Ասեց ու արեց
Հայաստանի վարչապետի բիզնես մտածողության և մենջերական պրոֆեսիոնալիզմի իրողությունը այնքան ակնհայտ է, որ չարժի անգամ դա վիճարկել: Ընդամենեը մեկ շաբաթ առաջ վարչապետը կառավարության նիստում շատ խիստ տոնով դժգոհեց Զվարթնոց օդանավակայանում աշխատող տաքսիստների մասին, ասելով, որ նրանք անթրաշ, բաղնիքի չստերով ներկայանում են հաճախորդին, աներևակայելի թանկ գնով սպասարկում և խայտառակում են երկիրը, ինչը անթույլատրելի է: Եվ ահա վարչապետի հանձնարարականից ընդամենը մեկ շաբաթ անց գործարկվեց ավտոբուսային նոր գիծ ՝ «Երևան՝ հանարապետության հրապարակ-օդանավակայան»: Կապի և տրնասպորտի նախարարության տեղեկացմամբ՝ հունիսի 14-ին, առավոտյան` ժամը 10:00-ից սկսեց գործել Երևան - «Զվարթնոց» օդանավակայան և հակառակ ուղղությամբ փորձնական երթուղին:Այն կաշխատի շուրջօրյա՝ 24 ժամ, յուրաքանչյուր ժամը մեկ։ Երթուղային ավտոբուսով «Զվարթնոց» օդանավակայան մեկնող առաջին ուղևորները լրագրողներն ու ՀՀ տրանսպորտի, կապի և տեղեկատվական տեխնոլոգիաների նախարարության ներկայացուցիչներն են եղել:« ՀՀ վարչապետի հանձնարարականի համաձայն՝ Երևան - «Զվարթնոց» օդանավակայան և հակառակ ուղղությամբ փորձնական երթուղին կազմակերպել է ՀՀ տրանսպորտի, կապի և տեղեկատվական տեխնոլոգիաների նախարարությունը: Ուղևորափոխադրումները կիրականացվեն Հանրապետության հրապարակի շատրվաններին հարակից` գծանշումներով առանձնացված տարածքից, ավտոբուսներով և միկրոավտոբուսներով, որոնք կահավորված են օդորակիչներով և օդափոխիչներով։Փոխադրավարձը մեկ ուղևորի համար 300 դրամ է»,- նշված է նախարարության տարածած հաղորդագրության մեջ։ Կյանքը ցույց է տալիս, որ Հայաստանում կառավարության և վարչապետի հանձնարարականները հազվադեպ են այսքան օպերատիվ կատարվում : Որպես կանոն շատ արագ լուծում են ստանում միայն այն հարցերը, որոնք այս կամ այն կերպ եկամուտ են ապահովում որևէ բարձր պաշտոնյայի : Վստահաբար հրապարկից օդանավակայան գնացող նորաբաց ավտոբուսային գիծը ևս հենց այդ դեպքն է : Բայց դա ամենևին չի նշանակում, թե այն ինչ արվել է, լավ բան չէ և այդ գիծը չպիտի բացվեր միայն այն բանի համար, որ այն եկամուտ է ապահովում վարչապետի կամ կապի և տրանսպորտի նախարարի մերձավորների համար, ովքեր գուցե կանգնած են նորաբաց գծի թիկունքում : Բոլորս ենք հասկանում, սովորական դեպքերում այսքան արագ չէր տրվի թույլտվություն, բացի այդ նման դեպքերում երթուղային գծի սպասարկման համար մրցույթ հայտարարելը պարտադիր պահանջ է : Ակնհայտ է, որ այս ընթացկարգը չի պահվել : Սա, անշուշտ, քննարկման շատ կարևոր խնդիր է և հարկատուների հաշվին ապրող Տնտեսական մրցակցության պաշտպանության պետական հանձնաժողովը պարտավոր է ամենայն մանրամասնությամբ ուսումնասիրել խնդիրը և բացահայտել, թե որքանով է տուժել առողջ մրցակցությունը : Բայց, որ հրապարակից-օդանավակայան ավտոբուսային գիծ ունենալը ողջունելի նախաձեռնություն է, որը առաջին հերթին կթեթևացնի մեր քաղաքացիների և երկիր այցելողների հոգսը, կարծում ենք անվիճելի է : Հայկ Դավթյան