Հրաժարականը դավաճանություն կլինի․ պետք է խոսել
Արտաքին գործերի նախարարի տեղակալ Ավետ Ադոնցը հայտարարել է, որ ո՛չ ինքը, ո՛չ էլ ԱԳՆ-ն տեղյակ չեն եղել ստորագրվելիք փաստաթղթից՝ իրենք մամուլից են տեղեկացել։
ԱԳ նախարարի ժամանակավոր պաշտոնակատար Արա Այվազյանը մայիսի 19-ից մասնակցում էր Դուշանբեում տեղի ունեցող ՀԱՊԿ ԱԳ նախարարների խորհրդի նիստին և այնտեղից դեռ չի վերադարձել։ Նա փաստաթղթի գոյության մասին իմացել է Դուշանբեում։ Լրատվամիջոցներում տեղեկություններ են շրջանառվում, որ ԱԳՆ-ում չեն կիսում փաստաթղթի ստորագրման գաղափարը։ Արա Այվազյանը, նրա տեղակալներն ու առանցքային վարչությունների պետերը պատրաստվում են հրաժարական ներկայացնել։ Անգամ տեղեկություններ կան, որ Արա Այվազյանը Դուշանբեում հրաժեշտ է տվել իր պաշտոնակիցներին՝ ասելով, որ Երեւան հասնելուն պես հրաժարականի դիմում է գրելու։
Տեղեկություններ կան, որ նոր փաստաթղթի ստորագրմանը դեմ է նաև Ազգային անվտանգության ծառայության տնօրեն Արմեն Աբազյանը, ով կառավարության մայիսի 20-ի նիստին չէր մասնակցում։ Մամուլում հրապարակումներ եղան, թե ԱԱԾ ղեկավար կազմը կապի դուրս չի գալիս կառավարության ներկայացուցիչների հետ։ ԱԳ նախարարի ժամանակավոր պաշտոնակատարի հրաժարականի հարցին կառավարության մոտ հրավիրված բողոքի ակցիայի ժամանակ անդրադարձել է ՀՀԿ փոխնախագահ Արմեն Աշոտյանը՝ նշելով, որ նա իրավունք չունի հրաժարական տալ՝ առանց հանրայնացնելու, թե ինչ գաղտնի պայմանավորվածություններ կան, ինչի շուրջ են ընթանում գաղտնի բանակցությունները։ Այվազյանին Աշոտյանն առաջարկել է Երևան վերադառնալուց հետո ընդունել ընդդիմադիր ուժերի միասնական պատվիրակությանը և ներկայացնել, թե ինչ գաղտնի հավելված ունի ստորագրվելիք փաստաթուղթը։
Արա Այվազյանը, ինչպես նաև Արմեն Աբազյանը պարտավորություն ունեն կանխել պետական դավաճանությունը՝ հրապարակելով նոր տարածքների հանձնման բոլոր գաղտնի և թաքուն կետերը, Զանգեզուրի միջանցքի հակահայ պայմանները։ Հեռանալ առանց այդ քայլերը կատարելու՝ կլինի դավաճանություն, դասալքություն, պատասխանատվությունից խուսափելու վճռականության բացակայություն։ ԱԳՆ ու ԱԱԾ-ն պարտավոր են հստակ բացատրություն տալ, թե ինչ դավադրություն է թաքնված ՀՀ սահմանների «դեմարկացիայի և դելիմիտացիայի» գործընթացի ներքո։
Նիկոլ Փաշինյանը Ազգային ժողովում բաց տեքստով հաստատեց, որ ստորագրվելիք թղթով քննարկման առարկա է դառնում խորհրդային տարիների «անկլավների» հարցը, ինչը նշանակում է, որ Արարատի մարզի Տիգրանաշենը (Քյարքի) ու Տավուշի մի քանի գյուղերն Ադրբեջանին հանձնելու հարցերը օրակարգում կան։ Թե ինչպիսի կործանարար ռազմավարական հետևանքներ կարող է ունենալ այդ գործընթացը, արդեն ակնհայտ է։
Երկրի և հայրենիքի տերն ու միակ պատասխանատուն Նիկոլ Փաշինյանը չէ, պետությունը բոլորինս է։ Նրանք, ովքեր ի պաշտոնե այս պահին պարտավորություն ունեն և կարող են որևէ բան փոխել, պարտավոր են քայլ անել։ Լռությունն ու պարզապես հեռանալը դավաճանություն են։
Հայկ Դավթյան
Հետևեք մեզ Viber-ում
