PKK-ը սպառնացել է

Թուրքական Dünya Bülteni կենտրոնի փոխանցմամբ՝ Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) ղեկավարներից Դեմհաթ Ագիթը հայտարարել է, որ իրենք թույլ չեն տա, որ Հյուսիսային Իրաքի քրդական ինքնավարության տարածքից գազ մատակարարվի Թուրքիային։ «Քրդստանի համայնքների միության» (KCK, Թուրքիայում այն համարում են PKK-ի քաղաքացիական թև) արտաքին հարաբերությունների հանձնաժողովի խոսնակ Դեմհաթ Ագիթը հայտարարել է, որ Թուրքիան բաց կերպ թշնամական կեցվածք է ընդունել քրդերի հանդեպ՝ հիշեցնելով Քոբանիի պաշարման ժամանակ նրա պահվածքը։ Նա ընդգծել է, որ ելնելով դրանից՝ իրենք թույլ չեն տա, որ Հյուսիսային Իրաքից գազ մատակարարվի Թուրքիային, ինչը կբխի նաև Հյուսիսային Քրդստանի (Թուրքիայի քրդեր) շահերից։ Ագիթը կարևորել է քրդերի ազգային միասնության պահպանումը և համատեղ գործելը։ Հաղորդվում է, որ Հյուսիսային Իրաքի քրդական ինքնավարության ղեկավարությունը դատապարտել է PKK-ի այս հայտարարությունը։ Հիշեցնենք, որ ավելի վաղ հաղորդվել էր, թե Հյուսիսային Իրաքում մեկնարկել է դեպի Թուրքիա ձգվող գազատարի կառուցումը, ինչը կավարտվի մինչև 2017 թվականի ավարտը, և Թուրքիան դրանով իսկ կստանա իրաքյան (քրդական) գազ, որն այլընտրանք կհանդիսանա ռուսական գազին և ավելի էժան կլինի նրանից։