Փաշինյան-Ալիև՝ 100 տոկոսանոց շահերի համընկնում. Նախընտրական մարազմ

Բաքուն համաձայն է Ռուսաստանի առաջարկին` Հայաստանի հետ սահմանագծման ու սահմանազատման հարցով եռակողմ հանձնաժողով ստեղծելու մասին, նախօրեին հայտարարել է վարչապետ Ալի Ասադովը ԱՊՀ վարչապետերի նիստում:

«Մենք պատրաստ ենք Հայաստանի հետ սահմանագծման հարցը լուծել կառուցողական ճանապարհով», -նշել է Ադրբեջանի կառավարության ղեկավարը: «Սահմանագծումը և սահմանազատումը տեխնիկական գործընթաց է, որը պետք է լուրջ միջազգային-իրավական հենք ունենա», - ընդգծել է նա:

Ասադովը նաև Ադրբեջանի հավատարմությունն է հայտնել տարածաշրջանում կայուն խաղաղությանն ու անվտանգությանը, այդ թվում` «հետկոնֆլիկտային իրավիճակի կարգավորմանը և տարաձայնությունների լուծմանը դիվանագիտական ճանապարհով` նոյեմբերի 10-ի և հունվարի 11-ի հայտարարությունների բարեխիղճ իրականացման համատեքստում»:

Նկատենք, որ այս հայտարարությունը հնչեց Փաշինյանի առաջարկից հետո, երբ նա Բաքվին առաջարկել էր հայելային եղանակով ետ քաշել զորքերը և ռուս կամ`միջազգային դիտորդներ տեղակայել հայ-ադրբեջանական սահմանի Սոթք-Խոզնավար հատվածում:
Մեզ համար Ռուսաստանի և ԵԱՀԿ Մինսկի խմբի առաջարկությունները սահմանային իրադրության հանգուցալուծման վերաբերյալ ընդունելի են, նախօրեին «Քաղաքացիական պայմանագիր» կուսակցության Ապարանի գրասենյակում ասաց Փաշինյանը. «Մենք կարծում ենք, այդ առաջարկները ընդունելի են և կոնկրետ առաջարկներ ենք տվել՝ ինչպես գործնականում իրականացնել այդ առաջարկությունները։ Մեզ համար ընդունելի են նաև ԵԱՀԿ Մինսկի խմբի առաջարկությունները։ Ռուսաստանը նույնպես համանախագահ երկիր է և այդ առաջարկությունների վերաբերյալ կա կոնսենսուս: Հարցը վերաբերում է նրան, որ ԵԱՀԿ Մինսկի խմբի համանախագահները առաջարկում են, որ և՛ Հայաստանի, և՛ Ադրբեջանի զորքերը հայելային դուրս բերվեն սահմանային գծից և բերվեն մշտական տեղակայման վայրեր, որից հետո միջազգային հովանու ներքո սկսվի Հայաստանի սահմանների սահմանագծման աշխատանքը»։

Նկատենք, որ ԵԱՀԿ Մինսկի խմբի եռանախագահները մայիսի 28-ին հայտարարություն էին տարածել՝ նշելով. «Մենք երկու կողմերին կոչ ենք անում անհապաղ քայլեր ձեռնարկել՝ ներառյալ զորքերի հետքաշման, իրավիճակի լիցքաթափման և սահմանը խաղաղ գծելու ու սահմանազատելու բանակցություններ սկսելու համար»: Արդեն Սպիտակում էլ Փաշինյանն ընդգծեց «սահմանային հետագա էսկալացիա թույլ չենք տալու»՝ հավելելով, - «մենք ամեն վայրկյան պատրաստ ենք հայելային եղանակով զորքերը հետ քաշել և միջազգային հովանու ներքո սկսել սահմանների սահմանագծման աշխատանքը»:

Փաստորեն, Փաշինյանը Ադրբեջանի կողմից ռազմագերիների պահման, նոր գերիներ վերցնելու ֆոնին, որոշել է նախընտրական քարոզարշավի գլխավոր «ձեռքբերում» ներկայացնել նաև հայ-ադրբեջանական սահմանի դեմարկացիայի և դելիմիտացիայի պրոցեսը: Ավելին՝ պարզվում է, որ նա այդ պրոցեսի խորությունն իսկապես չի էլ ընկալում, հակառակ դեպքում չէր խոսի՝ ՀՀ տարածքում սարերի վրա առկա ձյան շերտերի ու դրանց անկարևորության մասին:

Հիմա Փաշինյանն ասում է, թե որևէ մեկը թող չվախենա դեմարկացիա և դելիմիտացիա բառերից, ամեն անկախ պետություն այս խնդրի հետ բախվում է, և մենք, այո, պետք է գնանք սահմանների դեմարկացիայի և դելիմիտացիայի, որովհետև 21-դ դարում դա նշանակում է «սեփական երկրի ժողովրդին անձեռնմխելի պարիսպ քաշել»:

Հիմա Երևանն ու Բաքուն ասում են, որ համաձայն են Ռուսաստանի առաջարկին` սահմանագծման ու սահմանազատման հարցով եռակողմ հանձնաժողով ստեղծելու մասին: Այսինքն, ևս մեկ ուղղություն, որտեղ պետք են գալու եռակող քննարկումներ, փաստաթղթեր:

Ըստ ամենայնի, Երևանն ու Բաքուն, ցանկանում են իրենց հայտարարություններով փոքր-ինչ հետ մղել արևմուտքի ակտիվությունը, և ցանկանում են ապացուցել, որ աշխատում են Մոսկվայի հետ:

Եթե այս ամենին էլ գումարենք Փաշինյանի նախընտրական թեզերը, որով նա սկսել է պատերազմի պարտությամբ հպարտանալ, ապա միանշանակ կարող ենք արձանագրել, որ նա ոչ միայն ադեկվատ չէ, այլև հստակ հանդես է գալիս այնպիսի դիրքերից, որը համընկնում է Բաքվի դիրքորոշման հետ... Ինչպե՞ս բացատրել փաստը, որ և՛ Ալիևն է հպարտանում պատերազմի արդյունքներով, և, փաստորեն, Փաշինյանը:

Մետաքսյա Շալունց