Սերժ Սարգսյանը իրական կոմպրոմատը չի հրապարակել. սենսացիոն ձայնագրության հետքերով

Սերժ Սարգսյանն այսօր հրապարակեց խոստացած ձայնագրությունը, որում Նիկոլ Փաշինյանը պատմում է Արցախի թեմայով իր զրույցը Պուտինի, Նազարբաեւի ու Լուկաշենկոյի հետ: Վերջիններս ասում են, որ ժամանակն է, օգտվելով Փաշինյանի մեծ ժողովրդականությունից, լուծել Ղարաբաղի հարցը, առաջարկում են Լավրովի պլանը, ասում են, թե հայկական զորքը դուրս է բերվում, իրենք են զորք բերում, որ Ալիեւը հասկանում է, որ Ղարաբաղը երբեք չի կարող լինել Ադրբեջանի կազմում եւ այլն: Ձայնագրության մեջ Փաշինյանն ասում է, որ այդ դեպքում պետք է թղթի վրա արձանագրել այդ հանգամանքը, սակայն եռյակն ասում է, որ Ալիեւն այդ դեպքում դավաճան կհամարվի: Փաշինյանն էլ ասում է, որ համաձայն չէ, եւ իրեն գժի տեղ դնելու գնով էլ լինի՝ հրաժարվելու է այդ տարբերակից: Այդտեղ ձայնագրությունն ավարտվում է, եւ Սերժ Սարգսյանն իր կողմից ավելացնում է, որ այս մարդը հեչ էլ գիժ չի, եւ ուզում է զրոյացնել բանակցային փաստաթղթերը:
Հիշեցնենք, որ Նիկոլ Փաշինյանը,  երեկ պատասխանելով Սերժ Սարգսյանին, վերջինին մեղադրել էր զինվորներից գողացած փողերը խաղատներում պարտվելու համար, Սերժ Սարգսյանն էլ երեկ ասաց՝ 24 ժամ է տալիս փաստերի համար, այլապես ինքը Փաշինյանի ու նրա ընտանիքի մասին աղաղակող փաստեր կհրապարակի։ Ինչպես տեսնում եք՝ հրապարակված ձայնագրությունը ամենեւին չի վերաբերում ընտանիքին: Մեզ հայտնի է դարձել, որ սա իրական կոմպրոմատը չէ, այլ նախազգուշացնող կրակոց, ինչը մեծապես ազդել էր Փաշինյանի վրա, նա էլ ըստ էության այլ բան էր սպասում եւ այսօրվա քարոզարշավին բավականին զուսպ էր: Իրական կոմպրոմատը երրորդ նախագահի թիմը դեռեւս պահում է: