Ինչ վտանգներ են սպասվում Երևանին անձրևների ժամանակ. մանրամասնում են մասնագետները

Հայաստանի ճարտարապետների միության նախագահ Մկրտիչ Մինասյանը Հայելի ակումբում նշեց, որ Երևանի ջրահեռացման համակարգի խողովակներն ու ցանցերը աղբի մեջ կորած են։«Այս խնդիրը լուծելու համար պետք է ամենօրյա լուրջ աշխատանք, որպեսզի մաքրվեն բոլոր խողովակները, դիտահորերի վրայի ցանցերը, որովհետև ինժեներների կողմից ամեն ինչ հաշվարկված է։ Երևանի տարածքով անցնող Գետառը տարբեր տեղերում ջրի դուրսմղման վայրեր ունի»,- ասաց նա։ Խոսելով խանութների և նմանատիպ շինությունների մասին՝ տեղեկացրեց, որ շինարարության ժամանակ հաշվի չի առնվում թեքությունը, ինչը շինարարական նորմերի խախտում է, այդ իսկ պատճառով դրանց մեծ մասը անձրևների ժամանակա տուժում են: Ճարտարապետ Գուրգեն Մուշեղյանի խոսքով՝ քաղաքի գլխավոր հատակագծում առկա են բոլոր տեսակ ենթակառուցվածքները, այդ թվում՝ ջրամատակարարման, կոյուղու, անձրևաջրերի հեռացում, և այլն, և բոլոր հաշվարկները կատարված են, որպեսզի հնարավոր լինի կազմակերպել ջրերի դուրսմղումը. «Գետառը պատճառ չէ, դրա փակումը նախագծերով հաստատված է։ Պարզապես պետք է թույլ չտալ, որ հորդ անձրևաջրերը մտնեն Երևան»։