Փաշինյանի սադրանքն ընդդեմ Պուտինի. նոր արհավիրք՝ Հայաստանի գլխին

«Շատ է խոսվում այն մասին, որ Հայաստանի բանակը ուժային գործողություն չի անում, այլ դիմում է ՀԱՊԿ-ին: Հենց ՀԱՊԿ-ն ու այդ կազմակերպության անդամ մեր գործընկեր երկրներն են ՀՀ-ին հորդորել չգնալ իրավիճակի ռազմական ճանապարհով հանգուցալուծմանը», - ԱԺ-կառավարություն հարցուպատասխանի ժամանակ ասաց ՀՀ վարչապետի պաշտոնակատար Նիկոլ Փաշինյանը:

Փաշինյանի խոսքով՝ Հայաստանի՝ ռազմական լուծման չգնալը նաև նպատակ ունի ՀԱՊԿ երկրներին ինքնաբերաբար չներքաշել ռազմական լուծման մեջ: «Սա է պատճառը, որ ասում ենք՝ եկեք քաղաքական ճանապարհով լուծենք էս հարցը, որովհետև դա հնարավոր է լուծել: Այս պահի դրությամբ ՀԱՊԿ-ի գործողությունների արագությունը մեզ չի բավարարում, բայց մենք շարունակելու ենք հետևողականորեն աշխատել այդ ուղղությամբ: Կարծում եմ՝ նախնական մտահղացումը, որը, իմ կարծիքով, Ադրբեջանն ունի, այս պահի դրությամբ, չեզոքացված չեմ համարում: Այդ մտահղացման վերաբերյալ մեր գործընկերները պետք է հստակ դիրքորոշում արտահայտեն», - ասաց նա:

Նիկոլ Փաշինյանը նաև բարձրաձայնեց՝ ՀԱՊԿ-ը և ՀԱՊԿ երկրները հստակ դիրքորոշում չեն արտահայտել, որ Ադրբեջանը զորքերը պետք է հետ քաշի: «Աշխատանքային մակարդակում այդ դիրքորոշումն արտահայտվում է, բայց հրապարակային մակարդակում չի արտահայտվում: Այս հարցերում պետք է հստակություն մտցվի», - ասել է նա:

Ըստ էության, Փաշինյանը արձանագրեց, որ չի բացառում, որ կգնան այդ ճանապարհով՝ ՄԱԿ անվտանգության խորհրդի դիմելու, եթե պարզվի, որ ՀԱՊԿ-ի գործիքները կամ հայ-ռուսական միացյալ զորախմբի վերաբերյալ պայմանագրի գործիքները բավարար չեն այս իրավիճակը և խնդիրը լուծելու համար:

Պարզվում է, ՄԱԿ-ի Անվտանգության խորհուրդ դիմելն առաջին օրերից եղել է և շարունակում է մնալ քննարկման առարկա. «Այնտեղ ուղղակի նրբություններ կան, որ նման որոշումներ կայացնելիս պետք է որոշակի կանխատեսելիության տեսադաշտ ունենալ, այսպես ասած, նախապես նախապատրաստական աշխատանքներ իրականացնել: Երբեք չենք բացառել և չենք էլ բացառում, որ կգնանք այդ ճանապարհով, եթե պարզվի, որ ՀԱՊԿ-ի գործիքները կամ հայ-ռուսական միացյալ զորախմբի վերաբերյալ պայմանագրի գործիքները բավարար չեն այս իրավիճակը և խնդիրը լուծելու համար», - նշեց Փաշինյանը:

Այսպես, ի՞նչ են նշանակում Փաշինյանի մեկնաբանությունները...

Ուրեմն, 2 շաբաթից ավելի Հայաստանի տարածք ներխուժած ադրբեջանական բանակի դեմ այս իշխանությունն իր՝ ՊՆ-ով, ԱԱԾ-ով որևէ քայլ չեն ձեռնարկում, Փաշինյանը 2 շաբաթ սպասում է, որպեսզի ՀԱՊԿ-ն գործի: Մինչդեռ հիշեցնենք, որ Հայաստանը դիմել էր կազմակերպության 2-րդ հոդվածի համաձայն, այսինքն՝ խորհրդատվության թեմայով:
Փաստորեն, հիմա արդեն Փաշինյանն օգտագործում է ԱԺ-ի բարձր ամբիոնը՝ արձանագրելու, որ ՀԱՊԿ-ն անպետք կառույց է, դանդաղ է աշխատում, համարժեք չի գործում:

Իսկ իշխանության քայլերը համարժե՞ք են...

