Վատ հոտ է գալիս...

Նիկոլ Փաշինյանի տիկնոջ Աննա Հակոբյանի Սյունիք այցը անհանգստությունների առիթ է դարձել: Հակոբյանն, իհարկե, ֆեյսբուքյան իր էջում հայտնեց այցի նպատակի մասին գրառելով.<<Այսօր ԱԺ փոխնախագահ, ԻՄ ՔԱՅԼԸ հիմնադրամի համահիմնադիր Լենա Նազարյանի հետ մասնակցեցինք Գորիսի Ս. Խանզադյանի անվան N6 հիմնական դպրոցի նորոգված մարզադահլիճների բացման արարողությանը:
Դպրոցն արդեն ունի նորոգված 2 մարզադահլիճ՝ նոր մարզագույքով, 2 հանդերձարան՝ կից սանհանգույցներով և ցնցուղարաններով։ Վերանորոգումն իրականացվել է ԻՄ ՔԱՅԼԸ հիմնադրամի «Հանրակրթական դպրոցներում առողջ ապրելակերպի խթանում» պիլոտային ծրագրի շրջանակներում: Այն նվեր է դպրոցի սովորողներին՝ որպես Հայաստանի հանրային հեռուստաընկերության «Մանկական լիգա» հաղորդաշարի հաղթողներ։
Միջոցառման ընթացքում նորոգված մարզադահլիճներից մեկում տեղի ունեցավ բասկետբոլի ընկերական խաղ դպրոցի սովորողների եւ «Ինստիգեյթ Մոբայլ» ընկերության աշխատակիցների միջեւ։
Սա մարզային 4-րդ դպրոցն է, որի մարզադահլիճները նորոգվել են ԻՄ ՔԱՅԼԸ հիմնադրամի կողմից>>:

Սակայն ավելի ուշ լրատվամիջոցները բացահայտեցին, որ այդ սպորտդահլիճի բացման արարողությունն արդեն արվել է մոտ մեկ ամիս առաջ եւ հենց այս հանգամանքն էլ անհանգստություն, տագնապներ է առաջացնում Էռատոյի այցի հետ կապված:

Քանի որ մայիսի 12-ից Սյունիքում պատերազմից հինգ պակաս վիճակ է, հայ-ադրբեջանական շփման գծում լարվածությունը ոչ մի կերպ չի թուլանում եւ կա ռազմական բախման ռեալ վտանգ: Իսկ Աննա Հակոբյանի հրամանատարական ունակությունների մեջ ազգը համոզվել է դեռեւս 44-օրյա պատերազմի օրերին, երբ թիվ մեկ բունկերից սույն տիկինն էր հրամկազմին ղեկավարում եւ հրամաններ արձակում՝ որտեղ կրակել, որտեղ նահանջել եւ այլն: Իհարկե, հետո այդ ամենը իր ամուսնու կողմից ներկայացվեց իբրեւ բարոյական աջակցություն, բայց այդպես էլ պարզ չդարձավ՝ ինչ տեսք ունի բարոյական աջակցությունը: Արդյոք Սյունիքում եւս զգացվում է Էռատոյի աջակցությունը եւ իրականում նա այդ նպատակով է գաղտագողի մարզ մեկնել ու իբր մասնակցում է արդեն բացված սպորտդահլիճի բացմանը, թե ընդամենը նախընտրական այց է: Բայց տագնապներն ու անհանգստությունը էլ ավելի է մեծանում պատերազմի ստի հաղթարշավի արքա Արծրուն Հովհաննիսյանի Հայաստան վերադառնալու փաստից: Տեւական ժամանակ է նա ԱՄՆ-ում էր, նրա վերադարձի մասին երեկ լուսանկարներ էին տարածվել: Միգուցե շուտով Արծրուն Հովհաննիսյանի կարիքն է զգացվելու՞…
Այս ամենից վատ հոտ է գալիս

Անի Սահակյան