Փաշինյանը նոր աղանդ է ձեւավորում

Նիկոլ Փաշինյանի վերջին օրերի քարոզարշավը հուշում է, որ այս մարդը չի պատրաստվում հանգիստ թողնել իշխանությունը եւ գնալու է ցանկացած բախման, սրացման եւ ուժ է կիրառելու սեփական ժողովրդի դեմ: Ասվածի վառ ապացույցներից մեկն էլ այն անտաղանդ թատրոնն էր Փաշինյանի բեմադրությամբ, թե իբր աջակիցներից մեկից մուրճ է ստացել ու պատգամ, թե իբր «թավշե մանդատն այս ընտրություններում փոխարինեք պողպատով»: Փաշինյանն էլ մի քանի օր է իր հանդիպումներին ման է տալիս մուրճը, ցուցադրում՝ ասելով, որ դա պողպատե մանդատ է։
«Նրան, ում պետք ա հանել, էս պողպատե մադատով կարելի ա հանել, էնտեղ, որտեղ պետք ա մխել, էս մանդատով կարելի ա մխել»։ Սա ոչ այլ ինչ է, քան սպառնալիք ՀՀ քաղաքացուն ուղղված եւ տարակուսելի է, որ մինչ օրս եվրոպական իբր ժողովրդավարական կառույցները չեն արձագանքել Փաշինյանի այս գժությանը: Իհարկե, տեղական կազմակերպություններից վաղուց արդեն հույս չկա, դրանք կարելի է ասել լուծարվել են հեղափոխությունից հետո, քանզի իրենց տերերի ակնկալիքն իրականացված է, Հայաստանը քանդված, Արցախը հանձնված եւ այդ ՀԿ-ների համար մարդու իրավունքներն այլեւս խնդիր չէն:

Չենք կարող ակնկալել նաեւ, որ իրավապահ մարմինները, ուժայինները կարող են կանխել փաշինյանական սպառնալիքները, այս կառույցներն էլ իրենց ղեկավարներով վաղուց տեղավորվել են Փաշինյանի գրպանում:
Սակայն Փաշինյանի վերջին հայտարարություններն արդեն իսկ հուշում են, որ այս մարդը ինչպես իր քաղաքապետ թիմակիցն է բնորոշել, հոգեկան առողջության հետ լուրջ խնդիրներ ունի: Օրինակ Խոր Վիրապում նա ղժղժում էր, որ Հայաստանում այլեւս չպետք է լինի խոզակերպ իշխանությունը, միգուցե Փաշինյանը նկատի ունի, որ շուտով իրենք գնալու են իշխանությունից եւ, այո, այլեւս չի լինի խոզակերպ իշխանություն: Կամ՝ Փաշինյանը վերջին օրերին հաճախ է մեջբերումներ անում Աստվածաշնչից կամ էլ անհարկի շահագործում է Աստծո անունը.<< Հունիսի 20-ը ձեր խոսելու օրն է, հունիսի 20-ը Աստծո խոսելու օրն է, որովհետև ձայն բազմաց՝ ձայն Աստծո»,- երեկ հայտարարել է Նիկոլ Փաշինյանը: Վերջին բոլոր հանդիպումներին նա առանց բացառության հնչեցնում է աստծո անունը:
Մասնագետները պնդում են, որ Աստծո անունը հաճախակի հնչեցնողներն ու աստվածաշնչյան ցիտատներ անողները տոտալիտար աղանդի ներկայացուցիչներ են կամ նպատակ ունեն ստեղծել տոտալիտար քաղաքական աղանդներ, որոնց նպատակն է ժողովրդին տանել մասսայական փսիխոզի, հանգեցնելով մասսայական ինքնասպանությունների:

Անի Սահակյան