Սպառազինությունների աճը` սպառնալիք է

«ՆԱՏՕ-ի բոլոր դաշնակիցները մտահոգված են տարածաշրջանում սպառազինությունների ծավալի աճով», - ասում է Հարավային Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ապաթուրայը: «Իրավիճակը մտահոգիչ է հատկապես այն պատճառով, որ դրան զուգընթաց նաև քաղաքական լարումներն ու թշնամական գործողությունների դրսևորումներն են ավելանում: Ինչպես գիտեք, ՆԱՏՕ-ի երկու դաշնակից երկիր նաև ԵԱՀԿ Մինսկի խմբի համանախագահներ են, և մենք բոլորս համանախագահների թե՛ գործողություններից և թե՛ հայտարարություններից կարող ենք տեսնել, որ նրանք հավատարիմ են խաղաղ հանգուցալուծում գտնելուն: Առհասարակ ՆԱՏՕ-ի ընդհանուր քաղաքականությունը լարվածության և բախումների նվազեցմանն ու խաղաղ հանգուցալուծմանը ձգտելն է», - հավելել է Ապաթուրայը: Անդրադառնալով ապրիլյան պատերազմից հետո ստեղծված իրավիճակին՝ ՆԱՏՕ-ի ներկայացուցիչն ասաց․ - «Մենք շատ ուշադիր հետևում ենք իրավիճակին այս տարածաշրջանում, պարբերաբար թարմ տեղեկություններ ենք ստանում: Եվ անկեղծ ասած, մեր մտահոգությունը իրավիճակի վերաբերյալ այժմ ավելի մեծ է թե՛ ՆԱՏՕ-ի դաշնակից երկրներում առանձին-առանձին, թե՛ ՆԱՏՕ-ում, քանի որ (և դա դուք ինձնից լավ գիտեք) վերջին տարում մենք ավելի մեծ ռազմական ակտիվության ականատես եղանք, եղան զոհեր և վիրավորներ, ավելի շատ ռազմատենչ հայտարարություններ հնչեցին»: Նա հավելեց, որ ՆԱՏՕ-ն ուղղակիորեն ներգրավված չէ ԼՂ հակամարտության կարգավորման գործընթացում, սակայն դաշինքը սատարում է ԵԱՀԿ Մինսկի խմբին․ - «Մեր դիրքորոշումը հետևյալն է՝ սատարել ԵԱՀԿ Մինսկի խմբին, և մենք անվերապահորեն կսատարենք թե՛ երկու երկրների, թե՛ Մինսկի խմբի քայլերը, որ ուղղված կլինեն հակամարտության հանգուցալուծմանը»: Այսպիսով, Ջեյմս Ապատուրայը վերահաստատել է ՆԱՏՕ-ի աջակցությունը ԵԱՀԿ ՄԽ համանախագահների կողմից գործադրվող ջանքերին: Սա թվում է, թե ստանդարտ հայտարարություն է, բայց իրականում այն առավել քան կարևոր է: Որքան միջազգային հանրությունը պնդի խնդրի կարգավորման խաղաղ լուծման օգտին և ԵԱՀԿ Մինսկի խմբի համանախագահության դերը, այնքան դժվար կլինի բանակցությունները տապալող Ալիևին «մանևրել» այլ ուժերի հետ` ղարաբաղյան լարում առաջացնելու ուղղությամբ: Այն, որ Հայաստանը հավատարիմ է ԵԱՀԿ ՄԽ-ին` դա անհերքելի փաստ է բոլորի համար: Միջազգային հանրությունն էլ չի կապում Հայաստանի` ՀԱՊԿ-ին ու ԵԱՏՄ-ին անդամակցության հարցերը` Հայաստանի և այլ կառույցների հետ հարաբերությունների հետ: Վերջին կոնկրետ արձանագրումը հնչեց հենց ՆԱՏՕ-ի պաշտոնյայի կողմից: «ՆԱՏՕ-ի դաշնակիցները կողջունեն նման զարգացումը, նրանք ուզում են, որ ՀՀ-ն վայելի Արևմուտքի հետ կապերը սերտացնելու հնարավորությունները», Հայաստանում ՆԱՏՕ-ի Տեղեկատվական կենտրոնում լրագրողների հետ հանդիպմանն անդրադառնալով նոյեմբերին ՀՀ-ԵՄ գործակցության համաձայնագրի հնարավոր ստորագրմանը, ասել է Հարավային Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ապատուրայը: Նրա խոսքով՝ ՆԱՏՕ-ն հարգում է ՀՀ-ի հավասարակշռված արտաքին քաղաքականությունը. «Մեզ համար մտահոգիչ չէ ՀՀ մասնակցությունը ՀԱՊԿ-ին կամ ԵԱՏՄ-ին: ՀՀ-ն եղել և շարունակում է լիներ մեր վստահելի գործընկերը: Շեշտակի առաջընթաց չեմ տեսնում, չեմ կարծում, թե ՀՀ-ն էլ նման մտադրություններ ունի, բայց կշարունակենք մեր հաստատուն գործակցությունն այն ուղղություններով, որտեղ դա ողջամիտ կհամարվի»: Ջեյմս Ի դեպ, Ապատուրայը նաև տեղեկացրել է, որ ՆԱՏՕ-ն առաջիկայում Բրյուսելում քննարկելու է Աֆղանստանում և Կոսովոյում խաղաղապահ ուժերի թիվը մեծացնելու հարցը. «Շնորհակալ ենք ՀՀ-ին՝ նպաստելու համար Աֆղանստանում և Կոսովոյում մեր իրականացրած գործողություններին»: Ինչ վերաբերում է ՀՀ ՊՆ-ի հետ համագործակցությանը, ՆԱՏՕ-ի պաշտոնյանի խոսքով՝ այն զարգանում է. «Մենք սատարում ենք ՀՀ զինված ուժերում կոռուպցիայի դեմ պայքարի և թափանցիկության ապահովման գործընթացին»: Մետաքսյա Շալունց