Այնպիսի «քնքուշ» մոտեցում է ցուցաբերվում թշնամական պետության բանակի նկատմամբ, կարծես՝ Հայաստանի տարածքի մի մասը ավտոմատ հայտնվել է Ադրբեջանի տարածքում: Մի ամբողջ ժողովուրդ նստած սպասում է, թե Ադրբեջանի բանակը ե՞րբ պետք է որոշի լքել Հայաստանի տարածքը:

Իսկ ի՞նչն է պատճառը, որ ադրբեջանական բանակը հայտնվել է ՀՀ տարածքում, ինչո՞ւ այս մասին չի խոսում Փաշինյանը:

Ինչո՞ւ են Ռուսաստանն ու Ադրբեջանն ակնկալում, որ Հայաստանի իշխանությունները պետք է եռակողմ նոր փաստաթուղթ ստորագրեն: Ո՞վ է դրան համաձայնություն տվել:

Իսկ գուցե դա՞ է պատճառը, որ Փաշինյանը խոսք է տվել, հիմա էլ, ըստ էության, Ադրբեջանի բանակը մտել է ՀՀ տարածք՝ հավելյալ ճնշում է գործադրում, որպեսզի Փաշինյանը ստորագրի նոր եռակողմ համաձայնագիր:

Գուցե Փաշինյանը նաև սրա՞ մասին էլ խոսի:

Փաշինյանի հաջորդ «նուրբ» ակնարկը:

«Չգիտեմ՝ ում հետ է համաձայնեցված այս ծրագիրը, բայց ենթադրում եմ, որ Ադրբեջանը միայնակ չէր հանդգնի այսպիսի գործողություն իրականացել: Կարծում եմ, որ ոմանց հետ նախապես համաձայնեցվել է ծրագիրը»,-նշում է Նիկոլ Փաշինյանը՝ նկատի ունենալով Հայաստանի սահմանը խախտելու հանգամանքը։

Ուրեմն, պրոփաշինյանականները հայտարարում են, թե ադրբեջանական սադրանքը համաձայնեցված է եղել Ռուսաստանի հետ, հիմա էլ Նիկոլ Փաշինյանն «անուղղակիորեն», կարծես, «գաղտնիության» քողի ներքո առանց Ռուսաստանի անունը նշելու համոզմունք է հայտնում, որ Ալիևը նման որոշում չէր կայացնի միայնակ:

Եվ ի՞նչ... Եթե Ռուսաստա՞նն է դրդել Ալիևին ներխուժել Հայաստանի տարածք, էդ դեպքում ինչո՞ւ է Հայաստանը դիմել Ռուսաստանին ու ՀԱՊԿ-ին՝ հարց է ծագում:

Փաշինյանն իր «կարճ խելքով», փաստորեն, իրեն ապահովագրեց հետագա մեղադրանքներից, որպեսզի ներկայացնի՝ «Ժողովուրդ ջան, տեսա՞ք, դիմեցի Պուտինին ու ՀԱՊԿ-ին բան չարեցին, տեսնո՞ւմ եք՝ ո՞վ է մեղավոր, որ Ադրբեջանն այսպես է վարվում, Ռուսաստանն է դրդում Ադրբեջանին...»

Արդյունքում ի՞նչ է ստացվում: Ադրբեջանը ցանկանում է դուրս մղել ռուս խաղաղապահներին Լեռնային Ղարաբաղից, իսկ Հայաստանում էլ Փաշինյանն է Ռուսաստանին զրոյացնում՝ նրան մեղադրելով Ադրբեջանի հետ գործարքների գնալու մեջ:

Ու ամենակարևորը՝ ի՞նչն է այս ամենի գինը: Ռուսաստանը դուրս բերի ռուսական զորքերը Հայաստանից ու ռուս խաղաղապահ առաքելությանը ԼՂ-ից, որպեսզի թուրք-ադրբեջանական դաշինքը մի քանի օրում գրավի Սյունիքը, Գեղարքունիքը ու հասնի մինչև Երևա՞ն...

Սա է Փաշինյանի նախընտրական «նվերը» հայ ժողովրդին՝ նոր արհավիրք Հայաստանի գլխին՝ ընտրությունների նախաշեմին: Այսինքն՝ պետությունը կորստի տանելու Փաշինյանի վերջին քայլը, ընդ որում՝ հետևողական ու ծրագրված կերպով:

Մետաքսյա Շալունց