Կտրուկ շրջադարձ, տհաճ անակնկալ. Էրդողանի վիշտը
Մեր տարածաշրջանում, և ոչ միայն մեր տարածաշրջանում, այլ ավելի լայն իմաստով տեղի է ունենում մի իրադարձություն, որը կարող է փոխել տարածաշրջանում խաղացողների թե՛ դերը, թե՛ ազդեցությունը, թե՛ շահերը: Իրաքի հյուսիսում Քուրդիստանի ինքնավարության կառավարությունը հայտարարել է անկախության հանրաքվե անցկացնելու մտադրության մասին: Նրանք ցանկանում են անջատվել Բաղդադից և ստեղծել սեփական, լիարժեք պետություն: Քրդական ինքնավարության ղեկավար Մասուդ Բարզանիի օգնական Հեմին Նավրամին Թվիթերում չորեքշաբթի օրը գրել է. - «Մեծ նորություն: Քուրդիստանի անկախության հանրաքվեն կանցկացվի սեպտեմբերի 25-ին»: Ավելի վաղ Մասուդ Բարզանին հանդիպել էր քրդական քաղաքական կուսակցությունների ներկայացուցիչներին, հաղորդում է քրդական Rudaw հեռուստաընկերությունը: Իրաքի Քուրդիստանը ձևավորվել է 1970-ին Իրաքի կառավարության հետ կնքված համաձայնագրով, ինչը վերջ տվեց տարիներ շարունակված զինված պայքարին: Իսկ 2005-ին Իրաքի Քուրդիստանը սահմանադրորեն ամրագրված ինքնավարության կարգավիճակ ստացավ, բայց շարունակում է նախկինի պես համարվել Իրաքի մասը: Որ պետության համար է սա, մեղմ ասած, ոչ բարի լուր... Թուրքիայի: Ռեջեփ Էրդողանը ասել է, որ վշտացած է Իրաքյան Քուրդիստանի կողմից անկախության հանրաքվե անցկացնելու որոշման կապակցությամբ: «Դա սպառնում է Իրաքի տարածքային ամբողջականությանը և սխալ քայլ է»,- ասել է Թուրքիայի նախագահը: Նա նշել է, թե «նման կրիտիկական ժամանակահատվածում նման քայլի ձեռնարկումը ոչ ոքի օգուտ չի բերի»: Ավելի վաղ հայտարարությամբ էր հանդես եկել Թուրքիայի արտաքին գործերի նախարարությունը, որը Հյուսիսային իրաքի քրդական ինքնավարության կողմից կայացված որոշումը սարսափելի սխալ էր որակել՝ կոչ անելով պահպանել Իրաքի տարածքային ամբողջականությունը: Թուրքիան, որը հարևանների հետ խնդիրների մեջ է թաթախված` այս օրերին ջերմորեն Կատարին սատարելու ժեստեր է անում: Էրդողանը հայտարարել է, որ թուրքական կողմը շարունակելու է ցանկացած տեսակի աջակցությունը Կատարին: «Որոշներն անհանգստանում են այն փաստով, որ մենք Կատարի մեր եղբայրների կողքին ենք: Մի նեղացեք, սակայն մենք շարունակելու ենք ցանկացած տեսակի օգնություն տրամադրել Կատարին»,- ասել է Էրդողանը: Նա նշել է, թե մինչ օրս չի տեսել, որ Կատարն ահաբեկիչներին օգնություն ցուցաբերի: Թուրքիայի նախագահը կոչ է արել դադարեցնել այդ երկրի շրջափակումը: Թուրքիայի Ազգային մեծ ժողովը հունիսի 7-ին ընդունել է որոշումներ, որով թուրքական կողմն իր զինված ուժերի ներկայացուցիչներին տեղակայելու է Կատարում, ինչպես նաև վերապատրաստելու է այնտեղի ժանդարմերիայի ներկայացուցիչներին: Որոշումը վավերացրել էր նախագահ Էրդողանը: Թուրքական զինծառայողների տեղակայումը Կատարում կիրականացվի համաձայն երկու երկրի միջև համագործակցության համաձայնագրի, որը ստորագրվել է 2015թ.: Ուշագրավ է, որ Թուրքիայի մեջլիսը նման որոշում է ընդունել, երբ յոթ երկիր (Սաուդյան Արաբիա, Միացյալ Արաբական Էմիրություններ, Եգիպտոս, Բահրեյն, Լիբիա, Եմեն, Մալդիվներ) հայտարարեցին Կատարի հետ դիվանագիտական հարաբերությունները դադարեցնելու մասին: Մետաքսյա Շալունց