազատություն» ռադիոկայանին եւ անդրադարձել դեռեւս հունվարի 17-ին Սուրբ Աթոռում ՀՀ նախկին դեսպան Միքայել Մինասյանի կողմից հրապարակված փաստաթղթին, որով արձանագրվում էր, որ 2007 թվականին Միրզոյանը հավաքագրվել է ՀՀ ԱԱԾ–ի կողմից՝ դառնալով կրկնակի գործակալ, քանի որ, ըստ Մինասյանի, Միրզոյանը նախապես աշխատել է թուրքական հատուկ ծառայությունների հետ, որի բացահայտումից հետո էլ հայկական ԱԱԾ–ն հավաքագրել է Միրզոյանին։ Միրզոյանը այդ ժամանակ նշված տեղեկատվությունը որակել էր «սուտ մատնություն» ։
Եվ ահա ավելի քան 6 ամիս անց, Նիկոլ Փաշինյանի թիմակիցը, երկրի երկրորդ առաջին քաղաքական պաշտոնը զբաղեցնող անձը հերքում է իր նախկինում հերքածը՝ հաստատելով ժամանկին հրապարկված փաստաթղթի իսկությունը։
<<Այո, նման փաստաթուղթ գոյություն ունի>>,- հայտարարել է Միրզոյանը։ Ըստ նրա ներկայացրած մեկնաբանության՝
Ազգային անվտանգության ծառայությունն է իրեն դիմել Հայոց ցեղասպանության 100–րդ տարելիցին ընդառաջ իրենց աջակցելու համար` «որպես Հայոց ցեղասպանության թանգարան–ինստիտուտի ասպիրանտի եւ գիտաշխատողի, ՀՀ ազգային արխիվի հասարակական–քաղաքական փաստաթղթերի բաժնի աշխատակցի, որպես պատմաբանի, ով այդ շրջանում Ցեղասպանությանը անդրադարձող, Ցեղասպանության տարբեր հիմնահարցերին վերաբերող հոդվածներ էր գրում նաեւ արտասահմանյան պարբերականներում»։
Ըստ Արարատ Միրզոյանի՝ դա եղել է Ռոբերտ Քոչարյանի իշխանության անցումային շրջանում։
Եթե հիշում եք՝ Միքայել Մինասյանի հրապարակած փաստաթղթում Արարատ Միրզոյանը ԱԱԾ-ին ուղղված իր ագենտ դառնալու մասին դիմումը գրել է 2007 թվականի նոյեմբերի 7-ին։ Մինչդեռ, ըստ ՀՀ ԱԺ կայքում հրապարկված Արարատ Միրզոյանի կենսագականի՝ նա այդ ժամանակ Հայոց ցեղասպանության թանգարան–ինստիտուտի գիտաշխատող այլեւս չի եղել։ Արարատ Միրզոյանը 2003-2005թթ. եղել է ՀՀ ԳԱԱ Հայոց ցեղասպանության թանգարան-ինստիտուտի կրտսեր գիտաշխատող, 2005-2007թթ.՝ Հայաստանի ազգային արխիվի հասարակական-քաղաքական փաստաթղթերի բաժնի գլխավոր արխիվագետ, իսկ 2007-2010 թվականներին աշխատել է «Էյչ-Էս-Բի-ՍԻ Բանկում։ Այսինքն՝ 2007 թվականին, ԱԱԾ ագենտ դառնալուց հետո նա դարձել է բանկի աշխատակից։ Ավելին՝ չկան կոնկերտ փաստեր, որոնք վկայում են, թե նա 2007-ից հետո գիտական հոդվածներ է հրապարակել ցեղասպանության թեմայով։
Փաստն ինքնին, որ Արարատ Միրզոյանը նախ հերքում էր իր ԱԱԾ լրտես լինելու հանգամանքը, իսկ այժմ հաստատում է, արդեն բավական խոսուն է։ Անշուշտ, իմաստ չունի հերքել անհերքելին։ Հասկանալի է նաև, որ Արարատ Միրզոյանը բաց տեքստով չէր հայտարարելու, թե ինքնն աշխատել է թուրքական հատուկ ծառայությունների համար։ Թեպետ ով իմանա, գուցե մի օր կհաստատի նաև այդ փաստը։

Հայկ Դավթյան