Իշխանությունն ապավինում է կրիմինալին

Հայտնի դարձավ, որ վերջերս կալանքից ազատվել է քրեական հեղինակություն համարվող Արամ Վարդանյանը՝ Վստրեչի Ապերը, սակայն նրա փաստաբաններն այս փաստը գաղտնի են պահել։ Արամ Վարդանյանը մեղադրվում է քաղաքացիական կացության ակտերի գրանցման մարմիններին սուտ տեղեկություններ հաղորդելու, փաստաթղթեր կեղծելու, շորթման եւ փողերի լվացման մեջ։ Վարդանյանը կալանավորվեց անցած տարի, իրավապահները բարբարոսաբար նրան տանից բերման ենթարկեցին, անգամ թոռնիկ էր վախից կորցրել խոսելու ունակությունը, ապա ազատ էր արձակվել հունվարին՝ 75 միլիոն դրամ գրավի դիմաց: Սակայ դատախազության բողոքի հիման վրա նրան նորից կալանավորել էին եւ ազատ են արձակել ընտրությունների նախաշեմին: Մամուլում վերջին ժամանակները տեղեկություններ են հրապարակվում, որ իշխանությունը աշխատում է կրիմինալ աշխարհի վրա, փորձում է իրեն աջակից դարձնել գողականներին, թաղային հեղինակություններին եւ բոլոր նրանց, ովքեր կարող են իշխանության համար ձայներ ապահովել:

Նիկոլ Փաշինյանն այս հարցում էլ ընդօրինակում է Սերժ Սարգսյանին, թեեւ նախկինում նրան հուժկու քննադատում էր կրիմինալի միջոցով ձայներ հավաքելու համար, բայց այսօր ինքն է փորձում գողականներին իր իշխանության հենասյուներից մեկը դարձնել: Հանցաշխարհի հետ բանակցությունները վարում է հայտնի օլիգարխներից մեկը եւ Իմ Քայլի ամենասկանդալային պատգամավորներից Հայկ Սարգսյանը, որը հեղափության օրերին Փաշինյանի ախրանիկն էր: Անցած երեք տարիներին տասնյակ հրապարակումներ եղան այն մասին, թե ինչպես է Հայկը դարձել Նորատուսցի եղբայրների տանիքը, իսկ նրանք էլ իրենց հերթին աջակցում են իշխանությանը, դա թե անցած ընտրություններին էր, թե պատերազմից հետո Փաշինյանի անվտանգությունը պահելու նպատակով հավատարիմների թիմ տրամադրելու տեսքով, թե իշխանության, մասնավորապես Փաշինյանի՝ Գեղարքունիք այցը տպավորիչ դարձնելու հետ կապված:
Օրերս էլ իրավապահների հետաքրքրությունների առանցքում հայտնվել էր քրեական հայտնի հեղինակություն Արթուր Ասատրյանը՝ Դոն Պիպոն: Խուզարկություն էին կատարել նրա տանը, բավական մեծ թվով իրավապահներով, իսկ մարտ ամսին էլ Պիպոյին ասֆալտին ծեփելով բերման ենթարկել: Հիշեցնենք, որ չնայած հեղափոխությունից հետո Պիպոն իր աջակցությունն է հայտնել Նիկոլ Փաշինյանին, բայց երեք տարում շատ ջրեր հոսեցին, Դոն Պպիպոն պարբերաբար հայտնվեց իրավապահնեի թիրախում եւ միգուցե այլեւս չի վստահում ու աջակցում իշխանություններին եւ նրանք էլ շանտաժի են դիմում:

Անի Սահակյան