Էրդողանը գնում է Շուշի, իսկ Պուտինը կգա՞ Սյունիք

Թուրքիայի նախագահ Ռեջեբ Թայիփ Էրդողանը հունիսի 15-16-ին կայցելի Բաքու և Շուշի: Այս մասին հայտնում է «ՌԻԱ Նովոստին»՝ վկայակոչելով Բաքվում իր դիվանագիտական աղբյուրը:

«Հունիսի 15-ին նախատեսվում է Թուրքիայի նախագահի այցն Ադրբեջան: Ակնկալվում է, որ հաջորդ օրը Թուրքիայի և Ադրբեջանի նախագահները կայցելել Ղարաբաղի Շուշի քաղաք»,- ասել է գործակալության աղբյուրը: Նրա խոսքով՝ Շուշիում Էրդողանը կմասնակցի դպրոցի հիմնարկեքի արարողության:
Դեռ երկու ամիս առաջ տեղեկություններ ի հայտ եկան այն մասին, որ Էրդողանն այցելելու է Շուշի:

Թյուրքական խորհրդի գագաթնաժողովին Թուրքիայի նախագահ Ռեջեփ Էրդողանը ելույթի ընթացքում անդրադարձել էր նաև Արցախյան վերջին պատերազմին և հետպատերազմյան իրավիճակին:

Նա հերթական անգամ շնորհավորել է Ալիևին ու Ադրբեջանի ժողովրդին հաղթանակի կապակցությամբ, ապա պնդել, որ ԼՂ տարածքում եղած 67 մզկիթներից 63-ը ավերվել է, քանդվել են նաև եկեղեցիներ:

Մեկ այլ պնդմամբ, Էրդողանը խոսել է 1918թ. իբրև հայերի կողմից ադրբեջանցիների կոտորածի մասին՝ միաժամանակ հիշատակելով նաև Խոջալուի դեպքերի մասին: Թուրքիայի նախագահը շրջանի ապագայի մասին խոսելիս կարևորել է հետևյալ քայերը՝ «Ղարաբաղում թյուրքական ժառանգության պահպանում, շրջանի վերականգնում և ադրբեջանցի փախստականների վերադարձ»:

Վերջում էլ ցանկություն է հայտնել այցելել Շուշի՝ ասելով. «Մեր ցանկությունն է, որ ամենակարճ ժամանակում՝ Ռամադանից հետո, Շուշի այցելենք և իմ եղբայր Ալիևի հետ, Ալլահի կամքով, Շուշիում նոր տոն տոնենք»:
Էրդողանի այցը Շուշի, իրականում պետք է դիտարկել ոչ այնքան «եղբայրական Ադրբեջանին» այցելելու ու թև ու թիկունքի կանգման հերթական ժեստը ներկայացնելու մի դրվագ, սա կոնկրետ քայլ է՝ նեոօսմանիզմի ուժը ցուցադրելու:

Թուրանիզմի ազդեցության մեծացմանը զուգընթաց Էրդողանը ողջ մուսուլմանական աշխարհին, և նախևառաջ Ռուսաստանին այդ քայլով ցույց է տալու, թե ով է տարածաշրջանում «տան տերը»:

ՆԱՏՕ-ի անդամ Թուրքիայի ղեկավարը գալիս է Շուշի, որտեղ, ըստ մամուլում շրջանառվող տեղեկությունների՝ ռուսական խաղաղապահ առաքելության մուտքն արդեն Ադրբեջանը վաղուց արգելել է:

Այսինքն՝ Էրդողանը մտնում է Շուշի, որտեղ չկան ռուս խաղաղապահներ, նրանց դուրս են արել Շուշիից: Ու այս ֆոնին հետաքրքիր է հարցը, իսկ Պուտինը կայցելի՞, օրինակ՝ Սյունիք...

Մետաքսյա Շալունց